SAMBIRU 13
Timote Wakhumbisiskanga Kuwovya Ŵanthu
Timote wenga mnyamata yo wayanjanga kuwovya ŵanthu. Iyu wayendanga malu ngakupambanapambana kuti wawovyi ŵanthu. Ivi vinguchitiska kuti wakondwengi ukongwa pa umoyu waki. Kumbi ukhumba kuyiziŵa nkhani yeniyi?—
Ambuyaki aku Timote a Loisi ndi anyina a Enike amusambizanga vakukwaskana ndi Yehova
Timote wangukuliya m’msumba wa Lustra. Ambuyaki a Loisi, ndi anyina a Enike angwamba kumusambiza vakukwaskana ndi Yehova weche mwana. Timote wati wakuwa wakhumbisiskanga kovya ŵanthu kuti nawu aziŵi Yehova.
Paulo wangupempha Timote weche mnyamata kuti wayendiyengi nayu limoza kuchipharazga mu vigaŵa vakupambanapambana. Timote wanguzomera. Iyu wenga wakunozgeka kuluta kuchiwovya ŵanthu.
Timote wangulutiya limoza ndi Paulo m’msumba wa Tesalonika ku Makedonia. Akhumbikanga kwenda pasi mtunda utali, pavuli paki kukwera boti kuti akafiki kwenuku. Ŵati afika, anguwovya ŵanthu anandi kuziŵa Yehova. Kweni ŵanthu anyaki angukwiya ndipu akhumbanga kuŵapuma. Ivi vinguchitiska kuti Paulo ndi Timote atuweku ndipu anguluta kuchipharazga kunyaki.
Timote wakondwanga pa umoyu waki
Pati pajumpha myezi yimanavi, Paulo wangutuma Timote kuti waluti ku Tesalonika kuchiwona abali kuti ŵe wuli. Timote wakhumbikanga chiganga kuti wawere m’msumba wakofya wenuwu. Kweni Timote wanguluta chifukwa wafipiyanga mtima abali wo ŵenga kweniko. Wati waweku wangukambiya Paulo nkhani yakukondweska. Abali ku Tesalonika wenga umampha ukongwa!
Timote wanguteŵete limoza ndi Paulo kwa vyaka vinandi. Nyengu yinyaki Paulo wangulemba kuti Timote ndi munthu wakwenere kumutuma kuti wakawovyi mipingu. Timote wayanjanga Yehova kweniso ŵanthu.
Kumbi nawi utanja ŵanthu ndipu ukhumba kuŵawovya kuti aziŵi Yehova?— Asani nawi uchitengi viyo, ukondwengi nge mo wanguchitiya Timote!