Paulo ndi Timote

Mumpingu wa ku Lusitara mwenga mnyamata munyaki zina laki Timote. Awisi ŵenga Agiriki ndipu anyina ŵenga Ayuda. Anyina a Yunisi ndi ambuyaki a Loyisi, angumusambiza vakukwaskana ndi Yehova kwambiya pa unamana waki.

Pa nyengu yo Paulo wanguluta ku Lusitara, pa ulendu waki wachiŵi wakupharazga, wanguwona kuti Timote wayanjanga abali ndipu wenga wakunozgeka kuŵawovya. Paulo wangupempha Timote kuti wayendi nayu limoza pa ulendu waki. Pati pajumpha nyengu, Paulo wangusambiza Timote kupharazga ndi kusambiza umampha.

Paulo ndi Timote alongozgekanga ndi mzimu wakupatulika kwekosi ko alutanga. Zuŵa linyaki usiku, mu chiwona, munthu munyaki wangukambiya Paulo kuti waluti ku Makedoniya kuti wakaŵawovyi. Mwaviyo, Paulo, Timote, Sila ndi Luka anguluta kweniko kuchipharazga ndipu angujalikiska mipingu.

Anthulumi ndi anthukazi anandi anguja Akhristu mutawuni ya Makedoniya ku Tesalonika. Kweni Ayuda anyaki achitiyanga sanji Paulo ndi ŵanthu wo wapharazganga nawu. Yiwu angudana ŵanthu anandi ndipu anguguguziya abali wo kwa alongozgi a tawuni yo ndipu adanilizanga kuti: ‘Ŵanthu yaŵa atinkhana ndi boma la Aroma!’ Usiku wenuwu, Paulo ndi Timote anguthaŵiya ku Bereya chifukwa umoyu wawu wenga pangozi.

Ŵanthu a ku Bereya akhumbisiskanga kusambira uthenga wamampha. Mwaviyo, Agiriki ndi Ayuda ku Bereya anguja Akhristu. Kweni Ayuda anyaki ŵati ŵaza kutuliya ku Tesalonika, angwambisa masuzgu, venivi vinguchitiska kuti Paulo wathaŵiyi ku Atene. Timote ndi Sila angujaliya ku Bereya kuti achiski abali. Pavuli paki, Paulo wangukambiya Timote kuti wawere ku Tesalonika, wakawovyi abali kukunthiyapu chifukwa chakuti atombozgekanga ukongwa. Pati pajumpha nyengu, Paulo wangutuma Timote kuti wakachiski abali ndi azichi mumipingu yinyaki.

Paulo wangukambiya Timote kuti: ‘Wo akhumba kuteŵete Yehova azamutombozgeka.’ Timote wangutombozgeka ndipu wanguŵikika mujeri chifukwa cha chivwanu chaki. Wangukondwa chifukwa wangulongo kuti wenga wakugomezgeka kwaku Yehova.

Paulo wangukambiya abali a ku Filipi kuti: ‘Ndikutumiziyeningi Timote. Iyu wakusambizeningi kuti muchitengi vinthu nge mteŵeti waku Yehova ndipuso mo mungapharazgiya.’ Paulo waziŵanga kuti Timote wenga wakugomezgeka. Yiwu anguteŵete limoza kwa vyaka vinandi ndipu ayanjananga ukongwa.