Kovya pa nchitu za Ufumu​—Kuzenga Malu Ngakusopiyamu Kweniso Kupereka Chovyu pa Nyengu ya Masuzgu

TIYERUZGIYI kuti musere mu Nyumba ya Ufumu ndipu muzizwa kuwona mo yasinthiya. Mutiyiyanja ukongwa nyumba yeniyi. Mukumbuka so mo mwakondwiyanga pa nyengu yo mwawovyanga kuzenga Nyumba ya Ufumu yeniyi. Kweni sonu mukondwa ukongwa chifukwa Nyumba ya Ufumu yinu yasinthika kuja malu ngakupereke chovyu kwa abali wo akumana ndi masuzgu. Pambula kuswera yapa m’chigaŵa chinu mwawa vuwa yikulu ukongwa yo yananga vinthu, ndipu Komiti ya Nthambi yanozga nthowa yakovye ŵanthu wo akumana ndi masuzgu mwakuŵapaska chakurya, vakuvwara, maji, kweniso vinthu vinyaki vakukhumbika. Katundu yo waperekeka kuti wawovyi abali waŵikika umamphaumampha. Abali ndi azichi asere kuti alonde vakukhumbika ndipu anandi masozi ngadika chifukwa cha likondwa.

Yesu wangukamba kuti chinthu chikulu cho chazamuziŵikiska ŵanthu ŵaki, nchanju cho azamulongorana yumoza ndi munyaki. (Yoh. 13:34, 35) M’chigaŵa ichi tiwonengi mo Akaboni aku Yehova alongore chanju pa nchitu zakuzenga kweniso kupereka chovyu kwa abali ŵawu wo akumana ndi masoka. Chanju cho yiwu alongo mbukaboni wanthazi wakuti Ufumu waku Yesu uwusa.