CHIGAŴA 8
Vo Mungachita Asani Mwakumana ndi Masuzgu
“Mujikankhaŵiriya [mukondwa ukongwa, NW], chingana nkhuti mukasuzgikanga kamanavi sonu mu mesedu ngamtundumtundu.”—1 Petro 1:6
Chinanga kuti mungayesesa wuli kuti muje ndi nthengwa kweniso banja lalikondwa, vinthu vamabuchibuchi vingakutondekeskani kulutirizga kuja alikondwa. (Wakutaula 9:11) Asani tikumana ndi masuzgu, Chiuta watitiwovya chifukwa chakuti watitanja. Asani mugwiriskiya nchitu fundu za m’Malemba, imwi ndi banja linu mukhoza kumalana ndi masuzgu chinanga ngangaŵa ngakulu.
1 MUGOMEZGENGI YEHOVA
VO BAYIBOLO LIKAMBA: “Pakuponya paku iyu kweŵeku linu losi, pakuti waphwere imwi.” (1 Petro 5:7) Nyengu zosi mukumbukengi kuti Chiuta ndiyu wachitiska kuti mukumanengi ndi masuzgu cha. (Yakobe 1:13) Kweni iyu wakuwovyeningi chifukwa chakuti mutesesa kundere kufupi ndi iyu. (Yesaya 41:10) “Muneniyeni masuzgu nginu ngosi.”—Sumu 62:8.
Asani muŵerenga ndi kusambira Bayibolo zuŵa lelosi, mupembuzgikengi ukongwa. Ndipu muwonengi mo Yehova watitipembuzgiya “mu suzgu yidu yosi.” (2 Ŵakorinte 1:3, 4; Ŵaroma 15:4) Yehova walayizga kuti wakupaskeningi “chimangu cho chaku Chiuta, cho chizungura kuwamu kosi.”—Ŵafilipi 4:6, 7, 13.
VO MUNGACHITA:
Murombengi kuti Yehova wakuwovyeni kuja akufwasa kweniso akuŵanaŵana umampha
Wonani so umampha vosi vo mukhumba kuchita ndipu sankhani vo vingakuwovyani pe
2 MUJIPHWERIYENGI KWENISO MUPHWERIYENGI BANJA LINU
VO BAYIBOLO LIKAMBA: “Muwongu wa chinjeru upenja zeru, ndipu gutu la wazeru lipenja chinjeru.” (Nthanthi 18:15) Muziŵengi vo vichitikiya weyosi m’banja linu kweniso vo weyosi wakhumba. Mukambiskanengi nawu ndipuso muŵavwisiyengi.—Nthanthi 20:5.
Kumbi mungachita wuli asani munthu yo mutanja watayika? Mungawopanga cha kuliya. Kumbukani kuti Yesu nayu “wanguliya.” (Yohane 11:35; Wakutaula 3:4) Kupumuwa ndipuso kugona mwakukwana nkhwakukhumbika. (Marko 6:31) Venivi vingakuwovyani kuti muleki kusuzgika maŵanaŵanu.
VO MUNGACHITA:
Muyanjengi kukambiskana ndi banja linu kaŵikaŵi masuzgu ngechendakuwiyeni. Ivi vingawovya kuti mukambiskanengi mwakufwatuka asani banja linu lakumana ndi masuzgu
Kambiskanani ndi ŵanthu wo akukumanapu ndi masuzgu ngakuyanana ndi ngo mwakumana nangu
3 MUPEMPHENGI ANYINU KUTI AKUWOVYENI
VO BAYIBOLO LIKAMBA: “Bwezi litanja nyengu zosi, ndipu [ilu ndi] mwana munyaku wakupapikiya suzgu.” (Nthanthi 17:17) Anyinu angayanja kukuwovyani, kweni angaziŵa cha vo angachita kuti akuwovyeni. Mwaviyo, mungatondekanga cha kuŵakambiya vo mukhumba kuti akuchitiyeni. (Nthanthi 12:25) Mukhumbika so kupempha ŵanthu wo avwisa umampha fundu za m’Bayibolo kuti akuwovyeni kulutirizga kuja pa ubwezi ndi Yehova. Ulongozgi wa m’Bayibolo wo angakupaskani ungakuwovyani.—Yakobe 5:14.
Kwanjana ndi ŵanthu wo agomezga nadi Chiuta ndi malayizgu ngaki, kungakuwovyani asani mwakumana ndi masuzgu. Mungapembuzgika so ukongwa asani mutovya wo akumana ndi masuzgu. Muŵakambiyengi vo mugomezga kweniso vo Chiuta walayizga. Muyesesengi kovya ŵanthu wo akumana ndi masuzgu kweniso kucheza ndi ŵanthu wo atikuyanjani ndi kukuŵanaŵaniyani.—Nthanthi 18:1; 1 Ŵakorinte 15:58.
VO MUNGACHITA:
Asani mwakumana ndi masuzgu, mukonkhoskiyengeku mubwezi winu wapamtima kuti wakuwovyeni
Mungabisanga cha vo mukhumba kuti anyinu akuchitiyeni ndipu mukambengi mwakufwatuka