Akusambira Angupuluwa Tirigu pa Zuŵa la Sabata

Yesu ndi akusambira ŵaki angwamba ulendu wakuluta kunkhondi, cha ku Galileya. Atenere kuti angwenda ulendu uwu mu March pamwenga April chifukwa pa nyengu iyi ndipu tirigu wacha. Akusambira aku Yesu ŵenga ndi nja ndipu angwamba kupuluwa tirigu ndi kurya. Kweni lenili lenga zuŵa la Sabata ndipu Afarisi anguwona vo akusambira aku Yesu achitanga.

Kumbukani kuti pambula kuswera, Ayuda anyaki apenjanga kubaya Yesu ku Yerusalemu chifukwa aŵanaŵananga kuti waphwanya Sabata. Kweni pa nyengu iyi, Afarisi angwamba kumba mlandu Yesu chifukwa cha vo akusambira ŵaki anguchita. Yiwu angumukambiya kuti: “Wona! Akusambira ŵaku achita vinthu vambula kwenere kuchitika pa zuŵa la Sabata.”—Mateyu 12:2.

Afarisi akambanga kuti kupuluwa tirigu ndi kumufikinya kuti munthu waryi, kwenga kuvuna ndi kukhwema. (Chituwa 34:21) Zuŵa la Sabata lingujalikiskika kuti ŵanthu akondwengi kweniso kuti achiskikengi mwauzimu. Kweni Afarisi angupanga marangu ngakukhwima ngakukwaskana ndi ntchitu zo ŵanthu akhumbikanga kugwira. Chifukwa cha venivi, zuŵa ili lajanga lakuvukisa ukongwa. Yesu wangususka maŵanaŵanu ngawu ngaheni. Ndipu wanguŵakonkhoske vakuyeruzgiyapu vakulongo kuti vo yiwu achitanga, vapambananga ndi vo Yehova Chiuta wakhumbanga kuti ŵanthu achitengi asani alondo dangu lakukwaskana ndi Sabata.

Chakuyeruzgiyapu chakwamba cho Yesu wangukamba chenga chaku Davidi ndi ŵanthu wo wenga nawu. Yiwu ŵati ŵavwa nja, anguma pa chihema ndi kurya viŵandi vakulongo kwaku Chiuta. Viŵandi venivi ndipu vatuzgikapu kali pa masu paku Yehova ndipu anguŵikapu vinyaki vasonu. Kweni asembi pe ndiwu ŵenga akwenere kurya viŵandi vo vingutuzgikapu. Mwakukoliyana ndi mo vinthu venge pa nyengu yo, Davidi ndi ŵanthu wo wenga nawu angumbika mlandu cha chifukwa cha kurya viŵandi venivi.—Ŵalevi 24:5-9; 1 Samuele 21:1-6.

Mu chakuyeruzgiyapu chachiŵi, Yesu wangukamba kuti: “Kumbi mukuŵerenga cha mu Dangu kuti pa zuŵa la Sabata asembi agwira ntchitu kwambula kuswa dangu la zuŵa la Sabata?” Pakukamba mazu ngenanga, iyu wang’anamuwanga kuti asembi abayanga nyama zakuti apereki sembi kweniso agwiranga ntchitu zinyaki panyumba yakusopiyamu pa zuŵa la Sabata. Pavuli paki, Yesu wangukamba kuti: “Sonu nditikukambiyani kuti munthu munyaki wakukhumbika ukongwa kuluska nyumba yakusopiyamu, we panu.”—Mateyu 12:5, 6; Maŵerengedu 28:9.

Kuti waŵawovyi kuvwisa fundu yeniyi, Yesu wangugwiriskiya ntchitu Malemba ndipu wanguti: “Asani mwaziŵanga vo mazu ngakuti, ‘Ndikhumba sembi cha kweni lisungu’ ngang’anamuwa, mphanyi mwaŵayeruzga cha ŵanthu ambula kunanga.” Pakumaliya, iyu wangukamba kuti: “Chifukwa Mwana wa munthu ndiyu Mbuya wa Sabata.” Yapa, Yesu wang’anamuwanga Ufumu waki wachimangu wo wazamulamuliya kwa vyaka 1,000.—Mateyu 12:7, 8; Hoseya 6:6.

Kwa vyaka vinandi, ŵanthu asuzgika ndi nkhondu kweniso vinthu vinyaki vankhaza vo vichitika chifukwa chakuti Satana ndiyu walamuliya charu ichi. Venivi vazamupambana ukongwa ndi vinthu vo vazamuchitikanga asani tazisere mu Sabata likulu, lo limiya ulamuliru waku Khristu. Pa nyengu iyi, tazamupumuwa ku masuzgu ngidu ngosi. Tikhumbisiska ukongwa venivi ndipu taja tichivilindizga kwa nyengu yitali!