Kumbi Marangu Ngazomerezanga Munthu Kuchitanji pa Zuŵa la Sabata?

Zuŵa linyaki pa Sabata, Yesu wanguluta ku sinagogi. Panyaki sinagogi mwenuyu wenga wa ku Galileya. Kwenuku, wangusaniya munthu wakufwa janja lamaryi pamwenga kuti wakupunduka. (Luka 6:6) Alembi ndi Afarisi alereseskanga kuti awoni vo Yesu wachitengi. Ntchifukwa wuli achitanga viyo? Yiwu angulongo vo aŵanaŵananga po angufumba kuti: “Kumbi ntchakwenere kuchizga pa zuŵa la Sabata?”—Mateyu 12:10.

Alongozgi Achiyuda agomezganga kuti kuchizga munthu pa zuŵa la Sabata kwenga kwakuzomerezeka pijapija asani umoyu we pangozi. Mwaviyo, pa zuŵa la Sabata, kwenga kwambula kuzomerezeka kuweze chiwanga m’malu mwaki asani munthu wafyoka pamwenga kumanga bandeji asani lundi lapinthuka, chifukwa umoyu waŵanga pangozi cha. Venivi vilongole limu kuti alembi ndi Afarisi afumbanga Yesu chifukwa chakufipiya mtima munthu wakufwa janja cha. M’malu mwaki, akhumbanga ŵaka kumusaniriya chifukwa.

Chinanga kuti venga viyo, Yesu wanguziŵa maŵanaŵanu ngawu ngaheni. Wanguziŵa so kuti yiwu akhwimisanga ukongwa marangu ngakukwaskana ndi ntchitu zo ŵanthu akhumbikanga kugwira pa zuŵa la Sabata. Venivi vakoliyananga cha ndi malemba. (Chituwa 20:8-10) Pa nyengu iyi, ndipu ŵanthu anyaki amumba kali mulandu chifukwa cha vinthu vamampha vo iyu wanguchita. Kweni nkhani iyi yingukuwa ukongwa Yesu wati wakambiya munthu wakufwa janja kuti: “Soka, iza pakati yapa.”—Mariko 3:3.

Pavuli paki, Yesu wangulereska alembi ndi Afarisi ndipu wangukamba kuti: “Asani mungaŵa ndi mbereri yimoza ndipu mbereri yo yawa muzenji pa zuŵa la Sabata, ndiyani waku yimwi wangaleka kuyiko ndi kuyituzga?” (Mateyu 12:11) Pa nyengu yo, munthu wasaniyanga ndalama asani we ndi mbereri. Mwaviyo, asani mbereri yawiya muzenji, mweneku wayisiyanga mwenimo cha kuti yifiki zuŵa linyaki chifukwa yatingi yifwengi ndipu vatingi vichitiskengi kuti waluzi ndalama. Kweniso Malemba ngakamba kuti: “Munthu murunji waphwere viŵetu vaki.”—Nthanthi 12:10.

Kuti waŵawovyi kuvwisa fundu yo wakambanga, Yesu wangulutirizga kukamba kuti: “Kwe wuli munthu, pakuti ngwakuzirwa kuluska mbereri! Mwaviyo, mbumampha kuchita vinthu vamampha pa zuŵa la Sabata.” (Mateyu 12:12) Ivi vilongo kuti Yesu wanguphwanya Sabata cha pa nyengu yo wanguchizga munthu wakufwa janja. Alongozgi achisopa ŵenaŵa angutondeka kususka fundu yakuvwika umampha yeniyi kweniso yakulongo lisungu, yo Yesu wangukonkhoska ndipu anguja ŵaka cheti.

Yesu wangukwiya kweniso wanguchita chitima chifukwa cha maŵanaŵanu ngaheni ngo ŵanthu yaŵa ŵenga nangu. Pavuli paki, wangulereska uku ndi uku ndi kukambiya munthu wakufwa janja kuti: “Nyoloska janja laku.” (Mateyu 12:13) Munthu uyu wati wanyoroska janja laki, linguja umampha nge linyaki. Iyu wangukondwa ukongwa wati wawona kuti janja laki lachira. Kweni kumbi ŵanthu wo akhumbanga kuko Yesu anguchita wuli?

M’malu mwakukondwa kuti janja la munthu uyu lachira, Afarisi angutuliya kubwalu nyengu yeniyo ndipu angwamba kupangana “ndi gulu laku Herodi kuti abayi Yesu.” (Mariko 3:6) Gulu lenili lasazgangapu gulu linyaki lachisopa lo laziŵikanga kuti Asaduki. Kwamba kali, Asaduki ndi Afarisi akoliyananga cha kweni pa nyengu iyi, angukoliyana ukongwa kuti asuski Yesu.