Mo Titovye Ntchitu za Ufumu Mucharu Chidu Ndipuso Pacharu Chosi

KUTI afiski uchimi waku Yesu wakukwaskana ndi mazuŵa ngakumaliya, Akaboni aku Yehova apharazga uthenga wamampha “mpaka kuvigaŵa vakutali ukongwa va charu chapasi.” (Machi. 1:8; Mate. 24:14) Kuti venivi vichitiki, yiwu atijipereka pakupharazga ndipu agwiriskiya ntchitu nyengu ndi nthazi zawu. Nge antchitu anyaki aku Yehova, yiwu atimuthemba kuti waŵawovyengi, ndichu chifukwa chaki alutirizga kudanjizga Ufumu waki pa umoyu wawu. (Mate. 6:25-34; 1 Akori. 3:5-9) Vo vitiŵachitikiya, vilongore limu kuti Yehova wakondwa ndi vo achita kweniso watiŵatumbika.

MO TITOVYE NTCHITU ZA UFUMU PACHARU CHOSI

² Chifukwa chakuti tipharazga uthenga wamampha mu nthowa zakupambanapambana ndipuso tigaŵiya kwawezi Mabayibolu ndi mabuku ngakukonkhoska Bayibolu, ŵanthu afumba kuti: “Kumbi venivi vifiskika wuli?” Mbuneneska kuti tigwiriskiya ntchitu ndalama zinandi kuti tipangi ndi kusindikiza Mabayibolu kweniso mabuku ngakukonkhoska Bayibolu. Tigwiriskiya so ntchitu ndalama zinandi pakuzenga ndipuso pakunozga nyumba za pa Beteli zo muja ateŵeti wo asindikiza mabuku, awonere ntchitu yakupharazga ndipuso wo ateŵete mu nthowa zinyaki kuti ntchitu yakupharazga uthenga wamampha yiluti panthazi. Kusazgiyapu yapa, akuwonere madera, amishonale, apayiniya apade kweniso wo achita uteŵeti wapade wa nyengu zosi, apaskika ndalama zimanavi kuti ziŵawovyi po alutirizga kugwira ntchitu zawu. Venivi vilongore limu kuti tigwiriskiya ntchitu ndalama zinandi ukongwa pakupharazga uthenga wamampha mazuŵa nganu, kaya ndi mucharu chidu pamwenga pacharu chosi. Kumbi ndalama zenizi zituwa pani?

³ Ŵanthu anandi wo awonga ntchitu ya Akaboni aku Yehova yakusambiza Bayibolu, akondwa kupereka ndalama kuti ziwovyi pa ntchitu yeniyi yo yichitika pacharu chosi. Kweni Akaboni ndiwu atovya ukongwa ntchitu yeniyi. Anyaki mwa Akaboni ŵenaŵa atumiza ndalama mwakukhumba kwawu kuofesi ya nthambi ya mucharu chawu. Akhristu ŵenaŵa, apereka vinthu vawu ndi mtima wosi nge mo anguchitiya ateŵeti aku Chiuta akali wo angupereka vo ŵenga navu, kuti awovyi pa ntchitu yakuzenga nyumba yakusopiyamu Yehova. (Eki. 35:20-29; 1 Mbiri 29:9) Ŵanthu anyaki alembe limu kuti asani ŵafwa vinthu vawu nge ndalama, malu ndipuso vinthu vinyaki, viziperekeki ku gulu laku Yehova. Ndalama zinyaki zituliya ku ŵanthu, mipingu kweniso madera. Asani ndalama zosi izi zasazgika pamoza, zitovya kuti ntchitu yakupharazga yiluti panthazi.

⁴ Akaboni aku Yehova awona kuti mbudindu wawu kugwiriskiya ntchitu ndalama zawu ndipuso vinthu vinyaki kuti alutiski panthazi ntchitu yakupharazga. Yesu ndi akusambira ŵaki ŵenga ndi kabokosi ko asungangamu ndalama zo agwiriskiyanga ntchitu pa vinthu vakupambanapambana. (Yoha. 13:29) Bayibolu lititikambiya vakukwaskana ndi anthukazi wo ateŵetiyanga Yesu ndi akusambira ŵaki. (Mariko 15:40, 41; Luka 8:3) Wakutumika Paulo wanguwonga chovyu cho ŵanthu wo akhumbanga kulutiska panthazi uthenga wamampha amupaskanga ndipuso wo amuwovyanga pa ntchitu yakupharazga. (Afi. 4:14-16; 1 Ate. 2:9) Akaboni aku Yehova alondo vo ŵanthu akali ŵenaŵa achitanga pakuteŵete Chiuta mwaphamphu ndipuso kuja akupaska. Venivi vachitiska kuti ŵanthu a mtima wamampha pacharu chosi apaskikengi “maji nga umoyu kwawezi.”—Chivu. 22:17.

MO TITOVYE MPINGU WO TIWUNGANAMU

⁵ Mpingu wo tiwunganamu nawu ugwiriskiya ntchitu ndalama zo ŵanthu apereka mwakukhumba kwawu. Titendeska mbali cha, tichita kulanga cha kuti munthu wapereki ndalama zilinga ndipu tipempheska ndalama cha. M’malu ngo tichitiyamu maunganu muja mabokosi kuti munthu weyosi waponyengemu ndalama “nge mo wasimikiziya mumtima mwaki.”—2 Akori. 9:7.

⁶ Ndalama zo zaperekeka tilipiriya vinthu vo tigwiriskiya ntchitu pa Nyumba ya Ufumu ndipuso vo tigwiriskiya ntchitu pakuyinozga kuti yilutirizgi kuwoneka umampha. Wupu wa ŵara ungasankha kutumiza ndalama zinyaki ku ofesi ya nthambi ya Akaboni aku Yehova kuti zikawovyi pa ntchitu yakupharazga pacharu chosi. Mpingu wosi ukhumbika kuzomerezga kuti ndalama zenizi zitumiziki. Venivi, vitovya kuti mipingu yinandi yiperekengi ndalama zakovye ntchitu ya pacharu chosi. Asani ŵanthu wosi pa mpingu aziŵa kuti pe vinthu vinyaki vo vikhumbika nyengu zosi, pakhumbika cha kupharazga kaŵikaŵi nkhani ya vakupereka.

KUPHWERE NDALAMA ZO ZAPEREKEKA

⁷ Asani unganu wamala, abali ŵaŵi atuzgamu ndalama mumabokosi nga vakupereka ndipu alemba ndalama zo asaniyamu. (2 Mafu. 12:9, 10; 2 Akori. 8:20) Wupu wa ŵara usaniya nthowa yakwenere yakuti ndalama zenizi zisungiki mpaka po zitumizikiyengi ku ofesi ya nthambi pamwenga zigwiriskikiyengi ntchitu pa mpingu. Asani mwezi wamala, mubali yo waphwere ndalama za mpingu walemba lipoti la mo ndalama zagwiriya ntchitu kuti mpingu uziŵiskiki ndipu asani pajumpha myezi yitatu, wakukumaniska ntchitu za wupu wa ŵara wanozga kuti aŵerengese mo ndalama zayende.

NDALAMA ZO ZIGWIRISKIKIYA NTCHITU MU DERA

⁸ Ndalama zo zigwiriskikiya ntchitu pa unganu wadera, kweniso pa vinthu vinyaki va mudera, ziperekeka ndi abali kweniso azichi a mudera lenilo. Mabokosi nga vakupereka ngaŵikika pa maunganu ngadera kuti ŵanthu aŵikengemu ndalama, ndipu ndalama zenizi zija za dera. Nyengu zinyaki mipingu yingapempheka so kuti yipereki ndalama asani pakhumbika kulipira vinthu vinyaki mudera.

⁹ Kanandi dera lelosi litijilipiriya lija ndalama za vinthu vo ligwiriskiyengi ntchitu pa unganu wadera kweniso pa vakuchitika vinyaki vakukwaskana ndi dera, ndipu ndalama zo zajaku litizipereka ku ofesi ya nthambi kuti ziwovyi pa ntchitu ya pacharu chosi. Asani dera lawona kuti ndalama zo ze kuthumba la dera zingakwana cha kulipiriya vinthu vo agwiriskiyengi ntchitu pa unganu pamwenga palivi ndalama zakukwana zakulipiriya vinthu vinyaki pa unganu wadera wakulondopu nge kulipiriya limu malu ngakuchitiyapu unganu, wakuwonere dera wapempha mipingu kuti yipereki ndalama. Wupu wa ŵara wewosi ukambiskanengi kuti uwoni unandi wa ndalama zo mpingu wawu ungapereka. Pavuli paki upemphi mpingu kuti uzomerezi.

¹⁰ Asani pe nkhani zakukwaskana ndi ndalama zo ŵara a mudera akhumbika kuti akambiskani, ŵara wosi a mudera lo akumana pa unganu wadera. Kupatuwaku ndalama zo zigwira ntchitu pa unganu wadera, ŵara akhumbika kuzomereza dankha ndalama zosi za dera zechendagwiriskikiyi ntchitu pa ntchitu zinyaki. Nyengu yeyosi yo akhumba kugwiriskiya ntchitu ndalama zenizi, pakhumbika kulemba unandi wa ndalama zo ndipu ŵara ndiwu atenere dankha kuzomereza.

¹¹ Nyengu ndi nyengu, patuŵa ndondomeku yakuŵerengese mo ndalama za dera zayende.

KUPHWERE AKAVU

¹² Chilatu chimoza mwa vilatu vo Yesu ndi akusambira ŵaki asungiyanga kabokosi ka ndalama, chenga chakuti awovyengi akavu. (Mariko 14:3-5; Yoha. 13:29) Akhristu ŵeche ndi udindu wenuwu chifukwa Yesu wanguti: “Akavu mujengi nawu nyengu zosi.” (Mariko 14:7) Kumbi mazuŵa nganu Akaboni aku Yehova achita wuli kuti afiski udindu wakuphwere akavu?

¹³ Nyengu zinyaki, mu mpingu mungaŵa abali ndi azichi akugomezgeka wo akhumbika chovyu chifukwa chakuti mbakukota, atama pamwenga akumana ndi masuzgu ngakulu. Ŵanthu a mubanja lawu, abali ŵawu ndipuso anyaki wo aziŵa kuti Akhristu ŵenaŵa akhumbika chovyu, angaŵawovya. Venivi vikoliyana ndi mazu nga wakutumika Yohane, ngakuti: “Weyosi yo we ndi vinthu va mucharu ichi ndipu wawona kuti mubali waki wakavuka kweni wakana kumuchitiya lisungu, kumbi tingakamba kuti munthu waviyo watanja Chiuta? Mwaŵana, tingayanjananga ŵaka ndi mazu cha pamwenga ndi lilimi, kweni tiyanjanengi mu vakuchita ndipuso mwauneneska.” (1 Yoha. 3:17, 18; 2 Ate. 3:6-12) Wo asopa mwauneneska, atovya Akhristu akugomezgeka wo akhumbika kuwovyeka.—Yako. 1:27; 2:14-17.

¹⁴ Mukalata yakwamba yo wakutumika Paulo wangulembe Timote, wangukonkhoska mo ŵanthu wo akhumbika chovyu, angawovyeke. Mungaŵerenga ulongozgi waki pa 1 Timote 5:3-21. Mkhristu weyosi we ndi udindu wakuphwere ŵanthu a mubanja laki. Akukota pamwenga wo atama ukongwa atenere kuwovyeka ndi ŵana ŵawu, azuku ŵawu pamwenga abali ŵawu anyaki. Nyengu zinyaki, boma ndipuso mawupu ngapereka vinthu vo vingaŵawovya. Mwaviyo, abali ŵawu ndipuso ŵanthu anyaki angawovya ŵanthu ŵenaŵa kuti alembesi ku boma pamwenga ku mawupu ngenanga. Vingachitika kuti abali ndi azichi wo aja akugomezgeka kwa nyengu yitali, akumana ndi suzgu yinyaki ndipu mpingu wosi ukhumbika kuŵawovya. Asani Akhristu ŵenaŵa alivi ŵanthu a mubanja lawu, abali ŵawu anyaki wo angaŵawovya ndipuso mawupu nga boma ngapereka chovyu chimana, wupu wa ŵara unganozga kuti mpingu uŵawovyi. Akhristu awona kuti mbudindu wawu kupereka vinthu vawu ku ŵanthu wo alivi.

¹⁵ Abali ndi azichi anandi aŵavi vinthu vakuliŵavu chifukwa cha kutombozgeka, nkhondu, vidilirisi, kusapaliya kwa maji, nja, pamwenga masuzgu nganyaki ngakulungakulu ngo ngachitika peposi mu nyengu yakusuzga yinu. (Mate. 24:7-9) Mipingu ya m’dera lo kwachitika masuzgu ngenanga, yingaŵavi vinthu vakuti yipaski Akhristu anyawu. Asani ve viyo, Wupu Wakulongozga unozga kuti abali ndi azichi a muvyaru vinyaki apereki chovyu. Venivi viyanana ndi vo Akhristu a ku Asia Minor anguchita penipo angutumiza chakurya kwa abali a ku Yuda pa nyengu yo kwenga nja. (1 Akori. 16:1-4; 2 Akori. 9:1-5) Mwakulondo vo abali yaŵa anguchita, nasi tilongo kuti titanja Akhristu anyidu ndipuso kuti te nadi akusambira auneneska aku Yesu Khristu.—Yoha. 13:35.

KULONDE NDI KUGAŴIYA MABUKU NGIDU

¹⁶ Mabayibolu ndipuso mabuku ngidu ngatovya ukongwa pakupharazga uthenga wa Ufumu. Kanandi, wupu wa ŵara usankha mteŵeti wakovya kuti waphweriyengi mabuku pa mpingu. Abali wo apaskika ntchitu yakuphwere mabuku atiwuwona mwakupepuka cha udindu wawu. Yiwu awonesesa kuti alemba vosi vakukhumbika kuti mpingu ujengi ndi mabuku ngakukwana.

¹⁷ Chifukwa chakuti ndisi Akhristu akujipatuliya, tiziŵa kuti nyengu, zeru, nthazi, lusu, chuma kweniso umoyu widu, ndi mphasu yakutuliya kwaku Chiuta ndipu wakutipaska kuti tivigwiriskiyengi ntchitu pakumuteŵete. (Luka 17:10; 1 Akori. 4:7) Asani tigwiriskiya ntchitu mwakwenere vinthu venivi, tilongo kuti titimuyanja ukongwa Yehova. Mwaviyo, tikhumbika kutumbika Yehova ndi vinthu vakuzirwa vo te navu chifukwa tiziŵa kuti wakondwa ndi chawanangwa chechosi cho titimupaska, vo vilongo kuti titijipereka ndi mtima wosi. (Nthanthi 3:9; Mariko 14:3-9; Luka 21:1-4; Ako. 3:23, 24) Yesu wangukamba kuti: “Mukupaskika kwawezi, perekani kwawezi.” (Mate. 10:8) Asani tijiperekengi ndipuso tigwiriskiyengi ntchitu vinthu vidu pakuteŵete Yehova, tikondwengi ukongwa.—Machi. 20:35.