Yehova Wangusankha Yoswa

Mozesi wati walongozga mtundu wa Ayisirayeli kwa vyaka vinandi, wenga pafupi kufwa. Yehova wangumukambiya kuti: ‘Ndiwi cha uselezengi ŵana Ayisirayeli mu Charu Chakulayizgika. Kweni ndikuzomerezengi kuti uchiwoni charu cho.’ Mwaviyo, Mozesi wangupempha Yehova kuti wasankhi munthu munyaki kuti walongozgengi Ayisirayeli. Yehova wangumukambiya kuti: ‘Luta kwaku Yoswa ndipu ukamukambiyi kuti ndasankha iyu.’

Mozesi wangukambiya Ayisirayeli kuti we pafupi kufwa ndipu Yehova wasankha Yoswa kuti ndiyu waŵalongozgengi pakusere mu Charu Chakulayizgika. Pavuli paki, Mozesi wangukambiya Yoswa kuti: ‘Ungawopanga cha. Yehova wakuwovyengi.’ Pati pajumpha nyengu yimanavi, Mozesi wanguluta pachanya pa Phiri la Nebo. Kwenuku, Yehova wangumulongo charu cho wangulayizga Abrahamu, Isaki ndi Yakobe. Mozesi wangufwa we ndi vyaka 120.

Yehova wangukambiya Yoswa kuti: ‘Yambuka Msinji wa Yorodani, ndipu muluti mucharu cha Kanani. Ndikuwovyengi nge mo ndinguwovye Mozesi. Uwonesesi kuti uŵerenga Marangu ngangu zuŵa lelosi. Ungachitanga mantha cha. Uje wachiganga. Luta ndipu ukachiti vosi vo ndakukambiya.’

Yoswa wangutuma ŵanthu ŵaŵi kuti aluti kuchiwona tawuni ya Yeriko. Munkhani yakulondopu, tisambirengi vinandi vakukwaskana ndi vo vinguchitika kweniko. Ŵati aweku, angukamba kuti yeniyi yenga nyengu yamampha yakuti aluti ku Kanani. Mawa laki, Yoswa wangukambiya Ayisirayeli kuti aphwasuwi mahema ngawu kuti alutengi. Pavuli paki, wangutuma asembi wo apinganga bokosi la phanganu kuti adanjiyepu achiwoloka Msinji wa Yordane. Msinji ungutola kweni asembi ŵati akanda ŵaka mumaji, maji ngo nganguleka kwenda ndipu nganguphwa. Asembi angwenda mpaka pakati pa msinji ndipu anguma penipo Ayisirayeli wosi anguyambukiya kusirya linyaki. Kumbi uŵanaŵana kuti chakuziziswa ichi chinguŵakumbuska vo Yehova wanguchita pa Nyanja Yiyera?

Pavuli pa vyaka vosi ivi, Ayisirayeli angusele mu Charu Chakulayizgika. Yiwu anguzenga nyumba kweniso matawuni. Ŵenga ndi minda ya mphereska, ya vipasu ndi mbewu zinyaki. Chenga charu chakwenda mkaka ndi uchi.