Kalata Yakutuwa ku Wupu Wakulongozga

Akwanjiwa Akhristu Anyidu:

Chifukwa chakuti ndisi ateŵeti aku Yehova, titanja Mazu ngaki ngo ndi Bayibolu. Tigomeza kuti Bayibolu likonkhosa vinthu mwauneneska, ulongozgi waki ngwakovya pa umoyu ndipu le ndi ukaboni wakulongo kuti Yehova watanja ukongwa ŵanthu. (Salimo 119:105; Luka 1:3; 1 Yohane 4:19) Tikhumbisiska kuti ŵanthu asambiri uneneska wo we mu Mazu ngaku Chiuta. Mwaviyo, ndisi akukondwa kulemba buku ili lakuti, “Sambirani Nkhani za M’Bayibolu.” Sonu, tikukonkhoskiyeningi kamanavi za buku lenili.

Buku ili alembe ukongwa ŵana. Chinanga kuti ve viyo, lingagwiriskikiya so ntchitu pakuwovya arara wo akhumba kuziŵa vinandi vakukwaskana ndi Bayibolu. Chifukwa chakuti Bayibolu lingawovya weyosi, mwambula kukayika tosi tiyanduwengi asani tisambirengi nkhani zenizi zo zingatiwovya kuja alikondwa.

Nkhani zo ze mubuku ili zatuliya mu Bayibolu ndipu zikonkhosa mo Chiuta wangwambiya kulenga vinthu. Nkhani zenizi zakonkhoskeka mwakuvwika umampha kweniso mu nthowa yipusu ndipu zakonkhoskeka mwakukoliyana ndi nyengu yo zinguchitikiya.

Buku ili likonkhoska ŵaka nkhani za mu Bayibolu pe cha, kweni le ndi vinandi. Mo alembe buku ili ndipuso vithuzi vo vilimu, vosi vanozgeka mu nthowa yakuti nkhani zo zikulembeka m’Bayibolu zivwikengi nge kuti zichitika sonu kweniso zilongongi mo ŵanthu wo akonkhoskeka avwiyanga.

Buku ili litiwovyengi kuziŵa kuti Bayibolu likonkhoska za ŵanthu wo avwiyanga Yehova kweniso wo amuvwiyanga cha. Lititichiska kuti tisambirepu kanthu pa vo achitanga. (Aroma 15:4; 1 Akorinto 10:6) Buku lenili lagaŵika mu vigaŵa 14. Kukwambiriya kwa chigaŵa chechosi akonkhoskaku fundu zo tisambira pa nkhani yo.

Asani ndimwi mpapi, mungaŵerenga nkhani yosi ndi mwana winu ndipu mungakambiskana vithuzi vo ve munkhani yo. Pavuli paki, imwi ndi mwana winu mungaŵerenga malemba ngo patuliya nkhani yo. Wovyani mwana winu kuti wawoni kukoliyana kwa vo waŵerenga mu Bayibolu ndi nkhani yo waŵerenga mubuku. Nthowa yeniyi, yingawovya so asani musambira ndi munthu mura kuti waziŵi vo ve mu Bayibolu.

Tigomeza kuti buku ili, liwovyengi ŵanthu wosi a mtima wamampha, anamana ndi arara viyo kuti aziŵi Mazu ngaku Chiuta ndi kungagwiriskiya ntchitu pa umoyu wawu. Venivi vingachitisa kuti ayambi kuteŵete Yehova ndipuso aje ŵanthu a mu banja laki lo ŵatiliyanja.