BOKOSI 19B
Maji Ngamanavi Ngangusambuka Msinji Ukulu!
Ezekiyeli wawonanga msinji wakutuliya ku malu ngakupaturika ngaku Yehova wo mwakuziziswa ungukuwa ukongwa. Mumphepeti mwa msinji uwu mwenga vimiti vamampha vo vaperekanga vakurya kweniso venga ndi mani ngakuchizgiya. Kumbi vosi ivi ving’anamuwanji?
Msinji Upereka Vitumbiku
MU NYENGU YAKALI: Ayisirayeli wo ŵenga ku ukapolu ŵati awere ku charu chawu, Yehova wanguŵatumbika ŵati ŵayamba so kuweziyapu kusopa kwa uneneska
MAZUŴA NGANU: Mu 1919, kusopa kwauneneska kunguwezekiyapu ndipu kwambiya nyengu yeniyi Chiuta watiŵatumbika mwauzimu ateŵeti ŵaki akugomezgeka
KUNTHAZI: Pavuli pa Aramagedoni, Yehova wazamutumbika ŵanthu ŵaki mwakuliŵavu kweniso mwauzimu
Maji Ngakupaska Umoyu
MU NYENGU YAKALI: Yehova wanguŵatumbika ukongwa ŵanthu ŵaki akuvwiya chinanga mphanyengu yo chiŵerengeru chawu chingukuwa ukongwa, ndipu wanguŵatumbika mwauzimu
MAZUŴA NGANU: Mu paradayisu wauzimu, ŵanthu anandi ayanduwa ndi uneneska wa mu Bayibolu ndipu asambira vakukwaskana ndi Yehova kweniso akoliyana ndi ŵanthu ŵaki wo atimusopa mu nthowa yo iyu wazomereza
KUNTHAZI: Ŵanthu wo azamutaskika pa Aramagedoni, azamuja limoza ndi ŵanthu mamiliyoni nganandi wo azamuyuskika ndipu wosi azamulonde vitumbiku vinandi kutuliya kwaku Yehova
Vimiti va Vakurya Kweniso Vakuchizgiya
MU NYENGU YAKALI: Yehova wanguŵaryiska mwauzimu ŵanthu ŵaki akugomezgeka mu charu chawu cho chinguwezekiyapu ndipuso wanguŵachizga ku matenda ngauzimu ngo ŵenga nangu kwa nyengu yitali
MAZUŴA NGANU: Chakurya chauzimu chinandi cho tilonde mazuŵa nganu, chitovya ŵanthu anandi kuchira ku matenda ngauzimu kweniso ku nja yauzimu yo ŵanthu anandi ŵe nayu mu charu ichi
KUNTHAZI: Khristu kweniso a 144,000 wo wamulamuliya nawu limoza, azamuwovya ŵanthu kuja akufikapu ndi kuja ndi umoyu wamampha kweniso wambula kutama kwamuyaya!