Ntharika Zakusambiza

Mateyu 13:34, 35

FUNDU ZAKUDUMUWA: Kuti musazgiyeku lusu linu pakusambiza, mugwiriskiyengi ntchitu ntharika zipusu zo zingakondwesa akuvwisiya ndipuso kuŵasambiza fundu zakukhumbika.

MO MUNGACHITIYA:

• Mugwiriskiyengi ntchitu ntharika zipusu. Nge mo Yesu wachitiyanga, namwi mugwiriskiyengi ntchitu vinthu vimanavimana pakukonkhoska vinthu vikuluvikulu, ndipuso vinthu vipusu pakukonkhoska vinthu vakusuzga. Lekani kukonkhoska vinthu vo vingachitiska kuti fundu yikulu ya ntharika yinu yileki kuwoneka. Muwonesesengi kuti vinthu vo ve muntharika yinu vikoliyana ukongwa ndi nkhani yo mukonkhoska. Venivi vingawovya kuti akuvwisiya aleki kutimbanyizgika chifukwa chakuti fundu zinyaki zikoliyana cha.

• Muŵanaŵaniyengi ntharika zo zingakondwesa akuvwisiya. Mugwiriskiyengi ntchitu ntharika zo zikoliyana ndi vo akuvwisiya atanja kuchita kweniso zo zingaŵakondwesa. Lekani kugwiriskiya ntchitu ntharika zo zingalengesa akuvwisiya pamwenga kuŵaguŵisa.

• Mukonkhoskengi fundu yikulu. Mukonkhoskengi fundu zikuluzikulu muntharika yinu m’malu mwakulimbana ndi fundu zimanazimana. Mutenere kuwonesesa kuti akuvwisiya angakumbukanga waka ntharika pe cha, kweni akumbukengi so vo asambirapu pa ntharika yo.