Fundu Zitatu zo Zingakuwovyani Kuti Lusu Linu Lakusambiza Liluti Panthazi
1. Nchifukwa wuli titenere kuyesesa kukuzga lusu lidu lakusambiza?
1 Akaboni wosi mbasambizi. Tisambiza ŵanthu, kwali mpha ulendu wakwamba, ulendu wakuweriyaku pamwenga asani tichitisa sambiru la Bayibolo. Ndipu uthenga wo tisambiza ngwapade ukongwa. Titovya ŵanthu kuti aziŵi “malembu ngakupaturika,” ngo ngangaŵawovya kuti aje ndi ‘zeru zakuzitaskikiya.’ (2 Timo. 3:15) Uwu ndi mwaŵi wapade ukongwa! Sonu tiyeni tiwoni fundu zitatu zo zingatiwovya kuti lusu lidu lakusambiza liluti panthazi.
2. Tingachita wuli kuti tisambizengi mu nthowa yipusu?
2 Tikonkhoskengi M’nthowa Yipusu: Asani nkhani titiyiziŵa umampha, nchipusu kuluwa kuti munthu munyaki yo waleka kuyiziŵa wangayiwona kuti njakusuzga ukongwa. Mwaviyo, asani muchitiska sambiru la Bayibolo, mungakonkhoskanga fundu zinanandi zambula kukhumbika cha. M’malu mwaki, kambani waka fundu zikuluzikulu. Munthu wangaziŵika kuti wasambiza umampha chifukwa chakukamba vinthu vinandi cha. (Ntha. 10:19) Chakukhumbika nkhuŵerenga waka malemba ngo ngakonkhoska ukongwa fundu zikulu za nkhani yo. Asani mwaŵerenga lemba, wonani ukongwa fundu yo yikoliyana ndi nkhani yo mukambiskana. Upharazgi wa Paphiri wa pa Mateyu chaputala 5 mpaka 7, we ndi fundu zikuluzikulu za uneneska, kweni pakusambiza ŵanthu, Yesu wanguzikamba munthowa yipusu kweniso ndi mazu ngamanavi ngakwenere.
3. Kumbi vakuyeruzgiyapu vitovya wuli, nanga ndi nivi vo kanandi vija vamampha ukongwa?
3 Vakuyeruzgiyapu: Vakuyeruzgiyapu vitovya munthu kuti waŵanaŵanengi, wakwaskikengi mtima ndipuso kuti wakumbukengi vo wavwa. Lekani kuwona nge kuti munthu wakwanja kukonkhoska nkhani ndiyu wangakonkhoska vakuyeruzgiyapu vamampha. Kanandi Yesu wagwiriskiyanga nchitu vakuyeruzgiyapu vifupi ndipuso vambula kusuzga. (Mate. 7:3-5; 18:2-4) Vithuzi vambula kusuzga vo mungajambula pa pepala vingakuwovyani so ukongwa. Mungakonkhoska vakuyeruzgiyapu vamampha ukongwa asani munozgeke limu.
4. Kumbi tingachita wuli kuti tigwiriskiyengi nchitu mafumbu mwakwenere?
4 Mafumbu: Chilatu cha mafumbu nchakuti munthu yo musambira nayu waŵanaŵanengi. Mwaviyo, mulindizgengepu dankha asani mwafumba fumbu. Asani mwamuka liŵi, muziŵengi umampha cha vo wakusambira winu watuvwa. Asani wamuka umampha cha, mungachita umampha kumufumba mafumbu ngakusazgiyapu kuti wasaniyi yija kwamuka, m’malu mwakumumukiya. (Mate. 17:24-27) Mbuneneska kuti palivi weyosi waku isi yo ndi msambizi yo waziŵa vinthu vosi. Ndichu chifukwa chaki, Bayibolo lititichiska kuti nyengu zosi tiphweriyengi ndi vo tisambiza. Asani tichita viyo, tazamulonde vitumbiku vambula kumala pamoza ndi ŵanthu wo atitivwisiya.—1 Timo. 4:16.