MUSAMBIZENGI ŴANTHU KUTI AJE AKUSAMBIRA
SAMBIRU 11
Musambizengi Munthowa Yipusu
Fundu ya mu Bayibolu: “Asani yimwi mwakugwiriskiya ntchitu lilimi linu mulongoro vinthu vakusuzga kuvivwa, kumbi munthu wangaziŵa wuli cho chikambika?”—1 Akori. 14:9.
Vo Yesu Wanguchita
1. Woneriyani VIDIYO, pamwenga ŵerengani Mateyu 6:25-27. Pavuli paki ŵanaŵaniyani mafumbu yanga:
Kumbi Yesu wangulongo wuli kuti Yehova watitiŵanaŵaniya?
Chinanga kuti Yesu waziŵanga vinandi vakukwaskana ndi viyuni, ntchifukwa wuli wangukonkhoska mu nthowa yipusu? Ntchifukwa wuli yeniyi yenga nthowa yamampha yakusambiziya?
Kumbi Tisambiranji Kwaku Yesu?
2. Asani tisambiza mu nthowa yipusu, ŵanthu akumbukengi vo titiŵasambiza ndipu tiŵafikengi pa mtima.
Muyezgengi Yesu
3. Mungalongoronga vinandi cha. Mumalu mwakukonkhoska vosi vo muziŵa vakukwaskana ndi nkhani yo mukambiskana, konkhoskani ukongwa fundu zo ze mu buku lo musambira nayu. Asani mwafumba fumbu, lindizgani mwakuzikira kuti wakusambira winu wamuki. Asani ansala wayiziwa cha pamwenga wamuka fundu zo zisuskana ndi Bayibolu, mufumbeni so mafumbu ngakusazgiyapu kuti mumuwovyi kuyivwisa nkhani yo. Asani muwona kuti wayivwisa fundu yikulu, lutani pa fundu yinyaki.
4. Wovyani wakusambira winu kuziŵa fundu zinyaki zasonu kusazgiyapu pa vo waziŵa kali. Mwakuyeruzgiyapu, mwechendayambi kusambira nkhani ya chiyuka, mungamufumba kuti wakonkhoski mwakudumuwa vo waziŵa vakukwaskana ndi vo vichitika asani munthu wafwa.
5. Mugwiriskiyengi ntchitu umampha vakuyeruzgiyapu. Mwechendayambi kukamba chakuyeruzgiyapu jifumbeni kuti:
‘Kumbi chakuyeruzgiyapu ichi ntchipusu?’
‘Kumbi munthu yo ndisambira nayu wachivwisengi umampha?’
‘Kumbi wakumbukengi waka chakuyeruzgiyapu ichi mumalu mwakukumbuka fundu yikulu?’