SAMBIRU 14

Longoni Fundu Zikuluzikulu

Aheberi 8:1

FUNDU ZAKUDUMUWA: Wovyani akuvwisiya kuti ayilondongi nkhani yinu, ndipu mukonkhoskengi umampha mo fundu yikulu yeyosi yikoliyana ndi chilatu chinu ndipuso mutu wa nkhani.

MO MUNGACHITIYA:

Mujengi ndi chilatu. Mufufuzengi kuti muziŵi chilatu cha nkhani yinu. Venivi vikuwovyeningi kuti muziŵi asani nkhani yinu yikhumbika kuyikamba mwakusimikiza, mwakuchiska pamwenga mu nthowa yakuti akuvwisiya aziŵi ŵaka vinthu vinyaki. Ndipu asani mwaziŵa chilatu chaki, yesesani kuyikamba mu nthowa yeniyo. Wonesesani kuti fundu zosi zikuluzikulu zitovya kuti mufiski chilatu chinu.

Jifumbeni kuti: ‘Kumbi ndi mafumbu nanga ngo akuvwisiya angafumba pa nkhani iyi? Ndipu asani ndaŵamuka, kumbi ndi mafumbu nganyaki nanga ngo angafumba so?’ Asani mwaziŵa venivi, ŵikani fundu zinu mwandondomeku mwakukoliyana ndi vo mwasaniya, kuti akuvwisiya ayilondongi nkhani yinu, avwisengi ndipuso apinduwengi ndi vo mukamba.
Mulongongi mutu wa nkhani yinu. Mulongongi mutu wa nkhani yinu kutuwa pakwamba mpaka pakumaliya. Mungachita venivi mwakuzumbuwa mazu ngo nge ndi fundu yikulu pa mutu wa nkhani yinu pamwenga mazu nganyaki ngakuyanana nangu.
Mukonkhoskengi mwakuvwika umampha fundu zinu zikuluzikulu ndipuso m’mazu ngapusu. Musankhengi fundu zo zikoliyana ndi mutu wa nkhani kweniso zo mungafiska kuzikonkhoska umampha mu nyengu yo mwapaskika. Ndi fundu zosi cha zikuluzikulu zo mutenere kukonkhoska. Ndipu fundu yeyosi yikulu muyikonkhoskengi mwakuvwika umampha, mupumuwengepu dankha kamanavi asani mwamaliza kuyikonkhoska kweniso muzilumikizengi umampha fundu zikuluzikulu asani mutuwa pa yinyaki, kuluta pa yinyaki.

Mumazu nginu ngakwamba, mungakamba fundu zikuluzikulu zo ze mu nkhani yinu kuti akuvwisiya ayilondongi umampha nkhani yinu pamwenga mungazizumbuwa so kukumaliya kwa nkhani yinu kuti akuvwisiya aleki kuziluwa.