Muweriyengemu Fundu Zikulu zo Mwasambira

Kumbi nyengu zinyaki vitikusuzgani kukumbuka fundu zo mwasambira? Tosi vititichitikiya venivi. Kumbi ndi vinthu wuli vo vingakuwovyani kuti mukumbukengi vo mwasambira? Muweriyengemu fundu zikulu zo mwasambira.

Asani musambira pakumwija, mumengi dankha ndipu muwonengi fundu zakukhumbika ukongwa. Wakutumika Paulo wangukambiya ŵanthu wo aŵerenganga makalata ngaki, mo angachitiya venivi. Iyu wangukamba kuti: “Sonu fundu yikulu [ndi iyi].” (Ahe. 8:1) Mwaviyo, wanguŵawovya kuvwisa vo wang’anamuwanga ndipuso kuziŵa mo fundu zosi zakoliyananga ndi nkhani yo wanguŵalembe.

Mungagwiriskiya ntchitu nyengu yinyaki, panyaki 10 minisi asani mwamaliza kusambira, kuti muŵanaŵaniyepu fundu zikulu zo mwasambira. Asani mwaluwa fundu zikulu, wonani so timitu timanatimana pamwenga chiganizu chakwamba chechosi mu ndimi yeyosi. Kuchita viyo kungakuwovyani kuti mukumbuki fundu zo mwasambira. Asani mwasambira vinthu vasonu yesani kuvikonkhoska mu mazu nginu ndi nginu. Asani muweriyamu fundu zikulu zo mwasambira vingakuwovyani kuti muzikumbukengi kweniso vingakusuzgani cha kuziŵa mo mungazigwiriskiya ntchitu pa umoyu winu.