SAMBIRU 6

Kambani Chifukwa Cho Muŵerenge Lemba

Yohane 10:33-36

FUNDU ZAKUDUMUWA: Asani mwajula lemba mungaliŵerenganga waka cha kwambula kukonkhoska fundu yaki. Muwovyengi akuvwisiya kuwona kukoliyana kwa lemba lo mwaŵerenga ndi fundu yo mukonkhoska.

MO MUNGACHITIYA:

Kambani mazu ngo nge ndi fundu yikulu. Asani mwaŵerenga lemba, zumbuwani mazu ngo ngakoliyana ukongwa ndi fundu yo mukhumba kukonkhoska. Mungachita ivi mwakuwereza mazu ngo nge ndi fundu yikulu pamwenga mungafumba fumbu lo lingawovya akuvwisiya kuti aziŵi mazu ngo nge ndi fundu yikulu.

Asani mukhumba kugwiriskiya ntchitu mazu nganyaki pakukonkhoska fundu yo ye pa lemba lo mwaŵerenga, wonesesani kuti akuvwisiya avwisa kukoliyana kwa mazu nga m’Bayibolu ndi fundu yikulu yo mukonkhoska.
Longoni fundu yo mukhumba kuti akuvwisiya ayikumbuki. Asani mwakamba chifukwa cho mwaŵerenge lemba, konkhoskani mo mazu ngo nge ndi fundu yikulu pa lemba lo ngakoliyana ndi chifukwa cho mwaliŵerenge.

Pa nyengu yo mukonkhoska lemba, Bayibolu linu lijengi lakujula. Venivi viwovyengi kuti akuvwisiya nawu aleki kujala Mabayibolu ngawu, ndipu awonengi umampha kukoliyana kwa vo mukonkhoska ndi vo ve pa lemba lo.
Kukonkhoska vinandi cha. Lekani kukonkhoska fundu zo zileka kukoliyana ndi fundu yo mukhumba kukamba. Sankhanipu waka fundu zo zingawovya kuti vo mukhumba kukamba vivwiki umampha mwakukoliyana ndi vo akuvwisiya aziŵa kali pa nkhani yo.