SAMBIRU 15

Kukamba Nkhani Mwakusimikiza

1 Atesalonika 1:5

FUNDU YAKUDUMUWA: Longoni kuti mugomezga ndi mtima wosi kuti vo mukamba vauneneska nadi ndipuso kuti vakuzirwa.

Munozgekiyengi mwakukwana. Yiŵerengeni mwakukwana nkhani yinu kuti muziŵi fundu zikuluzikulu kweniso mo Bayibolu lilongore kuti fundu zo zauneneska. Muyesesengi kukonkhoska fundu zikuluzikulu mu mazu ngamanavi ndipuso ngapusu. Ndipu mukonkhoskengi mo zingawovye akuvwisiya. Mupempherengi kuti Yehova wakupaskeni mzimu wakupaturika.

Muyeseriyengi kukamba mwakukweza mazu kuti fundu zo ze mu nkhani yinu zijalikiskiki mumaŵanaŵanu nginu, kweniso kuti mukayikambi mwalusu.
Sankhani mazu ngo ngangawovya kuti mukakambi mwakusimikiza. M’malu mwakuchita kuŵerenga mazu ngo nge pa autilayini pamwenga buku, mukambengi mu mazu nginu. Musankhengi mazu ngo ngalongo kuti musimikiza kuti vo mukamba vauneneska nadi.
Longoni kuti mukamba mwakusimikiza. Mukambengi ndi nthazi yakwenere ya mazu. Asani vakwenere muchigaŵa chinu, mulereskengi akuvwisiya.

Kweni mukhumbika cha kuŵasankhiya vakuchita akuvwisiya, kukamba mwambula kuŵaŵanaŵaniya pamwenga kukamba waka maŵanaŵanu nginu. M’malu mwaki, nyengu zosi mukambengi mwachanju ndipuso mwalisungu.