Muyesesengi Kuŵafika pa Mtima Ŵanthu

Nthanthi 3:1

FUNDU ZAKUDUMUWA: Wovyani akuvwisiya kuti avwisengi kukhumbika kwa nkhani yinu kweniso kuti achitengepu kanthu.

MO MUNGACHITIYA:

• Muwovyengi akuvwisiya kuti ajifufuzengi. Mufumbengi mafumbu ngo ngangawovya ŵanthu wo atikuvwisiyani kuti ajifufuzengi mo avwiya mumtima.

• Muŵachiskengi kuti ajengi ndi vilatu vamampha. Muchiskengi akuvwisiya kuziŵa chifukwa cho akhumbikiya kuchita vinthu vamampha. Muŵawovyengi kuti aje ndi vilatu vamampha pakwanja Yehova, abali ndi azichi kweniso vinthu vo Bayibolu lisambiza. Ndipuso muŵawovyengi kuziŵa kukhumbika kwa fundu zakuzirwa za m’Bayibolu. M’malu mwakuŵaguŵiska, kuŵanyoza pamwenga kuŵachitiska soni, mukambengi mazu ngakuchiska. Venivi vingaŵawovya kuti ayesesengi kuchita vinthu vamampha.

• Muŵawovyengi kuti athembengi Yehova. Konkhoskani mo vinthu vo Bayibolu lisambiza, fundu za m’Bayibolu kweniso marangu, vilongore mijalidu yaku Chiuta kweniso chanju cho watitilongo. Ndipu muwovyengi akuvwisiya kuti awonengi vinthu nge mo Yehova wativiwone kweniso kuti amukondwesengi.