SAMBIRU 54
Kumbi “Kapolu Wakugomezgeka ndi Wazeru” Ndiyani Nanga Wagwira Ntchitu Wuli?
Yesu ndiyu Mutu wa mpingu wa Chikhristu. (Aefeso 5:23) Nge mutu, mazuŵa nganu Yesu walongozga Akhristu pacharu chapasi mwakugwiriskiya ntchitu “kapolu wakugomezgeka ndi wazeru.” (Ŵerengani Mateyu 24:45.) Yesu Khristu ndiyu wakusankha “kapolu” mwenuyu ndipu wakumupaska mazaza ngakusankha vakuchita vinyaki. Chinanga kuti veviyo, kapolu mwenuyu wakhumbika kumuvwiya mbwenu Yesu Khristu ndipuso kuteŵete abali aku Khristu. Kumbi kapolu mwenuyu ndiyani? Nanga watitiphwere wuli?
1. Kumbi “kapolu wakugomezgeka ndi wazeru” ndiyani?
Yehova wakwamba kali kupereka ulongozgi ku ŵanthu ŵaki mwakugwiriskiya ntchitu munthu yumoza pamwenga kagulu ka ŵanthu amanavi. (Malaki 2:7; Aheberi 1:1) Yesu wati wafwa, akutumika ndipuso ŵara ku Yerusalemu ndiwu angwamba kulongozga. (Machitidu 15:2) Nge mo venge kali, mazuŵa nganu napu, kagulu kamanavi ka ŵara ko kaziŵika kuti Wupu Wakulongozga wa Akaboni aku Yehova, kapereka chakurya chauzimu ndipuso kalongozga ntchitu yakupharazga. Kagulu kenaka ndiku “kapolu wakugomezgeka ndi wazeru . . . yo [Yesu] wakumuŵika.” (Mateyu 24:45a) Abali wosi wo ŵe mu Wupu Wakulongozga, mbakhristu akusankhika ndi mzimu. Akhristu ŵenaŵa alindizga kuti asani umoyu wawu wamala pacharu chapasi, aluta kuchanya kuchilamuliya limoza ndi Khristu mu ufumu waki.
2. Kumbi ntchakurya chauzimu nichi cho kapolu wakugomezgeka wapereka?
Yesu wangukamba kuti kapolu wakugomezgeka ‘wazakuŵapaska chakurya Akhristu pa nyengu yakwenere.’ (Mateyu 24:45) Chakurya chakuliŵavu chititiwovya kuti tije ndi liŵavu lanthazi. Mwakuyanana waka, chakurya chauzimu pamwenga kuti ulongozgi wakutuliya mu Mazu ngaku Chiuta, chititiwovya kuti tilutirizgi kuja akugomezgeka kwaku Yehova ndipuso kuti tigwirengi ntchitu yo Yesu wakutipaska. (1 Timote 4:6) Tilonde chakurya chenichi kuziya mu maunganu ngampingu, ngadera kweniso ngachigaŵa, mabuku ngo ngakonkhoska Bayibolu ndipuso mavidiyo ngo ngatitiwovya kuvwisa vo Chiuta wakhumba. Vinthu venivi vititiwovya so kuti tije pa ubwezi wakukho ndi iyu.
SAMBIRANI VINANDI
Wonani chifukwa cho pakhumbikiya “kapolu wakugomezgeka ndi wazeru” pamwenga kuti Wupu Wakulongozga.
Wupu Wakulongozga upereka chakurya chauzimu, ulongozgi ndipuso utovya Akaboni aku Yehova pacharu chosi
3. Ŵanthu aku Yehova akhumbika kuchita vinthu mwakukoliyana nge gulu
Mwakulongozgeka ndi Yesu, Wupu Wakulongozga ulongozga ntchitu ya Akaboni aku Yehova. Nthowa yeniyi ndiyu so Yesu walongozgiyanga Akhristu akwambiriya. Woneriyani VIDIYO.
Ŵerengani 1 Akorinto 14:33, 40, pavuli paki kambiskanani fumbu ili:
Kumbi mavesi yanga ngalongo wuli kuti Yehova wakhumba kuti Akaboni ŵaki alongozgekengi umampha nge gulu?
4. Kapolu wakugomezgeka walongozga ntchitu yakupharazga
Akhristu akwambiriya agwiranga ntchitu yakukhumbika ukongwa yakupharazga. Ŵerengani Machitidu 8:14, 25, pavuli paki kambiskanani mafumbu yanga:
Kumbi mbayani wo alongozganga Akhristu akwambiriya ŵenaŵa pa ntchitu yakupharazga?
Kumbi Peturo ndi Yohane anguchita wuli akutumika anyawu ŵati aŵatuma?
Wupu Wakulongozga ndiwu ulongozga ntchitu yakukhumbika ukongwa yakupharazga. Woneriyani VIDIYO.
Yesu wangulongo kuti ntchitu yakupharazga njakukhumbika ukongwa. Ŵerengani Mariko 13:10, pavuli paki kambiskanani mafumbu yanga:
Ntchifukwa wuli Wupu Wakulongozga uwona kuti ntchitu yakupharazga njakukhumbika ukongwa?
Nanga ntchifukwa wuli tikhumbika kulongozgeka ndi “kapolu wakugomezgeka ndi wazeru” pa ntchitu yakupharazga pacharu chosi?
5. Kapolu wakugomezgeka wapereka ulongozgi
Wupu Wakulongozga upereka ulongozgi kwa Akhristu pacharu chosi. Kumbi wupu wenuwu uchita wuli kuti uziŵi ulongozgi wo ungapereka? Wonani mo wupu wakulongozga wa Akhristu akwambiriya wachitiyanga venivi. Ŵerengani Machitidu 15:1, 2, pavuli paki kambiskanani mafumbu yanga:
Kumbi ndi nkhani wuli yo yingusuzga pakati pa Akhristu anyaki akwambiriya?
Kumbi Paulo ndi Baranaba kweniso Akhristu anyaki anguluta kwakayani kuti akakambiskani nkhani iyi?
Ŵerengani Machitidu 15:12-18, 23-29, pavuli paki kambiskanani fumbu ili:
Kumbi wupu wakulongozga unguchitanji wechendasankhi vakuchita kuti uziŵi maŵanaŵanu ngaku Chiuta pa nkhani iyi?—Wonani vesi 12, 15, ndipuso 28.
Ŵerengani Machitidu 15:30, 31 ndipuso 16:4, 5, pavuli paki kambiskanani mafumbu yanga:
Kumbi Akhristu akwambiriya anguchita wuli ŵati alonde ulongozgi wakutuliya ku wupu wakulongozga?
Kumbi Yehova wanguŵatumbika wuli chifukwa chakuvwiya?
Ŵerengani 2 Timote 3:16 ndipuso Yakobe 1:5, pavuli paki kambiskanani fumbu ili:
Kumbi Wupu Wakulongozga mazuŵa nganu utiwusaniya pani ulongozgi asani usankha vakuchita?
ŴANTHU ANYAKI AKAMBA KUTI: “Asani muvwiya Wupu Wakulongozga, ndikuti mulondo waka ŵanthu.”
Ntchifukwa wuli musimikiza kuti Yesu ndiyu walongozga nadi Wupu Wakulongozga?
KUMBI MWASAMBIRANJI?
Wupu Wakulongozga ndiwu “kapolu wakugomezgeka ndi wazeru” yo wakuŵikika ndi Khristu. Wupu uwu upereka ulongozgi ndipuso chakurya chauzimu kwa Akhristu pacharu chosi.
Kuweriyamu
Kumbi ndiyani yo wakusankha “kapolu wakugomezgeka ndi wazeru”?
Kumbi Wupu Wakulongozga utitiphwere wuli?
Kumbi mugomezga kuti Wupu Wakulongozga ndiwu “kapolu wakugomezgeka ndi wazeru”?
FUFUZANI
Wonani mo Wupu Wakulongozga ugwiriya ntchitu.
“Kumbi Wupu Wakulongozga wa Akaboni aku Yehova Ntchinthu Wuli?” (Nkhani ya pa webusayiti)
Wonani mo Wupu Wakulongozga uwonesese kuti tilonde chakurya chauzimu chakuthembeka.
Kumbi abali wosi a mu Wupu Wakulongozga atiyiwona wuli ntchitu yo Yesu wakuŵapaska?
Kumbi maunganu ngidu ngampingu ndipuso ngakulungakulu ngalongo wuli kuti Yehova ndiyu walongozga nadi Wupu Wakulongozga?