“Kumbukani Wo Alongozga Pakati Pinu”

MAZU yanga ngo wakutumika Paulo wakulemba pa Aheberi 13:7, ngangafwatulikiya so kuti: “Kumbukani wo atikulamuliyani.” Kutuliya pa Pentekositi mu 33 C.E. akutumika akugomezgeka aku Yesu Khristu, ndiwu angwamba kulongozga mpingu wachikhristu wo ungujalikiskika ŵaka. Yiwu aziŵikanga kuti wupu wakulongozga. (Machi. 6:2-4) Pakuzifika cha m’ma 49 C.E., mu wupu wenuwu mwenga so ŵanthu anyaki kusazgiyapu pa akutumika aku Yesu. Pa nyengu yo asankhanga vakuti achiti pa nkhani ya kudumulika, mu wupu wakulongozga mwenga “akutumika ndi ŵara ku Yerusalemu.” (Machi. 15:1, 2) Abali yaŵa akambiskananga nkhani zo zakwaskanga Akhristu mu mipingu yosi. Yiwu atumizanga makalata ndi marangu vo vachiskanga mipingu ndipuso kovya akusambira wosi kuti aje ndi maŵanaŵanu ngakukoliyana kweniso achitiyengi vinthu limoza. Akhristu mu mipingu ajithereskanga ndipuso avwiyanga ulongozgi wakutuliya ku wupu wakulongozga. Venivi vinguchitiska kuti Yehova waŵatumbikengi kweniso kuti aluti panthazi.—Machi. 8:1, 14, 15; 15:22-31; 16:4, 5; Ahe. 13:17.

² Akutumika ŵati ŵafwa, mu mpingu mungwamba mpatuku. (2 Ate. 2:3-12) Nge mo Yesu wangukambiya muntharika ya tirigu ndi duru, mu tirigu (Akhristu akusankhika) mungumijika duru (Akhristu aboza). Tirigu ndi duru anguvileka kwa vyaka vinandi kuti vikuliyi pamoza mpaka nyengu yakuvuna, yo yimiya “umaliru wa nyengu yinu.” (Mate. 13:24-30, 36-43) Pa nyengu yo tirigu ndi duru vakuliyanga limoza, Yesu wangulutirizga kwanja Mkhristu weyosi wakusankhika chinanga kuti pengavi wupu wakulongozga kweniso pengavi nthowa yakuziŵika yo Yesu wagwiriskiyanga ntchitu pakupereka ulongozgi kwa Akhristu. (Mate. 28:20) Chinanga kuti venga viyo, Yesu wangulayizga kuti vinthu vazamusintha mu nyengu yakuvuna.

³ “Kumbi kapolu wakugomezgeka ndi wazeru ndiyani?” Yesu Khristu wati wafumba fumbu lenili, wangwamba kukonkhoska ntharika nge chigaŵa cha “chisimikizu” cha “kumala kwa nyengu yinu.” (Mate. 24:3, 42-47) Iyu wangulongo kuti kapolu wakugomezgeka ndi wazeru mwenuyu, wazamutangwanika ndi ntchitu yakupereka chakurya ku ŵanthu aku Chiuta “pa nyengu yakwenere.” Yesu wagwiriskiyanga ntchitu kagulu ka ŵanthu pakulongozga ŵanthu aku Chiuta mu nyengu ya akutumika. Mwaviyo, kapolu wakugomezgeka yo Yesu wagwiriskiya ntchitu mu nyengu yinu ya umaliru, ndi munthu yumoza cha.

KUMBI “KAPOLU WAKUGOMEZGEKA NDI WAZERU” NDIYANI?

⁴ Kumbi Yesu wakusankha yani kuti waryiskengi Akhristu? Iyu wagwiriskiya ntchitu Akhristu akusankhika wo ŵe pacharu chapasi. Bayibolu likamba kuti yiwu ateŵete nge “asembi wo so ndi mafumu” ndipu akupaskika ntchitu ‘“yakupharazga kwekosi mijalidu yamampha ukongwa” yaku Yo wakuŵadana kutuwa mu mdima kuluta ku ukweru waki wakuziziswa.’ (1 Petu. 2:9; Mala. 2:7; Chivu. 12:17) Kumbi Akhristu wosi akusankhika wo ŵe pacharu chapasi ŵe mugulu la kapolu wakugomezgeka? Awa. Pa nyengu yo Yesu wangupaska chakurya anthurumi pafupifupi 5,000, kwambula kuŵerengeskiyaku anthukazi ndi ŵana, wanguchipereka kwa akutumika ndipu yiwu ndiwu angugaŵiya ŵanthu wosi. (Mate. 14:19) Yesu wangugwiriskiya ntchitu ŵanthu amanavi kuti waryiski ŵanthu anandi. Mazuŵa nganu, iyu wagwiriskiya so ntchitu ŵanthu amanavi kuti wapereki chakurya chauzimu.

⁵ Mwaviyo, “mteŵeti wapanyumba wakugomezgeka kweniso wazeru,” nkhagulu ka abali akusankhika wo anozga ndi kugaŵa chakurya mu nyengu yinu ya kuŵapu kwaku Khristu. (Luka 12:42) Mu mazuŵa nganu ngakumaliya abali akusankhika wo ŵe mugulu la “kapolu wakugomezgeka ndi wazeru” ateŵete limoza ku likulu la Akaboni aku Yehova. Yiwu ndiwu Wupu Wakulongozga wa Akaboni aku Yehova.

⁶ Khristu wagwiriskiya ntchitu wupu wenuwu kuti ukonkhoskengi kufiskika kwa mauchimi nga m’Bayibolu ndipuso kupereka ulongozgi wa pa nyengu yaki wa mo tingagwiriskiya ntchitu fundu za m’Bayibolu zuŵa lelosi pa umoyu widu. Chakurya chauzimu chenichi, chiperekeka ku ŵanthu kuziya mu mipingu ya Akaboni aku Yehova. (Yesa. 43:10; Aga. 6:16) Mu nyengu yakali, kapolu wakugomezgeka pamwenga mteŵeti ndiyu wawoneriyanga nyumba ya ambuyaki. Mwakuyanana ŵaka, kapolu wakugomezgeka ndi wazeru wapaskika udindu wakuwonere ateŵeti wosi akugomezgeka aku Chiuta. Mwaviyo, kapolu mwenuyu wawonere katundu, ntchitu yakupharazga, maunganu ngachigaŵa ndi ngadera, kusankhika kwa abali kuti alongozgengi pa maudindu ngakupambanapambana mugulu laku Yehova ndipuso ntchitu yakusindikiza mabuku ngo ngakonkhoska Bayibolu ngo ngatovya “a munyumba yaki.”—Mate. 24:45.

⁷ Nanga “a munyumba yaki” mbayani? Yiwu mbanthu wo aryiskika. Pakwamba, a munyumba yaki wosi ŵenga Akhristu akusankhika. Pavuli paki, mzinda ukulu wa “mbereri zinyaki” nawu unguzija a munyumba yaki. (Yoha. 10:16) Magulu ngosi ngaŵi, ngaturya chakurya cho kapolu wakugomezgeka wapereka.

⁸ Pa nyengu ya chisuzgu chikulu, po Yesu waziyengi kuzipereka cheruzgu pacharu chiheni ichi, wazamupaska kapolu wakugomezgeka udindu wakuwonere “vinthu vaki vosi.” (Mate. 24:46, 47) Ŵanthu wo ŵe mukagulu ka kapolu wakugomezgeka azamulonde mphotu yawu yakuluta kuchanya. Yiwu limoza ndi anyawu wo ŵe mukagulu ka 144,000, azamulamuliya limoza ndi Khristu kuchanya. Chinanga kuti pacharu chapasi pazamuŵavi kapolu wakugomezgeka ndi wazeru, Yehova ndi Yesu azamuperekanga ulongozgi ku ŵanthu wo azamulamulikanga ndi Ufumu waki, kuporote mu ŵanthu wo azamusankhika kuja “alongozgi.”—Sali. 45:16.

NTCHIFUKWA WULI TIKHUMBIKA ‘KUKUMBUKA WO ALONGOZGA’?

⁹ Pe vifukwa vinandi vo tikhumbikiya ‘kukumbuka wo alongozga’ ndipuso kuŵagomezga. Wakutumika Paulo wanguti: “Yiwu awonere maumoyu nginu nge ŵanthu wo azamumuka mulandu. Muchitengi venivi kuti agwiri ntchitu yawu mwalikondwa kweniso mwambula kudandawula, chifukwa asani angadandawula mbwenu mupwetekekengi.” (Ahe. 13:17) Titenere kujithereska ndipuso kuvwiya wo atitilongozga chifukwa chakuti atitiwovya kuja pa ubwezi wamampha ndi Chiuta kweniso kuti vinthu vitiyendiyengi umampha.

¹⁰ Pa lemba la 1 Akorinto 16:14, Paulo wangukamba kuti: “Vosi vo muchita, muvichitengi mwachanju.” Mwaviyo, vosi vo abali wo alongozga asankha kuti tilondongi, ativisankha chifukwa cha chanju. Pakukonkhoska chanju, lemba la 1 Akorinto 13:4-8 likamba kuti: “Chanju chizikira ndipuso ntchalisungu. Chanju chichita sanji cha. Chanju chitijilumba cha, chitijikuzga cha, chichita vinthu vambula kwenere cha, chikhumba vakuchija pe cha ndipuso chikwiya cha. Chisunga vifukwa cha. Chikondwa cha ndi vinthu vambula urunji, kweni chikondwa ndi uneneska. Chiwundiya vinthu vosi, chigomezga vinthu vosi, chilindizga vinthu vosi ndipuso chikunthiyapu vinthu vosi. Chanju chimala cha.” Titenere kugomezga ulongozgi wo abali wo alongozga atitipaska chifukwa vosi vo yiwu asankha, ativisankha chifukwa cha chanju kweniso kuti isi ateŵeti aku Yehova tiyanduwi. Venivi vilongo so kuti Yehova watitiyanja.

¹¹ Nge mo venge mu nyengu ya akutumika, Yehova wagwiriskiya ntchitu ŵanthu ambula kufikapu kuti alongozgi ŵanthu ŵaki. Mu nyengu yakali nayu, iyu wagwiriskiyanga ntchitu ŵanthu ambula kufikapu kuti wafiski khumbu laki. Mwakuyeruzgiyapu, wangutuma Nowa kuti wakhomi chombu ndi kupharazga cheruzgu cho chazanga. (Gene. 6:13, 14, 22; 2 Petu. 2:5) Wangusankha Mozesi kuti walongozgi ŵanthu ŵaki kutuwa ku Ijipiti. (Eki. 3:10) Wangugwiriskiya so ntchitu ŵanthu ambula kufikapu pakulemba Bayibolu. (2 Timo. 3:16; 2 Petu. 1:21) Mazuŵa nganu, Yehova wagwiriskiya ntchitu ŵanthu ambula kufikapu kuti alongozgi pa ntchitu yakupharazga ndi kusambiza. Chinanga kuti ve viyo, venivi vikhumbika cha kutiweze vuli kuti tileki kugomezga gulu laku Chiuta. M’malu mwaki, tichiskika chifukwa tiziŵa kuti gulu laku Yehova latingi lifiskengi cha vosi vo lichita kwambula chovyu chaki. Kapolu wakugomezgeka wateŵete kwa vyaka vinandi chinanga kuti waja wachikumana ndi masuzgu. Ivi vilongo kuti walongozgeka ndi mzimu waku Chiuta. Mazuŵa nganu, Yehova watumbika ukongwa chigaŵa cha pacharu chapasi cha gulu laki. Mwaviyo, tikhumbika kuliwovya ndi kuligomezga ndi mtima wosi.

MO TILONGOLE KUTI TE AKUGOMEZGEKA

¹² Ŵanthu wo asankhika kuti apaskiki udindu mu mpingu alongo kuti mbakugomezgeka asani azomera ndi mtima wosi udindu wo apaskika kweniso asani agwira ntchitu zawu mwakugomezgeka. (Machi. 20:28) Nge apharazgi a Ufumu, tipharazga kunyumba ndi nyumba mwaphamphu, tiweriyaku ku ŵanthu wo tinguŵapharazgiya ndipuso tisambiza ŵanthu Bayibolu. (Mate. 24:14; 28:19, 20) Kuti tiyanduwi ndi chakurya chamampha cho kapolu watitipaska, titenere kunozgeke ndi kufika pa maunganu ngampingu, ngadera ndipuso ngachigaŵa. Tiyanduwa ukongwa chifukwa chakuti tichiskana ndi Akhristu anyidu pa maunganu ngenanga.—Ahe. 10:24, 25.

¹³ Tilongo kuti tigomezga gulu laku Yehova asani titiliwovya mwakupereka chuma chidu. (Nthanthi 3:9, 10) Asani tawona kuti abali ŵidu alivi vinthu vakuliŵavu, titiŵawovya mwaliŵi. (Aga. 6:10; 1 Timo. 6:18) Tichita viyo chifukwa chakuti titiŵayanja. Mwaviyo, nyengu zosi tisaniyengi nthowa zo tingalongore Yehova ndi gulu laki kuti tiwonga chifukwa cha vinthu vamampha vo atitipaska.—Yoha. 13:35.

¹⁴ Asani tikoliyana ndi vo gulu laku Yehova lasankha, tilongo so kuti titiligomezga. Nthowa yinyaki yo tingachitiya venivi, nkhuvwiya wo atitilongozga nge akuwonere dera kweniso ŵara mu mpingu. Abali ŵenaŵa ŵe mugulu la ŵanthu “wo alongozga,” wo tikhumbika kujithereska kwaku yiwu ndipuso kuŵavwiya. (Ahe. 13:7, 17) Chinanga kuti tingaziŵa cha chifukwa cho gulu laku Yehova lasankhiya vinthu vinyaki, tiziŵa kuti kuvwiya kutiwovyengi kuti vinthu vitiyende umampha. Yehova watitumbikengi chifukwa chakuvwiya Mazu ngaki ndipuso gulu laki. Asani tingachita viyo, tilongo kuti tivwiya Ambuyafwi, Yesu Khristu.

¹⁵ Te ndi vifukwa vakwenere vakugomezge kapolu wakugomezgeka ndi wazeru. Satana yo ndi chiuta wa nyengu yinu, watesesa kunyoza zina laku Yehova ndi gulu laki. (2 Akori. 4:4) Mungawiranga cha muviŵana vaki! (2 Akori. 2:11) Iyu waziŵa kuti waja ŵaka “ndi kanyengu kamanavi” kuti waponyeki muchizenji ndipu watesesa kupatuska Akhristu anandi kuti atuweku kwaku Yehova. (Chivu. 12:12) Chinanga kuti Satana watesesa kuchita viyo, tiyeni tilutirizgi kuja pa ubwezi wakukho ndi Yehova. Tilutirizgi kugomezga Yehova ndipuso nthowa yo wagwiriskiya ntchitu pakulongozga ŵanthu ŵaki mazuŵa nganu. Asani tingachita venivi, tikoliyanengi ndi abali kweniso azichi ŵidu pacharu chosi chapasi.