Udindu wo Chiuta Wakupaska Khristu

“PAKWAMBA Chiuta wangulenga kuchanya ndi charu chapasi,” ndipu vosi vo wangulenga venga “umampha ukongwa.” (Gene. 1:1, 31) Yehova wangulenga ŵanthu kuti aje ndi umoyu wamampha. Kweni kugaruka kwa mu Edene, kunguchitisa kuti likondwa la ŵanthu litimbanyizgiki kwa kanyengu kamanavi. Kweni chilatu chaku Yehova chakukwaskana ndi charu chapasi ndipuso ŵanthu, chikusintha cha. Chiuta wangulongore limu kuti ŵanthu anyaki akuvwiya akutuliya mu mphapu yaku Adamu azamupozomoka. Iyu wangulongo so kuti kusopa kwauneneska kwazamuwezgekiyapu ndipuso kuti wazamutuzgapu muheni yo ndi ntchitu zaki zosi. (Gene. 3:15) Vinthu vazamukuŵa so “umampha ukongwa.” Yehova wafiskengi venivi kuporote mu Mwana waki, Yesu Khristu. (1 Yoha. 3:8) Mwaviyo, tikhumbika nadi kuziŵa udindu wo Chiuta wakupaska Khristu.—Machi. 4:12; Afi. 2:9, 11.

UDINDU WO KHRISTU WAKUPASKIKA

² Kuŵanaŵaniya udindu wo Khristu wakupaskika ndi Chiuta, kutitiwovya kuziŵa kuti usazgapu vinandi. Yesu wateŵete nge Wakuwombo ŵanthu, Wasembi Mura, Mutu wa mpingu wachikhristu ndipuso ndi Fumu ya Ufumu waku Chiuta. Kulunguruka pa maudindu ngenanga, kutitiwovya kuwonga vo Chiuta wakuchita ndipuso kuti timuyanjengi ukongwa Khristu Yesu. Bayibolu likonkhoska maudindu nganyaki ngo Yesu we nangu.

³ Pa nyengu yo Yesu wateŵetiyanga pacharu chapasi, wangulongo kuti kuporote mwaku iyu ŵanthu akuvwiya angayanjika so ndi Chiuta. (Yoha. 14:6) Nge Wakuwombo ŵanthu, iyu wangujipereka nge sembi kuti wawombo ŵanthu anandi. (Mate. 20:28) Mwaviyo, Yesu ntchakuwoniyapu chamampha cha mijalidu yaku Chiuta, kweniso ndiyu Yehova wagwiriskiyengi ntchitu kuti wafiski vo wakhumba kuchitiya ŵanthu. Iyu pe ndiyu wangachitiska kuti tiyanjiki so ndi Chiuta. (Machi. 5:31; 2 Akori. 5:18, 19) Nyifwa yaku Yesu ndipuso kuyuskika kwaki, kwazamuwovya ŵanthu akuvwiya kuti azilonde vitumbiku vambula kumala mu Ufumu waku Chiuta.

⁴ Nge Wasembi Mura, Yesu ‘watitivwiya lisungu pa vinthu vo tinangisa’ kweniso watovya kuti maubudi nga ŵanthu wo atimulondo pacharu chapasi ndipuso akujipatuliya kwaku Chiuta, ngagowokereki. Wakutumika Paulo wangukonkhoska kuti: “Wasembi mura yo te nayu wangaleka cha kutivwiya lisungu pa vinthu vo tinangisa, chifukwa iyu wanguyeseka mu vinthu vosi nge isi, kweni wangubuda cha.” Pavuli paki, Paulo wanguchiska ŵanthu wo ŵe ndi chivwanu mwaku Yesu Khristu kuti ayesesi kuyanjana so ndi Chiuta. Iyu wanguti: “Mwaviyo tiyeni tifiki kumpandu waufumu wa wezi ukulu ndi wanangwa wakulongoro, kuti tilonde lisungu ndi kusaniya wezi ukulu kuti vitiwovyi pa nyengu yakwenere.”—Ahe. 4:14-16; 1 Yoha. 2:2.

⁵ Yesu ndi Mutu wa mpingu wachikhristu. Nge mo venge ndi akusambira ŵaki, nasi mazuŵa nganu tilongozgeka ndi ŵanthu cha. Yesu ndiyu watitilongozga mwakugwiriskiya ntchitu mzimu wakupaturika kweniso aliska amanaamana akwenere. Aliska ŵenaŵa azamumuka mulandu kwaku iyu ndipuso kwa Awiski akuchanya chifukwa cha mo aphwere mbereri. (Ahe. 13:17; 1 Petu. 5:2, 3) Pakukamba vaku Yesu, Yehova wanguti: “Awonani! Ndikumupanga kuja kaboni ku mitundu ya ŵanthu, mulongozgi kweniso wakulamuliya ku mitundu ya ŵanthu.” (Yesa. 55:4) Yesu wangulongo kufiskika kwa uchimi wenuwu po wangukambiya akusambira ŵaki kuti: “Mungadanikanga so kuti alongozgi cha, chifukwa Mulongozgi winu njumoza, Khristu.”—Mate. 23:10.

⁶ Yesu watitiŵanaŵaniya ndipu wakhumbisiska kutiwovya. Mwaviyo, iyu watitidana kuti: “Zani kwaku ini mosi yimwi akulakatuka ndi ntchitu ndipuso akufyoka ndi katundu muzitu, ndipu ini ndazakukusisipuwani. Pingani goli langu ndipu sambirani kwaku ini chifukwa nde wakuzika kweniso wakujiyuyuwa, ndipu mwazamusisipulika. Chifukwa goli langu ndipusu kweniso katundu wangu ndimupepu.” (Mate. 11:28-30) Chifukwa chakuti Yesu Khristu walongozga mpingu wachikhristu mwakuzika ndipuso mu nthowa yo yititisisipuwa, iyu ndi “mliska wamampha” nge mo waliri Yehova Chiuta, Awiski akuchanya.—Yoha. 10:11; Yesa. 40:11.

⁷ Mukalata yakwamba yo Paulo wangulembe Akorinto, wangukonkhoska chigaŵa chinyaki cha udindu waku Yesu Khristu. Iyu wanguti: “Pakuti watenere kulamuliya nge fumu mpaka po Chiuta waŵikiya arwani wosi kusi kwa maphazi ngaki. Kweni asani vinthu vosi vazithereskeke kwaku iyu, Mwana nayu wazakujithereske yija kwaku Mweniyo wakuthereske vinthu vosi kwaku iyu, kuti Chiuta waje vinthu vosi kwaku weyosi.” (1 Akori. 15:25, 28) Yesu wechendazi pacharu chapasi, wenga “mumisili walusu” waku Chiuta chifukwa ndiyu wangwamba kulengeka. (Nthanthi 8:22-31) Wati waza pacharu chapasi, nyengu zosi wachitanga khumbu laku Chiuta. Iyu wangukunthiyapu mayeseru ngakulu ndipu wangugomezgeka kwa Awisi mpaka nyifwa. (Yoha. 4:34; 15:10) Chiuta wangumuyuska kuti waluti kuchanya ndipu wangumuzomereza kuja Fumu ya Ufumu wakuchanya. (Machi. 2:32-36) Chiuta wakupaska Khristu Yesu ntchitu yikulu yakulongozga chigulu cha vakulengeka vauzimu kuti atuzgepu maboma nga ŵanthu ndi vinthu vosi viheni pacharu chapasi. (Nthanthi 2:21, 22; 2 Ate. 1:6-9; Chivu. 19:11-21; 20:1-3) Pakumaliya paki, Ufumu wakuchanya waku Chiuta wo Khristu ndiyu Fumu, ndiwu wija wazamulamuliya pacharu chosi chapasi.—Chivu. 11:15.

MO TINGALONGOLE KUTI TIZIŴA UDINDU WO KHRISTU WAKUPASKIKA

⁸ Yesu Khristu, yo ntchakuwoniyapu chidu, ngwakufikapu. Iyu wakupaskika udindu wakutiphwere. Kuti watiphwere umampha, titenere kulutirizga kuja akugomezgeka kwaku Yehova kweniso kwende limoza ndi gulu laki lo liluta panthazi.

⁹ Akusambira aku Yesu a mu nyengu ya akutumika awuziŵanga umampha udindu wo Chiuta wakupaska Khristu. Kuti alongo venivi, agwiranga ntchitu mwakukoliyana mwakulongozgeka ndi Khristu yo ndi mutu, kweniso avwiyanga ulongozgi waki wo waperekekanga mwakugwiriskiya ntchitu mzimu wakupaturika. (Machi. 15:12-21) Wakutumika Paulo wangukonkhoskapu kuti mpingu wa Akhristu akusankhika ŵenaŵa ngwakukoliyana. Iyu wangulemba kuti: “Mwakukamba uneneska, tiyeni tosi tikuwi mwa chanju mu vinthu vosi mwakukoliyana ndi Khristu yo ndi mutu. Mwaku iyu, liŵavu losi likoliyana pamoza ndipu ligwira ntchitu mwakukoliyana kuporote mu chiŵalu chechosi cho chigwira ntchitu yo yikhumbika. Asani chiŵalu chechosi chigwira umampha ntchitu, vitovya kuti liŵavu likuwi lichijizenga lija mu chanju.”—Aefe. 4:15, 16.

¹⁰ Asani weyosi mu mpingu wakoliyana ndi anyaki kweniso weyosi wachita vinthu mwakulongozgeka ndi Khristu yo ndi mutu, mpingu ukuwa kweniso uja ndi chanju cho “chitovya kuti ŵanthu akoliyanengi ukongwa.”—Yoha. 10:16; Ako. 3:14; 1 Akori. 12:14-26.

¹¹ Vinthu vo vichitika pacharu vo vifiska uchimi wa m’Bayibolu, vilongo kuti Yesu Khristu wakupaskika mazaza kuti wayambi kulamuliya mu 1914. Sonu walamuliya pakati pa arwani ŵaki. (Sali. 2:1-12; 110:1, 2) Kumbi venivi vitiŵakwaska wuli ŵanthu wo aja pacharu chapasi? Pambula kuswera yapa, po Yesu waperekengi cheruzgu chaku Chiuta kwa arwani ŵaki, walongongi kuti iyu ndi Fumu ya mafumu kweniso Mbuya wa ambuya. (Chivu. 11:15; 12:10; 19:16) Pavuli paki, vo Yehova wangulayizga pa nyengu yo ŵanthu akwamba angugaruka kuti wazamutaska ŵanthu, vazamufiskikiya ŵanthu wo atanjika ndi Khristu wo azamuja kujanja laki lamaryi. (Mate. 25:34) Te akukondwa ukongwa chifukwa chakuti tiziŵa udindu wo Chiuta wakupaska Khristu! Tiyeni tilutirizgi kukoliyana kuti tifiski ntchitu yakupharazga yo yichitika pacharu chosi chapasi mwakulongozgeka ndi Khristu mazuŵa nganu ngakumaliya.