MUSAMBIZENGI ŴANTHU KUTI AJE AKUSAMBIRA
SAMBIRU 12
Mujengi ndi Chiganga
Fundu ya mu Bayibolu: “Mafuta kweniso vinthu vakununkhira, vichitiska kuti mtima ukondwi; Ndimu ulili so ubwezi wamampha wakutuliya pa ulongozgi wo waperekeka kutuliya pasi pa mtima.”—Nthanthi 27:9.
Vo Yesu Wanguchita
1. Woneriyani VIDIYO, pamwenga ŵerengani Mariko 10:17-22. Pavuli paki ŵanaŵaniyani mafumbu yanga:
Kumbi ndi mijalidu yamampha niyi yo Yesu wanguwona mu wakulamuliya wachinyamata mwenuyu?
Ntchifukwa wuli Yesu wakhumbikanga kulongo chanju kweniso chiganga kuti wapereki ulongozgi ku munthu mwenuyu?
Kumbi Tisambiranji Kwaku Yesu?
2. Tikhumbika kulongoro nawu mwachanju ŵanthu wo tisambira nawu kweniso kuŵakonkhoske mwambula kubisa vo atenere kuchita kuti alutirizgi kundere pafupi ndi Yehova.
Muyezgengi Yesu
3. Muwovyengi wakusambira winu kuja ndi vilatu kweniso kuvifiska.
Gwiriskiyani ntchitu kachigaŵa kakuti “Vo Mungachita” ko ke pasambiru lelosi mu buku la Kondwani ndi Umoyu Kwamuyaya!
Wovyani wakusambira winu kuziŵa vo watenere kuchita kuti wafiski vilatu vaki chinanga vingaŵa va nyengu yimanavi pamwenga va nyengu yitali.
Mumuwongengi kaŵikaŵi asani waluta panthazi mwauzimu.
4. Muziŵengi vinthu vo vitondekesa wakusambira winu kuluta panthazi, ndipu mumuwovyengi kuziŵa vo wangachita kuti wamalani navu.
Jifumbeni kuti:
‘Asani wakusambira wangu waluta panthazi cha kuti wabatiziki, ntchinthu wuli cho chitimutondekesa?’
‘Kumbi ndingachita wuli kuti ndimuwovyi?’
Pemphani Yehova kuti wakupaskeni chiganga kuti mukambiskani nayu mwachanju kweniso mwambula kubisa vo wakhumbika kuchita.
5. Mulekengi kusambira ndi munthu yo waluta panthazi cha.
Kuti musimikizi asani munthu yo musambira nayu waluta panthazi mungajifumba kuti:
‘Kumbi wakusambira wangu wagwiriskiya ntchitu fundu zo wasambira?’
‘Kumbi wawungana kweniso kukambiyaku anyaki vo wasambira?’
‘Pavuli pakuti mwasambirapu nayu kwakanyengu, kumbi wakhumbisiska kuja yumoza wa Akaboni aku Yehova?’
Asani wakhumba cha kuluta panthazi:
Mufumbeni cho chitimutondekesa.
Mwachanju mukambiyeni chifukwa cho mukhumba kuleke kusambira nayu.
Mukambiyeni vo wakhumbika kuchita asani wakhumba kuti muziyambi so kusambira nayu.