5 Kumbi Tingapemphera Nyengu Wuli Ndipuso Pamalu Nanga?

TIKAYIKA cha kuti mukuwona kuti visopa vinandi vizenga vinyumba vikuluvikulu vakupempheriyamu ndipuso vijalikiska nyengu yo ŵanthu angapemphere pa zuŵa. Kumbi Bayibolu likupereka nyengu kweniso malu ngo tingapemphere?

Mbuneneska kuti Bayibolu lilongo kuti pe nyengu zo tikhumbika kupemphera. Mwakuyeruzgiyapu, nyengu yinyaki Yesu wechendaryi chakurya limoza ndi akusambira ŵaki, wanguwonga dankha Chiuta mu pempheru. (Luka 22:17) Kweniso akusambira ŵaki apempheranga asani awungana pamoza kuti asopi. Venivi ndivuso vachitikanga kwamba kali mumasinagongi nga Ayuda kweniso munyumba yakusopiyamu ku Yerusalemu. Chiuta wakhumbanga kuti nyumba yakusopiyamu yije “nyumba yakupempheriyamu ŵanthu amitundu yosi.”—Mariko 11:17.

Asani ateŵeti aku Chiuta awungana pamoza ndipu apemphera kwaku Chiuta, pempheru lawu lituŵa lanthazi ukongwa. Asani ŵanthu wo awungana pamoza mbakukoliyana ndipu pempheru lawu lo munthu yo waŵamiya wapereka likoliyana ndi fundu za mu Malemba, Chiuta wakondwa. Pempheru laviyo lingamuchitiska kuti wachiti vinthu vo panyaki watingi wachitengi cha. (Aheberi 13:18, 19) Akaboni aku Yehova apemphera nyengu zosi mumalu ngo awungana. Mwe akulondereka mu Nyumba ya Ufumu yeyosi yakufupi ndi ko muja kuti muzivwisiyi mapempheru ngenanga.

Chinanga kuti veviyo, Bayibolu lilongo kuti tingapemphera nyengu yeyosi kweniso kwekosi. Ndipu mu Bayibolu mwe nkhani za ateŵeti aku Chiuta wo apempheranga pa nyengu ndi malu ngakupambanapambana. Yesu wangukamba kuti: “Yiwi asani ukhumba kupemphera, sere muchipinda chakuwija, jala chisasa ndipu pemphera kwa Awusu wo aja kwambula kuwoneka. Ndipu Awusu wo awona vakuseri azakukutumbika.”—Mateyu 6:6.

Kumbi venivi vakukondwesa cha? Mungalongoro ndi Fumu ya chilengedu chosi nyengu yeyosi, kweniso chinanga mungaŵa kwaku mwija ndipu iyu wakuvwisiyeningi. Mwaviyo tizizwa cha kuti kanandi Yesu wayanjanga kuluta kwaku yija kuchipemphera. Nyengu yinyaki wangupemphera usiku wosi kwaku Chiuta. Viwoneka kuti pa nyengu yeniyi wapenjanga kuti Chiuta wamuwovyi kusankha chakuchita pa nkhani yinyaki yakukhumbika ukongwa.—Luka 6:12, 13.

Bayibolu lizumbuwa anthulumi ndipuso anthukazi anyaki wo angupemphera ŵati akumana ndi masuzgu ngakulu. Nyengu zinyaki yiwu apempheranga chamumtima pamwenga mwakutuzga mazu; apempheranga pakuŵija pamwenga limoza ndi ŵanthu anyaki. Kaya anguchita wuli, kweni chakukhumbika ukongwa ntchakuti apempheranga. Chiuta wapempha ateŵeti ŵaki kuti: “Mupempherengi nyengu zosi.” (1 Atesalonika 5:17) Nyengu yeyosi iyu ngwakunozgeka kuvwisiya mapempheru nga ŵanthu wo achita khumbu laki. Kumbi venivi vakuchiska cha?

Kweni mungazomereza kuti mazuŵa nganu ŵanthu anandi akayikiya kuti pempheru ndakovya nadi. Namwi mungajifumba kuti, ‘Kumbi ini lingandiwovya nadi?’