NDERENI KUFUPI NDI CHIUTA

Mijalidu Yaki ‘Yambula Kuwoneka Yiwoneke Limu’

Kumbi mugomezga kuti kwe Chiuta? Asani ndi viyo, kumbi mungalongo ukaboni wakuti waliku? Kukamba uneneska, pe vinthu vinandi vo vilongo kuti kwe Mulengi yo ngwazeru, ngwanthazi ndipuso ngwachanju. Kumbi ukaboni wenuwu ndi nuwu, nanga pe chifukwa chakuwugomezge? Kuti musaniyi kwamuka, ŵanaŵaniyani mazu ngo wakutumika Paulo wangulemba mukalata yaki yakuluta ku Akhristu a ku Roma.

Iyu wangukamba kuti: ‘Kutuwa ku ulengi wa charu [mijalidu yaku Chiuta] yambura kuwoneka . . . nthazi yaki yamuyaya ndi so uChiuta waki, viwoneke limu, pakuteskeka mu machitidu ngaki, viyo yaŵa ŵanthu mbambula mphandira.’ (Ŵaroma 1:20) Nge mo Paulo wakukonkhoske, Mulengi widu wakusiya ukaboni pa vinthu vo wakulenga. Tiyeni tikambiskani vo Paulo wakukamba.

Paulo, wakukamba kuti mijalidu yaku Chiuta yikwamba kuwoneke “kutuwa ku ulengi wa charu.” Pa lemba ili, mazu nga Chigiriki ngo akufwatuliya kuti “charu,” ngamiya Charu chayichu cha kweni ngamiya ŵanthu.a Mwaviyo, Paulo wang’anamuwa kuti kutuliya po ŵanthu akulengeke, akwamba kuwona ukaboni wa mijalidu ya Mulengi kutuliya mu vinthu vo wakulenga.

Ukaboni wenuwu we peposi ndipu ubisika cha m’chilengedu kweni ‘uwoneke limu.’ Kwambiya vinthu vikuluvikulu mpaka timanatimana, chilengedu chilongole limu kuti kwe Mulengi ndipuso kuti we ndi mijalidu yamampha ukongwa. Mo vinthu vikupangikiya mwalusu m’chilengedu, vilongo kuti Chiuta ngwazeru. Kumbi nyenyezi ndi kupoma kwa mayiŵa, vilongo cha kuti Mulengi we ndi nthazi? Kumbi vakurya vakunowa vakupambanapambana ndi kutowa kwa lumwi asani lituwa ndipuso lisere, vilongo cha kuti Chiuta watanja ŵanthu wosi?—Sumu 104:24; Yesaya 40:26.

Kukamba uneneska ukaboni uwoneke limu! Ivi vilongo kuti, wosi wo aleka kuzomerezga ukaboni wenuwu ndipu akamba kuti Chiuta kulivi, “mbambula mphandira.” Munthu munyaki wakusambira ukongwa wanguyeruzgiya kuti: Ŵanaŵaniyani kuti mumsewu aŵikamu chikwangwani cho alembapu kuti: “Kunthazi Anozgaku Musewu, Mukhwete ku Mazge.” Kweni dilayiva watoliyaku kanthu cha ndipu walutiriya. Mupolisi watimumika ndipu watimukambiya kuti walipiri. Dilayiva yo wakamba kuti wanguchiwona cha chikwangwani. Vo wakamba vambula kuvwika chifukwa chikwangwani cho chiwoneke limu ndipu dilayiva yo watama masu cha kuti watondeka kuwona. Kusazgiyapu pa venivi, ndi udindu waki kuwona vikwangwani va mumsewu ndi kuvwiya vo valembeka. Ndimu so viliri ndi ukaboni wo usanirika m’chilengedu, wo ulongo kuti Chiuta waliku. Tingakamba kuti, “chikwangwani” cha ukaboni chiwoneke limu. Ndisi akwenere kuwona ukaboni wenuwu chifukwa tikulengeka ndi zeru ndipu palivi chifukwa chakuwukaniya.

Kukamba uneneska, chilengedu che ndi vinthu vinandi vo vilongo kuti Mulengi waliku. Pe so buku lo likonkhoska vinandi vaku iyu, buku lenili ndi Bayibolo. Asani tingaliŵerenga, tingasaniya kwamuka kwa fumbu lakukhumbika ili: Kumbi Chiuta wakhumba kuchitanji nachu charu chapasi, nanga ŵanthu wo ŵe pacharu chapasi wazakuŵachitiyanji? Asani tingaziŵa kwamuka kwa fumbu lenili, vitiwovyengi kuti tindere pafupi ndi Chiuta yo ‘[mijalidu yaki] yambula kuwoneka yiwoneke limu’ m’charu chosi.

Machaputala ngo Mungaŵerenga

Ŵaroma chaputala 1 mpaka 16

[Mazu ngam’mphata]

[Fundo yo yakonkhoskeka papeji 31]

Mulengi widu wakusiya ukaboni pa vinthu vo wakulenga