‘Mwe Aŵanda Aku Yehova’

1. Kumbi uŵanda wo wazumbulika pa Ŵaroma 6:22 upambana wuli ndi uŵanda wo ŵanthu aŵanaŵana?

UŴANDA wachikhristu upambana ukongwa ndi mo ŵanthu aŵanaŵaniya asani avwa mazu ngakuti uŵanda. Yiwu aŵanaŵana kuti muŵanda ndi munthu yo wawusika mwankhaza ndipuso atimuchitiya vinthu mwambula urunji. Kweni Mazu ngaku Chiuta, ngakamba za uŵanda wo munthu wachita kujipereka ku Mbuya wachanju. Po wakutumika Paulo wakambiyanga Akhristu akwambiriya kuti ‘aŵi aŵanda kwaku Chiuta,’ waŵachiskanga kuti atenere kujipereka kuti ateŵete Chiuta chifukwa chakumuyanja. (Ŵar. 6:22) Kumbi uŵanda wenuwu usazgapu vinthu wuli? Kumbi tingachita wuli kuti tileki kuja aŵanda aku Satana kweniso charu chaki? Nanga ndi vitumbiku wuli vo tingasaniya asani titeŵete mwakugomezgeka nge aŵanda aku Yehova?

“NDITANJA MBUYA WANGU”

2. (a) Nchifukwa wuli aŵanda anyaki achiheberi akananga kuti afwatuliki? (b) Nchifukwa wuli muŵanda yo wakhumbanga cha kufwatulika amutolonga gutu?

² Kutuliya m’Marangu ngo Chiuta wangupaska Ayisraele, tisambiramu uŵanda wo Yehova wakhumba kuti tije. Muŵanda wachiheberi wafwatulikanga pavuli pakuteŵete nge muŵanda kwa vyaka 7. (Chit. 21:2) Kweni asani muŵanda yo watanja nadi mbuyaki ndipu wakhumbisiska kumuteŵete, Yehova wangupereka dangu lakuti wakhoza kulutirizga kuja ndi mbuyaki. Mbuyaki wamumikanga pachisasa ndipu wamutolonga gutu ndi chitungu. (Chit. 21:5, 6) Penga chifukwa cho amutoloriyanga gutu. Iyu wakhumbikanga kulutirizga kuvwiya pakuteŵete mbuyaki. Ivi vititiwovya kuziŵa kuti tivwiya ndi mtima wosi chifukwa chakuti tikujipatuliya kwaku Yehova kweniso titimuyanja.

3. Nchifukwa wuli titijipatuliya kwaku Chiuta?

³ Techendabatiziki, tingusankha kuti titeŵetiyengi Yehova kweniso tijengi aŵanda ŵaki. Tikujipatuliya chifukwa chakuti tikhumbisiska kumuvwiya ndi kuchita khumbu laki. Palivi yo wangutichichizga. Chinanga mbampupuka nawu asankha kubatizika kuti akondwesi apapi ŵawu cha kweni akhumba ŵija pavuli pakuti ajipatuliya kwaku Yehova. Akhristu atijipatuliya chifukwa chakuti atanja Yehova, Mbuyafwi wakuchanya. Wakutumika Yohane wakukamba kuti, kwanja Chiuta kung’anamuwa ‘kusunga marangu ngaki.’—1 Yoh. 5:3.

TECHE AŴANDA CHINANGA KUTI TIKUFWATULIKA

4. Nchinthu wuli cho tikhumbika kuchita kuti tije “aŵanda ku urunji”?

⁴ Titimuwonga ukongwa Yehova chifukwa chakunozga nthowa kuti tije aŵanda ŵaki. Chigomezgu cho te nachu mu sembi ya uwombozi yaku Khristu, chititiwovya kuti tifwatuki mu goli la ubudi. Chinanga kuti teche ambula kufikapu, tikhumbisiska kulongozgeka ndi Yehova kweniso Yesu. Wakutumika Paulo wangukonkhoska mwakuvwika umampha kuti: “Mujipimi ŵakufwa kuchiri ku ulakwi, kweni ŵamoyu kuchiri kwaku Chiuta mwaku Khristu Yesu.” Ndipu wangutcheŵeska kuti: ‘Asi muziŵa kuti kwaku mweniyo mutijiperekaku nge mbaŵanda kwachimuvwiya, mwe ŵaŵanda kwaku yo mutimuvwiya, [kaya muvwiyengi ubudi wo ulongozge ku nyifwa, NW] pamwenga ŵakuvwiya ku urunji? Kweni wawongeki Chiuta, kuti chingana mwaŵanga ŵaŵanda ŵa ulakwi, ndikweni munguvwiya mumtima kasambizidu ko kakuperekeka kwaku imwi; ndipu pakufwatulika ku ulakwi, munguŵa aŵanda ku urunji.’ (Ŵar. 6:11, 16-18) Wonani kuti wakutumika Paulo wakamba za ‘kuvwiya kwakutuliya m’mtima.’ Mbuneneska nadi kuti kujipatuliya kwidu kwaku Yehova, kutitiwovya kuti tije “aŵanda ku urunji.”

5. Nchinthu wuli cho tosi tilimbana nachu mukati mwidu, nanga nchifukwa wuli?

⁵ Chinanga kuti ve viyo, pe vinthu vo tikhumbika kulimbana navu kuti tilutirizgi kulongo kuti tikujipatuliya. Pe vinthu viŵi vo tilimbana navu. Chakwamba, ndi suzgu yo Paulo wangulimbana nayu. Iyu wangukamba kuti: “Chifukwa muchilanguru chaku Chiuta ndikondwere kwakulingana ndi munthu yo wamukati, kweni mu viŵaru vangu ndithoŵa dangu lamwenga, lakurwiya pa chilanguru cho cha vinjeru vangu, ndi lakundikole mukoli ku dangu lo la ulakwi, lo le mu viŵaru vangu.” (Ŵar. 7:22, 23) Nasi tisuzgika ndi kuleka kufikapu ko tikuhara. Mwaviyo, tilutirizga kulimbana ndi vo liŵavu lidu likhumba. Wakutumika Petro watitichiska kuti: “Jani nge mbanangwa, kweni ŵakuchitiya ndi wanangwa winu uli nchivwinkhu cha uheni cha, kweni uli mbaŵanda ŵaku Chiuta.”—1 Pet. 2:16.

6, 7. Kumbi Satana wachitiska wuli kuti charu chiwonekengi chakukopa?

⁶ Chinthu chachiŵi cho tilimbana nachu, ndi charu cho chiwusika ndi mademoni. Satana, yo wawusa charu, waponya mivi yaki kwaku isi kuti tileki kuja akugomezgeka kwaku Yehova ndi Yesu. Iyu wapenja kuti tije aŵanda ŵaki mwakutiyesa kuti tichitengi vinthu viheni vo iyu wakhumba. (Ŵerengani Ŵaefesu 6:11, 12.) Nthowa yimoza yo Satana wagwiriskiya nchitu, njakuti wachitiska charu chaki kuti chiwonekengi chakutowa ndipuso chakukopa. Wakutumika Yohane wakutcheŵeska kuti, “Asani munthu watanja charu cho, kuti chanju cho cha Ada che mwaki cha. Pakuti chosi cha m’charu chilakalaka cha nyama [liŵavu], ndi chilakalaka cha masu, ndi chitumbwa cho cha umoyu, kuti nchakutuliya ku Ada cha, kweni nchaku charu cho.”—1 Yoh. 2:15, 16.

⁷ Kukhumba kukhupuka kwawanda m’charu ichi. Satana wachitiska kuti ŵanthu agomezgengi kuti ndalama zizisa likondwa. Masitolu ngapachanya nge peposi. Kusaska malonda, kuchitiska kuti ŵanthu akhumbengi kuja ndi katundu munandi kweniso ayanjengi vakukondwesa. Makampani nganandi ngachitiska maphara kuti ŵanthu asaniyengi ndalama pamwenga vinthu vakudula. Kukamba uneneska, kwekosi ko tingaja tichiskika kusintha umoyu widu kuti tichitengi nge mo charu chikhumbiya.

8, 9. Kumbi ndi ngozi wuli yo yiŵapu asani munthu watanja vinthu vakuliŵavu, nanga nchifukwa wuli?

⁸ Pakukamba za Akhristu wo achitanga va charu mu nyengu ya akutumika, Petro wangutcheŵeska kuti: “Apima ujira wamsana uli ndi likondwa, akufipa ndi amidoko, akulakwa mu fuzi zawu achirya pamoza namwi! Chifukwa pakukamba va umbuwuya, anyengere mu maulakalaka nga liŵavu, mu mauyaya, ŵeniwo afwanthamuka pamanavi ku ŵakujariya mu urandizi; apangana nawu wanangwa, penipo yiwu ŵeneku mbaŵanda ŵa malusu ngakubwanganduwa. Pakuti ndi chenicho munthu wathereskeka, kwaku chenicho watoleke mu uŵanda.”—2 Pet. 2:13, 18, 19.

⁹ Munthu yo wafiska “chilakalaka cha masu” ndikuti wakufwatulika cha. M’malu mwaki waja muŵanda wa mbuya wa charu ichi, wambula kuwoneka, Satana Diabolo. (1 Yoh. 5:19) Ndi ngozi yikulu ukongwa kuja muŵanda wa vinthu vakuliŵavu chifukwa kuja kwakusuzga kufwatukaku.

NCHITU YO YINGATIWOVYA

10, 11. Kumbi mbayani wo Satana watesesa kulandizga mazuŵa nganu, nanga masambiru nga charu ngangaŵatimbanyizga wuli?

¹⁰ Nge mo wanguchitiya mu Edene, Satana mazuŵa nganu walimbana ndi ŵanthu wo aziŵa vinandi cha. Satana watesesa kulandizga ampupuka. Iyu wakondwa cha asani wawona ampupuka pamwenga munthu weyosi kuti watijipereka kuja muŵanda waku Yehova. Murwani waku Chiuta wakhumba kuti ŵanthu wosi wo atijipatuliya kwaku Yehova, aleki kulutirizga kujipereka ndipuso kuja akugomezgeka.

¹¹ Tiyeni tiwere so ku chakuwoniyapu cha muŵanda yo wazomeranga kuti amutolo gutu. Muŵanda mwenuyu watenere kuti wavwanga urwirwi kwa nyengu yimanavi ndipu wajanga ndi chisimikizgu cho chalongonga kuti walutirizgengi kuja muŵanda. Mwakuyanana ŵaka, nchinthu chakusuzga ndipuso chakupweteka asani wampupuka wasankha kuchita vinthu mwakupambana ndi ampupuka anyaki. Satana wachitiska ŵanthu kuŵanaŵana kuti kugwira nchitu m’charu ichi kungaŵawovya kuja ndi likondwa kweni Akhristu atenere kukumbuka kuti chinthu chakukhumbika ukongwa, nkhuteŵete Chiuta. Yesu wangusambiza kuti: “Mbakutumbikika ŵasauchi mu mzimu.” (Mat. 5:3) Akhristu akujipatuliya achita khumbu laku Satana cha kweni laku Chiuta. Yiwu akondwa ndi dangu laku Yehova ndipu alunguruka musana ndi usiku. (Ŵerengani Sumu 1:1-3.) Mazuŵa nganu masambiru nganandi ngapereka mpata cha ku ateŵeti aku Yehova kuti alungurukengi ndi kuchita vo vingaŵawovya kuti alutirizgi kumuteŵete.

12. Kumbi ampupuka anandi akhumbika kusankhanji mazuŵa nganu?

¹² Mbuya wa charu ichi wangachitiska muŵanda wachikhristu kusuzgika. Mukalata yaki yakwamba yo wangulembe Ŵakorinte, Paulo wangufumba kuti: “Mungudanika kumbi pakuŵa muŵanda?” Iyu wanguŵalunguchizga kuti: ‘Ungaphweriyangaku ndi ichi cha. Asani napu ungaŵa mwanangwa, yipu ukoreske wanangwa wo.’ (1 Ŵakor. 7:21) Kali ŵanthu achitanga kusankha kufwatulika. Mazuŵa nganu, m’vyaru vinandi mwe dangu lakuti ŵana akengi kusukulu asani afika vyaka vo vikhumbika. Pavuli paki, atiŵapaska mwaŵi wakuti asankhi kulutirizga masambiru pamwenga cha. Kweni kulutirizga masambiru ndi chilatu chakuti munthu wasaniyi nchitu yamampha m’charu ichi, kungamutimbanyizga kuchita uteŵeti wa nyengu zosi.—Ŵerengani 1 Ŵakorinte 7:23.

SANKHANI MASAMBIRU NGAMAMPHA UKONGWA

13. Kumbi ndi masambiru wuli ngo ngangayanduliska ukongwa ateŵeti aku Yehova?

¹³ Paulo wangutcheŵeska Akhristu aku Ŵakolose kuti: “Thoŵani vinu munthu wangamuskoŵani mu zeru ndi fuzi yaŵakaŵaka, uli ndi mdawuku wa ŵanthu, uli ndi vamtendeku va mizimu ya charu, ndipu uli nkhwakuyana ndi Khristu cha.” (Ŵakol. 2:8) “Zeru ndi fuzi yaŵakaŵaka, uli ndi mdawuku wa ŵanthu,” vawanda ukongwa m’charu ichi chifukwa cha vo ŵanthu anandi azeru asambiza. Masambiru ngapachanya ngo ngasazgapu vinthu venivi, kanandi ngachitiska kuti wo amaliza masambiru ngenanga aje ndi malusu ngamanavi pamwenga aleki kuja ndi malusu ngo ngangaŵawovya. Venivi vichitiska kuti atondeki kumalana ndi masuzgu pa umoyu wawu chifukwa chakuti akunozgeke cha. Mwakupambana ndi venivi, ateŵeti aku Yehova asankha masambiru ngo ngatiŵawovya kuja ndi malusu ngakukhumbika kuti alutirizgi kuja umoyu wambula kukhumba vinandi pakuteŵete Chiuta. Yiwu agwiriskiya nchitu ulongozgi wo Paulo wangukambiya Timote wakuti: “Kujipereka kwaku Chiuta ndipuso kukhorweskeka ndi vinthu vo we navu, nchandulu chikulu ukongwa. Mwaviyo, tikhorwengi ndi chakurya kweniso vakuvwara vo tenavu.” (1 Tim. 6:6, 8, NW) M’malu mwakuja ndi masambiru ngapachanya ndipuso mazina nga ulemu m’charu ichi, Akhristu auneneska aŵika mtima wawu wosi pa nchitu yakupharazga kuti awovyi ŵanthu kuja akusambira aku Khristu.—Ŵerengani 2 Ŵakorinte 3:1-3.

14. Kumbi Paulo wanguwona wuli udindu wakuteŵete Chiuta ndi Khristu mwakukoliyana ndi Ŵafilipi 3:8?

¹⁴ Ŵanaŵaniyani nkhani yaku Paulo. Iyu wangusambizika ndi Gamaliele yo wasambizanga Marangu nga Chiyuda. Vo Paulo wangusambira vingayanana ŵaka ndi masambiru nga kuyunivesite nga mazuŵa nganu. Kumbi Paulo wangungawona wuli masambiru ngenanga wati wangayeruzgiya ndi udindu wo wenga nawu wakuteŵete Chiuta ndipuso Khristu? Iyu wangulemba kuti: “Ndapima vosi kuŵa chitayiku chifukwa cha mziŵiru wakuzungura pakumuthoŵa Khristu Yesu Ambuyangu.” Ndipu wangulutirizga kukamba kuti: “Chifukwa chaku iyu ndataya, vosi, ndipu nditiviyesa mitawi [va kuchiza] alinga kuti ndiyanduwi Khristu.” (Ŵaf. 3:8) Fundu yeniyi yitovya Akhristu ampupuka kweniso apapi ŵawu wo atopa Chiuta, kusankha vinthu mwazeru pa nkhani ya masambiru. (Wonani vithuzi.)

YANDUWANI NDI MASAMBIRU NGAMAMPHA UKONGWA

15, 16. Kumbi ndi masambiru wuli ngo gulu laku Yehova lipereka, nanga chilatu chikulu cha masambiru ngenanga nchinthu wuli?

¹⁵ Kumbi vinthu vija wuli m’masukulu nganandi ngapachanya nga m’charu ichi? Kumasukulu ngenanga, ŵana achita uhuli, atumwa moŵa ukongwa ndipuso asambira kuti vinthu vamoyu vikuchita kusambuka. (Ŵaef. 2:2) Mwakupambana ndi venivi, gulu laku Yehova lisambiza vinthu vamampha ukongwa ndipu lisambiziya mu mpingu wachikhristu ngo ndi malu nga chimangu. Tosi te ndi mwaŵi wakuyanduwa ndi Sukulu ya Uteŵeti Waku Chiuta, yo yichitika sabata yeyosi. Pe masambiru ngapade nga abali ambula kuto wo mbapayiniya (Sukulu ya Abali Ambula Kuto Yakusambiza Bayibolo) kweniso Akhristu akutorana wo achita upayiniya (Sukulu ya Akhristu Akutorana Yakusambiza Bayibolo). Masambiru ngenanga ngatitiwovya kuvwiya Yehova, Ambuyafwi akuchanya.

¹⁶ Tingaziŵa vinandi vakukwaskana ndi Yehova asani tingafufuza m’mabuku ngo nge pa layibulale yidu yo ye pa Intaneti. Chilatu chikulu cha masambiru ngenanga, nkhusopa Yehova. Ngatitisambiza mo tingawovye ŵanthu kuti ayanjani so ndi Chiuta. (2 Ŵakor. 5:20) Ivi vitovya kuti pavuli paki, nawu azisambizi anyawu.—2 Tim. 2:2.

VITUMBIKU VA MUŴANDA

17. Kumbi kusankha masambiru ngamampha ukongwa kuzisa vitumbiku wuli?

¹⁷ Mu ntharika yaku Yesu ya matalente, mbuyawu wanguwonga aŵanda ŵaŵi akugomezgeka ndipu wanguŵapaska nchitu yinyaki kulongo kuti wangukondweseka nawu. (Ŵerengani Mateyu 25:21, 23.) Mwakuyanana ŵaka, kusankha masambiru ngamampha ukongwa kuzisa likondwa ndi vitumbiku. Ŵanaŵaniyani chakuwoniyapu chaku Michael. Iyu wangukwera mayesu ndipu asambizi ŵaki angukambiskana nayu kuti waluti ku yunivesite. Yiwu anguzizwa chifukwa chakuti Michael wangukana ndipu wangusankha masambiru nga nyengu yimanavi nga nchitu za manja ndi chilatu chakuti wachichita upayiniya wa nyengu zosi, wazisaniyengi ndalama zakuti zizimuwovyengi. Kumbi watijivwa kuti wakutaya mwaŵi? Iyu wakukamba kuti: “Masambiru ngo ndalonde nge mpayiniya mugulu, ngakuzirwa ukongwa ndipu sonu ndini mura mu mpingu. Vitumbiku ndipuso maudindu ngo nde nangu, viluska ndalama zo ndatingi ndisaniyengi. Ndikondwa ukongwa chifukwa chakuti ndingusankha masambiru ngapachanya cha.”

18. Nchinthu wuli cho chingakuchitiskani kuti musankhi masambiru ngamampha ukongwa?

¹⁸ Masambiru ngamampha ukongwa ngenanga, ngatitiwovya kuziŵa vo Yehova wakhumba kweniso kuti timuteŵete nge aŵanda. Ngatitiwovya so kuti tije ndi chilindizga chakuti ‘tazamufwatulika ku uŵanda wa kuvunda’ ndipuso pakumaliya kuzisaniya “wanangwa wa unkhankhu wa ŵana aku Chiuta.” (Ŵar. 8:21) Kuluska vosi, tisambira mo tingalongole kuti titanja nadi Ambuyafwi akuchanya, Yehova.—Chit. 21:5.