Mphasu Yikulu Ukongwa Yakutuwa Kwaku Chiuta Ntchifukwa Wuli Njakuzirwa?

YO WAKUPEREKA

Mphasu zinyaki titiziwona kuti zakuzirwa chifukwachakuti munthu yo wakutipasa we ndi udindu pamwenga titimutumbika. Asani munthu wa mubanja lidu pamwenga mubwezi widu watipasa mphasu, titiyiwona so kuti njakuzirwa chinanga kuti yingaŵa yakutchipa. Nge mo nkhani yakwamba yakonkhose, ndimu so venge ndi mphasu yo Jordan wangupasika ndi Russell. Kumbi venivi viyanana wuli ndi sembi yaku Yesu yo tikupasika?

Chakwamba, Bayibolu likamba kuti “Chiuta wangutuma Mwana waki wapade m’charu kuti tisaniyi umoyu kuziya mwaku iyu.” (1 Yohane 4:9) Fundu iyi yilongo kuti mphasu yeniyi njakuzirwa ukongwa. Palivi munthu yo we ndi udindu ukulu kuphara Chiuta. Pakukonkhosa zakuYehova, munthu munyaki yo wakulembaku buku la Sumu wangukamba kuti: “Imwi, yo zina linu ndimwi Yehova, imwi pe ndimwi Wapachanya Limu pacharu chosi chapasi.” (Sumu 83:18) Tenga akwenere cha kulonde mphasu kutuliya kwaku Yehova yo we ndi udindu ukulu ukongwa.

Chachiŵi, Chiuta ‘Mbada ŵidu.’ (Yesaya 63:16) Ntchifukwa wuli ve viyo? Iyu wakutipasa umoyu. Ndipuso watitiphwere nge mo da wachanju wachitiya ndi ŵana ŵaki. Nyengu yinyaki Chiuta wachikamba ndi ŵanthu a fuku la Efraimu wanguti: “Kumbi Efraimu ndi mwana wakuzirwa cha kwaku ini? . . . Mtima wangu utimuŵanaŵaniya. Ndipu ini ndimuchitiyengi lisungu.” (Yeremiya 31:20) Ndimu so Chiuta wawone ŵanthu ŵaki mazuŵa nganu. Iyu ndi Mulengi widu wanthazi, Da widu ndipuso Mubwezi widu. Chifukwa cha venivi, tiwona kuti mphasu yeyosi yakutuliya kwaku iyu njakuzirwa ukongwa.

CHIFUKWA CHO YINGUPEREKEKE

Mphasu zinyaki zija zakuzirwa chifukwa chakuti munthu yo wakukupasani, wakuyipereka ndi mtima wosi. Wakuchita venivi chifukwa chakuti watikuyanjani. Munthu yo wapereka ndi mtima wosi wakhaza kuti muzimuweze chinthu chinyaki cha.

Chiuta wakutipasa Mwana waki chifukwa chakuti watitiyanja. Bayibolu likamba kuti: “Mwaku ichi Chiuta wakutilongo chanju, mwakuti . . . wangutuma Mwana waki wapade m’charu.” Ntchifukwa wuli wanguchita viyo? Wanguchita ivi ‘kuti tisaniyi umoyu kuziya mwaku Yesu.’ (1 Yohane 4:9) Kumbi Chiuta wanguchichizgika kuchita venivi? Awa! ‘Sembi yo Khristu Yesu wakupereka kuti watiwombo’ yilongo ‘wezi ukulu’ waku Chiuta.—Ŵaroma 3:24.

Ntchifukwa wuli tikamba kuti mphasu yo Chiuta wakupereka yilongo “wezi waki ukulu”? Bayibolu likamba kuti: “Chiuta wakutilongo chanju chaki mwakuti po tenga akunanga, Khristu wangutifwiya.” (Ŵaroma 5:8) Chifukwa cha chanju, Chiuta wanguchitapu kanthu kuti watiwombo ku ubudi kweniso kuti tije ndi chilindizga. Isi tenga akwenere cha kulongoleka chanju chaviyo ndipuso tingamuweze cha. Chifukwa cha mphasu yo wakupereka, Chiuta wakulongo chanju chikulu ndipu palivi mphasu yinyaki yo yingayanana ndi yeniyi.

VO VINGUCHITIKA KUTI YIPEREKEKI

Mphasu zinyaki zija zakuzirwa chifukwa chakuti munthu yo wangupereka wakhumbikanga kuchita vinthu vinyaki kuti wayipereki. Asani munthu munyaki watipasa chinthu cho chenga chakukhumbika ukongwa kwaku iyu, titichiwona kuti ndi mphasu yakuzirwa ukongwa chifukwa wachipereka ndi mtima wosi.

Chiuta “wangupereka Mwana waki wapade.” (Yohane 3:16) Iyu watingi watipasengi munthu munyaki m’malu mwa mwana waki yo wamuyanjanga ukongwa. Panyengu yo Yehova walenganga vinthu vosi, Yesu wamuwovyanga ndipu Chiuta ‘wakondwanga nayu ukongwa.’ (Nthanthi 8:30) Yesu ndi ‘Mwana wakwanjiwa’ waku Chiuta kweniso ‘ntchikozgu chaku Chiuta wambula kuwoneka.’ (Ŵakolose 1:13-15) Yiwu akoliyana ukongwa.

Chinanga kuti ve viyo, Chiuta ‘wakutinola cha Mwana waki.’ (Ŵaroma 8:32) Yehova wakutipasa mphasu yamampha ukongwa. Palivi so chinthu chinyaki cho chingayanana ndi mphasu yeniyi.

KUWOVYA PA NYENGU YAKUKHUMBIKA UKONGWA

Mphasu zinyaki zija zakuzirwa chifukwa chakuti chija chinthu cho munthu wakhumbikanga ukongwa. Yeruzgiyani kuti mwatama ukongwa ndipu mwe kuchipatala kweni mulivi ndalama zakuti mulipiri kuti akupaseni munkhwala wo ungakuwovyani kuti muchiri. Pavuli paki, munthu munyaki wajipereka kuti wakulipiliyeni. Mwambula kukayika, mungamuwonga ukongwa ndipu mphasu yo yijengi yakuzirwa pa umoyu winu.

“Nge mo viliri kuti kuziya mwaku Adamu wosi atufwa, ndimu so viliri kuti kuziya mwaku Khristu wosi azamulonde umoyu.” (1 Ŵakorinte 15:22) Pakuti ndisi ŵana aku Adamu, tosi ‘titufwa’ ndipu palivi yo wangaleka kutama kweniso kufwa. Palivi yo wangawovya anyaki kuti aje so pa ubwezi ndi Chiuta pamwenga kujifwatuwa ku ubudi. Chifukwa chakuti te akubuda palivi yo wangajiwombo kweniso kuwombo munyaki kuti waje ndi “umoyu.” Bayibolu likamba kuti: ‘Palivi yumoza wa ku yiwu yo wangawombo m’bali waki pamwenga kupereka kwaku Chiuta sembi yakuwombole umoyu waki . . . palivi yo wangafiska kuchita venivi.’ (Sumu 49:7, 8) Tosi tikhumbikiya sembi yeniyi chifukwa chakuti palivi munthu yo wangawombo munyaki. Asani Chiuta wanguleka kupereka mphasu yeniyi, tatingi tisuzgikengi ukongwa.

Chifukwa chakuti Yehova watitiyanja ukongwa, wakutiwombo kuti kuziya mwaku Yesu ‘weyosi wazilonde umoyu.’ Kumbi Yehova wakutiwombo wuli kuziya mu sembi yeniyi? ‘Ndopa za Mwana waki zitititowesa ku maubudi ngosi.’ Kuja ndi chivwanu mu sembi yaku Yesu, kutovya kuti maubudi ngidu ngagowokereki kweniso kuti tizisaniyi umoyu wamuyaya. (1 Yohane 1:7; 5:13) Kumbi sembi yeniyi yazakuŵawovya wuli ŵanthu wo akufwa? “Chifukwa chakuti nyifwa yikuza kuziya mwa munthu yumoza, akufwa nawu azamuyuskika kuziya mwa munthu yumoza [Yesu].”—1 Ŵakorinte 15:21.a

Palivi mphasu yo yingayanana ndi sembi yaku Yesu. Ve viyo chifukwa chakuti yikutuwa kwaku Yehova Chiuta yo we ndi udindu ukulu ukongwa kweniso wakuyipereka chifukwa chakuti watitiyanja. Ndi Yehova pe yo wakupereka chinthu cho chenga chamampha ukongwa kwaku iyu.Sembi ndi mphasu yo takhumbikiyanga ukongwa chifukwa yititifwatuwa ku ubudi ndi nyifwa. Kukamba uneneska, palivi mphasu yakuzirwa kuphara sembi yaku Yesu.