Kumbi Mungalongo Wuli Kuti Muwonga Mphasu Yakuzirwa yo Chiuta Wakupereka?

ASANI munthu watipasa mphasu yakuzirwa ukongwa, tikhumbika kumuwonga. Yesu wangulongo fundu yeniyi wati wachizga ŵanthu 10 wo atamanga nthenda yakofya yo yengavi munkhwala. Munthu yumoza pa ŵanthu 10 ŵenaŵa, “wanguwelere ndipu wangukankhuska Chiuta mwakukweza mazu.” Yesu wangufumba kuti: “Asi wo achizgika ŵengapu 10? Nanga anyaki 9 ŵepani?” (Luka 17:12-17) Kumbi tisambiranjipu? Taŵanthu tiswera cha kuluwa vinthu vamampha vo anyidu atichitiya.

Sembi yaku Yesu yiyanana cha ndi mphasu zinyaki zosi. Sembi iyi ndi mphasu yakuzirwa ukongwa. Kumbi mungalongo wuli kuti muwonga vo Chiuta wakukuchitiyani?

• Ziŵani yo wakupereka. Asani munthu wakhumba kuti sembi yaku Yesu yizimuwombo, watenere kuchitapu kanthu. Nyengu yinyaki Yesu wachipemphera, wangukamba kuti: “Azamusaniya umoyu wamuyaya asani aziŵa imwi Chiuta yija wauneneska, ndi Yesu Khristu yo mungumutuma.” (Yohane 17:3) Asani mungaziŵa kuti munthu munyaki wangutaska umoyu winu mweche mwana, kumbi mungayanja kuziŵa vinandi vakukwasana ndi iyu kweniso vo vingumuchitisa kuti wakutaskeni? Yehova Chiuta yo wakupereka sembi ya mwana waki kuti watitaski, wakhumba kuti mumuziŵi kweniso muje nayu pa ubwezi. Bayibolu lititichiska kuti: “Ndereni kufupi ndi Chiuta, ndipu nayu wanderengi kufupi ndi imwi.”—Yakobe 4:8.

• 

  Longoni kuti mwe ndi chivwanu mu sembi yaku Yesu. “Munthu yo wavwana mu Mwana, we ndi umoyu wamuyaya.” (Yohane 3:36) Kumbi kulongo chivwanu kung’anamuwanji? Munthu wakhumbika kulongo ndi vakuchita vaki kuti wavwana mu sembi yaku Yesu. (Yakobe 2:17) Kumbi wakhumbika kuchitanji? Mphasu yo munthu watikupasa yija yaku asani wayizomera kweniso wayilondere. Mwaviyo, mukhumbika kuzomera kweniso kulonde sembi yaku Yesu. Mungachita wuli venivi? Ziŵani vinthu vo Chiuta wakhumba kuti muchitengi ndipu pavuli paki, muchitengi venivo.a Mumupemphengi Chiuta kuti wakugowokiyeni maubudi nginu kweniso kuti wakupaseni njuŵi yamampha. Pakupemphera kwaku Chiuta mujengi ndi chigomezu chosi kuti sembi ya mwana waki, yitovya ŵanthu wo ŵe ndi chivwanu kuti azisaniyi vinthu vamampha kunthazi ndipuso kuti azije mwawanangwa.—Ŵahebere 11:1.

• 

  Musanirikengi pa Mwambu wakukumbukiya nyifwa yaku Yesu. Yesu wakwambisa mwambu wo uchitika chaka chechosi, wo utitikumbusa kukhumbika kwa sembi yaki. Pakukamba za mwambu wenuwu, iyu wanguti: “Muchitengi venivi kuti mundikumbukengi.” (Luka 22:19) Akaboni aku Yehova achitengi mwambu wakukumbukiya nyifwa yaku Yesu pa Chiŵi, 11 April 2017, asani lumwi lasere. Mwambu uwu, ujumpha cha ola limoza, ndipu pazamukambika nkhani yo yazamukonkhosa kukhumbika kwa sembi yaku Yesu. Yazamukonkhosa so mo tipinduliya kweniso mo tazamupinduliya kunthazi ndi sembi yeniyi. Chaka chamala, ŵanthu pafupifupi 20 miliyoni pacharu chosi angusanirikapu pa mwambu uwu. Titikudanani kuti muzisanirikepu kuti tiziwonge limoza Chiuta chifukwa cha mphasu yaki yikulu ukongwa.