Kumbi Mwe Ndi Mungelu yo Watikuvikiliyani?

Bayibolu likambapu cha kuti munthu weyosi we ndi mungelu yo watimuvikiliya. Mbuneneska, kuti nyengu yinyaki Yesu wangukamba kuti: “Wonesesani kuti mungayuyuwanga yumoza wa tiŵana iti cha [akusambira aku Khristu], chifukwa nditikukambiyani kuti angelu ŵawu wo ŵe kuchanya, nyengu zosi alereska chisku cha Ada wo ŵe kuchanya.” (Mateyu 18:10) Kumbi yapa Yesu wang’anamuwanga kuti munthu weyosi we ndi mungelu yo watimuvikiliya? Awa, kweni iyu wang’anamuwanga kuti angelu angawovya Mkhristu weyosi pakuyija. Mwaviyo, Akhristu auneneska achitiya dala cha vinthu vo vingaŵika umoyu wawu pangozi chifukwa chakuŵanaŵana kuti mungelu waku Chiuta waŵavikiliyengi.

Kumbi venivi ving’anamuwa kuti angelu atiŵawovya cha ŵanthu? Awa. (Sumu 91:11) Anyaki aŵanaŵana kuti nyengu yinyaki Chiuta wanguŵavikiliya kweniso wanguŵalongozga mwakugwirisiya ntchitu angelu. Mwakuyeruzgiyapu, Kenneth yo tamuzumbuwa mu nkhani yakwamba njumoza mwa ŵanthu wo awona viyo. Chinanga kuti tingasimikizga cha, kweni wangaŵa kuti waneneska. Akaboni aku Yehova kanandi awona ukaboni wakuti angelu atiŵawovya pa ntchitu yawu yakupharazga. Chifukwa chakuti angelu titiŵawona cha, tingakamba cha mo Chiuta watiŵagwirisiya ntchitu kuti wawovyi munthu weyosi pakuyija. Chinanga kuti ve viyo, tingananga cha kuwonga Wanthazizosi pa vosi vo wachita kuti watiwovyi.—Ŵakolose 3:15; Yakobe 1:17, 18.