Asani Vakusuzga Kukunthiyapu Masuzgu

Mwakuyeruzgiyapu, Sallya wa ku United States yo vinthu vaki vinandi vingunangika ndi chimphepu cha hurricane wangukamba kuti: “Ndawonanga kuti ndingafiska so cha kukunthiyapu masuzgu ngenanga. Ndipu ndingudeluka nthazi.”

Nanga wuli asani munthu yo tamuyanjanga watayika? Kumbi tituvwa wuli? Janice wa ku Australia wangukamba kuti: “Ŵana ŵangu wosi ŵati atayika, venga nge kuti umoyu wangu wasweka tivibanthuvibanthu ndipu ndakhumbikanga kuyesesa kuwunjika tivibanthu tosi teniti kuti uweriyepu so. Ndingupemphera kwaku Chiuta kuti: ‘Ada, masuzgu ngandikuliya, ndingafiska cha kukunthiyapu! Ndizomerezeni kuti ndifwi waka. Ndikhumba so cha kuja ndi umoyu.’”

Daniel nayu wangusuzgika ukongwa maŵanaŵanu muwolu waki wati wamukambiya kuti wachitanga vinthu mwambula kugomezgeka. Iyu wangukamba kuti: “Muwolu wangu wati wasumuwa kuti wachitanga vinthu mwambula kugomezgeka, ndingusuzgika ukongwa maŵanaŵanu. Venga nge kuti andigwaza ndi chimayi pa mtima. Ndipu ndinguvwa urwirwi ukulu ukongwa kwa myezi yinandi.”

Magazini iyi ya Chigongwi Cha Alinda, yikonkhoskengi chifukwa cho tikhumbika kuwone kuti umoyu we ndi phindu chinanga kuti

• Kwachitika masoka ngachilengedu

• Munthu yo mwamuyanjanga watayika

• Yo mukutorana nayu ngwambula kugomezgeka

• Mulimbana ndi matenda ngakulu

• Nkhwakusuzga kukunthiyapu masuzgu

Chakwamba, kumbi tingachita wuli asani kwachitika masoka ngachilengedu?