Asani Mutama Matenda Ngakulu

“A dokotala ŵati andikambiya kuti nde ndi khansa ya m’mapapu ndipuso ya m’matumbu, ndinguŵanaŵana kuti mbwenu kwamala ndifwengi. Kweni ndati ndawere kunyumba, ndingukamba kuti, ‘Chamampha vachitika, ndikhumbika waka kusaniya nthowa zo zingandiwovya kuti ndikunthiyepu masuzgu ngenanga.’”—Linda, wa vyaka 71.

“Ndingutama nthenda yakuŵaŵa ukongwa yo yingukwaska misipi yakumazge kwa chisku changu. Nyengu zinyaki, urwirwi wo ndavwanga wandichitiskanga kuti ndisuzgikengi ukongwa maŵanaŵanu. Ndipu kanandi ndajivwanga kuti nde ndija kweniso ndaŵanaŵananga kuti ndijibayi ŵaka.”—Elise, wa vyaka 49.

Munthulumi yo watama waja pa njinga ya ŵanthu akupunduka ndipu wazungulirika ndi achibali ŵaki

ASANI yimwi pamwenga mubali winu mukutamapu matenda ngakuti mwatingi muchirengi cha, mutenere kuti muziŵa umampha mo venivi vichitiskiya kuti ŵanthu asuzgikengi maŵanaŵanu. Kusazgiyapu yapa, mukhumbika so kulimbana ndi masuzgu nganyaki nge kuguŵa ndipuso kufipa mtima chifukwa cha mo vinthu viliri. Mungachita so mantha kweniso kufipa mtima ukongwa chifukwa cha chovyu cho mwamulonde kuchipatala, kusuzgika kusaniya pamwenga kulipira munkhwala ndipuso chifukwa cha masuzgu nganyaki ngo mukumana nangu asani mwamwa munkhwala unyaki. Kusuzgika maŵanaŵanu chifukwa cha kutama matenda ngakulu, kungachitiska kuti munthu wasoŵi chakuchita.

Kumbi ndi nunkhu ko tingasaniya chovyu? Ŵanthu anandi awona kuti apembuzgika asani apemphera kwaku Chiuta kweniso asani aŵerenga nkhani zinyaki zakuchiska zo zisanirika m’Bayibolu. Kweniso anyaki apembuzgika asani ŵanthu a m’banja lawu kweniso anyawu atiŵawovya.

VINTHU VO VAWOVYAPU ŴANTHU ANYAKI

Robert wa vyaka 58 wangukamba kuti: “Mugomezgengi Chiuta ndipu iyu wakuwovyeningi kuti mukunthiyengepu masuzgu nginu. Mupempherengi kwaku Yehova, ndipu mumukambiyengi mo muvwiya. Mumupemphengi kuti wakupaskeni mzimu waki wakupaturika. Kweniso mumupemphengi kuti wakuwovyeni kuja ndi maŵanaŵanu ngakwenere, muchiskengi ŵanthu a m’banja linu ndipuso kuti mulutirizgi kuja ndi chimangu pa nyengu yo mukunthiyapu matenda.

“Uchiskika ukongwa asani ŵanthu a m’banja laku atikuwovya kuti ulekengi kusuzgika maŵanaŵanu. Zuŵa lelosi munthu yumoza pamwenga ŵaŵi atindimbiya foni ndipu atindifumba kuti ‘Muvwiyaku wuli?’ Anyangu wo aja m’malu ngakupambanapambana nawu atindichiska ukongwa. Kukamba uneneska, yiwu atindiwovya kuti ndivwengi umampha mumtima ndipu venivi vitindiwovya kuti ndilutirizgi kukunthiyapu.”

Asani muluta kuchiwona munthu yo watama, wonani vo Linda wangukamba. Iyu wanguti: “Munthu yo watama, nayu wakhumba kuti wajengi ndi umoyu wamampha ndipu wakhumba cha kuti kanandi ŵanthu akambengi vakukwaskana ndi matenda ngo watama. Mwaviyo, asani mwaluta kuchimuwona, mukambengi vinthu vakuchiska vo mukamba nyengu zosi.”

Chovyu chakutuliya kwaku Chiuta, kuŵerenga Malemba ngakuchiska kweniso chovyu chakutuliya ku ŵanthu a m’banja lidu ndipuso mabwezi ngidu, vingatiwovya kugomezga kuti umoyu we ndi phindu chinanga kuti tikunthiyapu matenda ngakulu.

Mavesi nga m’Bayibolu ngo Ngangawovya

Muthembengi Chiuta.

“Ndingupempha Yehova ndipu iyu wangundimuka. Iyu wangunditaska ku mantha ngangu. Munthu wakusika uyu wangudana, ndipu Yehova wanguvwa.”—Sumu 34:4, 6.

Linda yo wazumbulika kukwamba wangukamba kuti: “Ndipemphera cha kuti, ‘Ndiwovyeni kuti ndichiri.’ Kweni nyengu zosi ndipemphera kuti, ‘Ndiwovyeni kuti ndije ndi nthazi, kweniso ndiwovyeni kuti ndikunthiyengepu suzgu langu.’”

Muŵerengengi Mazu Ngaku Chiuta kuti muje ndi nthazi.

“Palivi yo wazamukamba kuti: ‘Ndatama.’”—Yesaya 33:24.

Muŵanaŵaniyengi vinthu vo Chiuta wakulayizga. Venivi vikuwovyeningi kuti muje ndi chilindizga cho chikuwovyeningi kuti muje ndi nthazi kuti mukunthiyepu masuzgu nginu.

Mupemphengi ŵanthu a m’banja linu kweniso anyinu kuti akuwovyeni.

“Bwezi litanja nyengu zosi, ndipu ndilu mubali yo wakuwiya kuti wakuwovyi pa nyengu ya masuzgu.”—Nthanthi 17:17.

Elise wangukamba kuti: “Mungajipatuwanga cha. Muzomerengi asani anyinu akhumba kukuwovyani. Nyengu zinyaki mungaŵanaŵana kuti mwe mwija kweniso kuti Chiuta watikuvwisiyani cha. Chinanga kuti mungajivwa viyo, mungajipatuwanga cha.”