LAYIBULARE YA PA INTANETI
Watchtower
LAYIBULARE YA PA INTANETI
Chitonga (Malawi)
  • BAYIBOLU
  • MABUKU
  • MAUNGANU
  • w19 November pp. 26-30
  • ‘Malizani Vo Mukwamba Kuchita’

Vidiyo yo mwasankha palivi.

Pepani, vidiyo iyi yikana kujula.

  • ‘Malizani Vo Mukwamba Kuchita’
  • Chigongwi cha Alinda Chakupharazga Ufumu Waku Yehova (Chakusambira)—2019
  • Mitu yimanayimana
  • Nkhani Yakuyanana
  • TECHENDASANKHI CHAKUCHITA
  • VO MUNGACHITA KUTI MUFISKI VO MWASANKHA
  • Kumbi Ndingachita Wuli Kuti Ndisankhengi Umampha Vakuchita?
    Mafumbu ngo Bayibolu Limuka
  • Jani Ndi Chivwanu—Sankhani Mwazeru
    Chigongwi cha Alinda Chakupharazga Ufumu Waku Yehova (Chakusambira)—2017
  • Musankhengi Vinthu vo Vikondwesa Yehova
    Chigongwi cha Mlinda Chakupharazga Ufumu Waku Yehova (Chakusambira)—2025
  • Vo Vingakuwovyani Kuti Musankhengi Umampha Vinthu
    Kondwani ndi Umoyu Kwamuyaya!—Kusambira Bayibolu Mwakukambiskana
Wonani Vinandi
Chigongwi cha Alinda Chakupharazga Ufumu Waku Yehova (Chakusambira)—2019
w19 November pp. 26-30

NKHANI YAKUSAMBIRA YA NAMBALA 48

‘Malizani Vo Mukwamba Kuchita’

“Malizani . . . vo mukwamba kuchita.”​—2 AKORI. 8:11.

SUMU 35 ‘Musimikiziyengi Kuti Vinthu Vakukhumbika Ukongwa ndi Nivi’

VO TISAMBIRENGI MU NKHANI IYIa

1. Kumbi Yehova wakutipaska wanangwa wuli?

YEHOVA wakutipaska wanangwa wakusankha vo tikhumba kuchita pa umoyu widu. Iyu watitisambiza mo tingasankhiya umampha kweniso watitiwovya kuti tisankhengi vinthu vo vingamukondwesa. (Sumu 119:173) Asani tigwiriskiya ntchitu zeru za mu Mazu ngaku Chiuta, tingasankha umampha vinthu.—Ahe. 5:14.

2. Kumbi tingakumana ndi suzgu wuli asani tasankha kuchita chinthu chinyaki?

2 Chinanga kuti tingasankha umampha kweni nyengu zinyaki tingatondeka kumaliza kuchita vo tasankha. Wonani vakuyeruzgiyapu ivi: Mubali wasankha kuti waŵerengi Bayibolu losi lamphumphu. Iyu wayambapu kuŵerenga kweni pa vifukwa vinyaki waleka pati pajumpha masabata ngamanavi. Mzichi wasankha kuti wachiti upayiniya wa nyengu zosi kweni wapingiya zuŵa lakwambiya. Wupu wa ŵara wasankha kuti uyende abali ndi azichi mu mpingu kuti aŵachiski kweni myezi yinandi yijumphapu waka kwambula kuchitapu kanthu. Chinanga kuti vakuyeruzgiyapu ivi vipambana kweni viyanana pa chinthu chimoza. Wosi anguchita cha vo angusankha. Akhristu a ku Korinto nawu angukumana ndi suzgu lenili. Kumbi tingasambiranji kwa Akhristu ŵenaŵa?

3. Kumbi Akhristu a ku Korinto angusankha kuchitanji, kweni ntchinthu wuli cho chinguchitika?

3 Cha mu 55 C.E., Akhristu a ku Korinto angukoliyana kuti achiti chinthu chinyaki chakukhumbika. Yiwu anguvwa kuti abali ŵawu ku Yerusalemu ndi ku Yudeya asuzgika ndi ukavu kweniso kuti mipingu yinyaki yisonkha ndalama kuti yiŵawovyi. Chifukwa chakuti ŵenga alisungu ndipuso akupaska, Akhristu a ku Korinto angukoliyana kuti nawu awovyeku ndipu angufumba wakutumika Paulo vo angachita. Paulo wanguŵakambiya vo angachita ndipu wangusankha Tito kuti waŵawovyi kutole ndalama. (1 Akori. 16:1; 2 Akori. 8:6) Kweni pati pajumpha myezi yimanavi, Paulo wanguvwa kuti Akhristu a ku Korinto ŵenga ŵechendayambepu kuchita vo angukoliyana. Ivi vatingi vichitiskengi kuti ndalama zawu zileki kutumizika pa nyengu yaki ku Yerusalemu pamoza ndi ndalama za mipingu yinyaki.​—2 Akori. 9:4, 5.

4. Malinga ndi 2 Akorinto 8:7, 10, 11, kumbi Paulo wanguŵachiskanji Akhristu a ku Korinto?

4 Akhristu a ku Korinto ŵenga ndi maŵanaŵanu ngamampha ndipu Paulo wanguŵalumba chifukwa cha chivwanu chawu ndipuso chifukwa cha kuŵa ndi mtima wakukhumba kovya abali ŵawu. Kweni wanguŵachiska so kuti amalizi vo angwamba kuchita. (Ŵerengani 2 Akorinto 8:7, 10, 11.) Nkhani iyi yititisambiza kuti chinanga angaŵa Akhristu akugomezgeka, nawu vingaŵasuzga kuchita vo asankha.

5. Kumbi tikambiskanengi mafumbu nanga?

5 Nge mo anguchitiya Akhristu a ku Korinto, nyengu zinyaki nasi vingatisuzga kuchita vo tasankha. Chifukwa wuli? Chifukwa chakuti te akubuda, tingachita vidazi. Pamwenga vinthu vamabuchibuchi vingachitiska kuti titondeki kuchita vo takhumbanga. (Waku. 9:11; Aro. 7:18) Kumbi tingachita wuli asani tikhumba kusankha chakuchita pamwenga kusintha vo tikusankha? Nanga ndi vinthu wuli vo vingatiwovya kuti timalizi vo tikwambapu kuchita?

TECHENDASANKHI CHAKUCHITA

6. Ntchifukwa wuli nyengu zinyaki tingasintha vo takhumbanga kuchita?

6 Vinthu vinyaki vo tisankha tingasintha cha chifukwa vakukhumbika. Mwakuyeruzgiyapu, tingaleka cha kuteŵete Yehova ndipuso tikhumbisiska kuja akugomezgeka ku muwolu pamwenga mulumu widu. (Mate. 16:24; 19:6) Kweni vinthu vinyaki tingasintha. Chifukwa wuli? Chifukwa vinthu visintha. Kumbi mungachita wuli kuti musankhengi umampha vinthu?

7. Kumbi titenere kumupemphanji Yehova, ndipu ntchifukwa wuli?

7 Mupemphengi zeru kwaku Chiuta. Yehova wangupangiza Yakobe kulemba kuti: “Asani munthu munyaki wasoŵa zeru, walutirizgi kupempha kwaku Chiuta ndipu wamupaskengi, pakuti iyu wapereka ndi mtima wosi kwaku weyosi.” (Yako. 1:5) Tosi ‘tisoŵa zeru’ pa vinthu vinyaki. Mwaviyo, titenere kuthemba Yehova asani tisankha vakuchita ndipuso asani tikhumba kusintha vo takhumbanga kuchita. Asani tichitengi viyo, Yehova watiwovyengi kuti tisankhengi vinthu mwazeru.

8. Kumbi mungafufuza pani mwechendasankhi chakuchita?

8 Mufufuzengi ukongwa. Mupenjengi ulongozgi mu Mazu ngaku Chiuta, muŵerengengi mabuku ngidu ndi kufumba ŵanthu wo muthemba. (Nthanthi 20:18) Kuchita viyo nkhwakukhumbika asani mukhumba kusintha ntchitu, kusama pamwenga kusankha masambiru kuti muzisaniyi ntchitu yo yingazikuwovyani pakuteŵete Yehova.

9. Kumbi tingayanduwa wuli asani tichita vinthu mwauneneska?

9 Jifumbeni chifukwa cho mukhumbiya kuchita vo mwasankha. Yehova wawona mwakupepuka cha chifukwa cho tasankhiya kuchita chinthu chinyaki. (Nthanthi 16:2) Iyu wakhumba kuti tichitengi vinthu vosi mwauneneska. Mwaviyo, asani tisankha vakuchita, tikhumbika kuchita vinthu mwauneneska asani tiŵanaŵaniya vifukwa vo tikhumbiya kuchita chinthu chinyaki. Asani tingaleka kuchita vinthu mwauneneska pa nkhani iyi, tingatondeka kuchita vo tingusankha. Tiyeruzgiyi kuti mubali wachinyamata wasankha kuchita upayiniya wanyengu zosi. Kweni mukuluta kwanyengu, watondeka kukwaniska maora ndipu venivi vichitiska kuti waleki kukondwa ndi uteŵeti. Panyaki pakwamba wajipusikanga kuti wakhumbanga kuchita upayiniya kuti wakondwesi Yehova. Kweni akhumba chifukwa chikulu chenga chakuti wakondwesi apapi ŵaki pamwenga munthu munyaki.

10. Kumbi ntchinthu wuli cho chingatiwovya kuti tisinthi?

10 Tiyeruzgiyi kuti munthu yo wasambira Bayibolu wakhumba kuleka kukweŵa foja. Pakwamba vitimusuzga kuleka. Iyu waleka kukweŵa kwa sabata yimoza pamwenga ziŵi, mbwenu watambaso. Kweni pavuli paki waleke limu! Cho chamuwovya kuti waleki kukweŵa, nkhwanja Yehova kweniso kukhumbisiska kumukondwesa.​—Ako. 1:10; 3:23.

11. Ntchifukwa wuli tikhumbika cha kuchita vinthu mwachipulamutu?

11 Mungachitanga vinthu mwachipulamutu cha. Asani muleka kuchita vinthu mwachipulamutu, chiŵengi chipusu kumaliza vo mwayamba kuchita. Mwakuyeruzgiyapu, mungasankha kuŵerenga Bayibolu zuŵa lelosi. Kweni asani mulivi ndondomeku yakuchitiya viyo, mungafiska cha kuŵerenga Bayibolu zuŵa lelosi.b Pamwenga ŵara angakoliyana kuti ayende mbereri kuti azichiski. Kweni mukuluta kwanyengu, atondeka kuchita vo angupangana. Kuti achiti vo angupangana, akhumbikanga kujifumba kuti: “Kumbi mbabali ndi azichi naŵa wo angayanduwa ukongwa asani tingaŵayende? Kumbi tingaŵayende zuŵanji?”

12. Kumbi tingakhumbika kuchitanji, ndipu ntchifukwa wuli titenere kuchita viyo?

12 Muziŵengi vinthu vo mungakwaniska. Palivi yo we ndi nyengu, ndalama pamwenga nthazi zakuchitiya chechosi cho wakhumba. Mwaviyo, muziŵengi vo mungakwaniska kuchita. Asani mphakwenere, mungasintha vo mungusankha asani muwona kuti mungakwaniska cha. (Waku. 3:6) Kweni wuli asani muwona kuti mungakwaniska kuchita vo mungusankha pavuli pakuti mwasintha vinthu vinyaki? Tiyeni tikambiskani vinthu vinkhondi vo mungachita.

MWECHENDASANKHI CHAKUCHITA

  1. Mubali wafufuza mu Bayibolu ndi mu mabuku ngidu

    Mupemphengi zeru kwaku Chiuta

  2. Mufufuzengi ukongwa

  3. Mujifumbengi chifukwa cho mukhumbiya kuchita vo mwasankha

  4. Mungachitanga vinthu mwachipulamutu cha

  5. Muziŵengi vinthu vo mungakwaniska

ASANI MWASANKHA VO MUKHUMBA KUCHITA

  1. Mubali wapemphera kwaku Yehova kuti wamupaski nthazi zakuchitiya vo wakusankha

    Mupempherengi kuti Yehova wakupaskeni nthazi zakuchitiya

  2. Muŵengi ndi pulanu

  3. Mufwiyengepu

  4. Mugwiriskiyengi ntchitu nyengu yinu mwakwenere

  5. Muŵanaŵaniyengi phindu laki

VO MUNGACHITA KUTI MUFISKI VO MWASANKHA

13. Kumbi mungatuwa nazu pani nthazi zakuchitiya vo mwasankha?

13 Mupempherengi kuti Yehova wakupaskeni nthazi zakuchitiya. Chiuta wangakupaskani “nthazi zakuchitiya” vo mukhumba. (Afi. 2:13) Mwaviyo, mupemphengi mzimu wakupaturika kwaku Yehova kuti ukupaskeni nthazi. Mungalekanga cha kupemphera chinanga mungawona kuti Chiuta waswera kumuka pempheru linu. Yesu wangukamba kuti: “Lutirizgani kupempha ndipu mupaskikengi” mzimu wakupaturika.​—Luka 11:9, 13.

14. Kumbi fundu ya pa Nthanthi 21:5, yingakuwovyani wuli kuti muchiti vo mwasankha?

14 Muŵengi ndi pulanu. (Ŵerengani Nthanthi 21:5.) Kuti mumalizi chechosi cho mwayamba kuchita, mukhumbika kuŵa ndi pulanu. Pavuli paki mukhumbika kuchita mwakukoliyana ndi pulanu yo mwapanga. Mwakuyanana ŵaka, asani mwasankha kuchita chinthu chinyaki, mulembengi chechosi cho mukhumba kuchita. Kuchita viyo kungakuwovyani kuti mukwaniski kuchita vo mukhumba. Asani ntchitu yo muchitengi njikulu, mungayigaŵa mu vigaŵa vimanavimana. Venivi vingakuwovyani kuziŵa vo mwachitaku. Paulo wanguchiska Akhristu a ku Korinto kuti aŵikengi pamphepeti kanthu kanyaki “pa zuŵa lakwamba la sabata yeyosi,” mumalu mwakulindizga kuti azipereki asani iyu waza. (1 Akori. 16:2) Kugaŵa ntchitu mu vigaŵa vimanavimana kungakuwovyani so kuti muleki kuwona nge kuti mungakwaniska cha.

15. Asani mwapanga pulanu, kumbi mukhumbika kuchitanji?

15 Asani mwapanga pulanu, mukhumbika kulemba vo mwasankha. Kuchita viyo kungakuwovyani kuti muchiti vo mwasankha. (1 Akori. 14:40) Mwakuyeruzgiyapu, wupu wa ŵara ukhumbika kusankha mubali kuti walembengi vo akoliyana, yo wachitengi kweniso zuŵa lo amaliziyengi. Ŵara wo agwiriskiya ntchitu ulongozgi uwu, angasuzgika cha kuchita vo akoliyana. (1 Akori. 9:26) Namwi mungachita so viyo pa umoyu winu. Mwakuyeruzgiyapu, mungalemba vinthu vo mukhumba kuchita zuŵa lelosi ndipu mungavilemba mundondomeku yo mukhumba kuvichitiya. Ivi vingakuwovyani kuti mumalizi vo mwayamba kuchita kweniso kuti muvichiti kwa nyengu yimanavi waka.

16. Kumbi mukhumbika kuchitanji kuti mumalizi vo mwayamba kuchita, nanga lemba la Aroma 12:11 likambanji pa nkhani iyi?

16 Mufwiyengepu. Mukhumbika kufwiyapu kuti mumalizi vo mwayamba kuchita. (Ŵerengani Aroma 12:11.) Paulo wangukambiya Timote kuti ‘walutirizgi kujipereka’ kuti waje musambizi walusu. Tingagwiriskiya so ntchitu ulongozgi uwu asani tikhumba kuchita vinthu vinyaki vauzimu.​—1 Timo. 4:13, 16.

17. Kumbi lemba la Aefeso 5:15, 16, lingakuwovyani wuli kuti muchitengi vo mwasankha?

17 Mugwiriskiyengi ntchitu nyengu yinu mwakwenere. (Ŵerengani Aefeso 5:15, 16.) Muŵikengi nyengu yo mukhumba kuzimaliziya vo mwasankha ndipu mungasinthanga cha. Mutenere cha kulindizga kuti vinthu vije dankha umampha chifukwa panyaki vinthu vazamujapu umampha cha. (Waku. 11:4) Mukhumbika kuphwere kuti vinthu vambula kukhumbika ukongwa vileki kukuryiyani nyengu pamwenga kukumaliyani nthazi zakuchitiya vinthu vakukhumbika ukongwa. (Afi. 1:10) Asani mungafiska, muchitengi vinthu vo mwasankha pa nyengu yo muwona kuti mulivi vakutimbanyizga. Muŵakambiyengi anyinu kuti mwatangwanika kuti aleki kukutimbanyizgani. Mungazimwa foni yinu ndipu mungawona mameseji asani mwamaliza vo mwachitanga.c

18-19. Ntchinthu wuli cho chingakuwovyani kuti mumalizi vo mwayamba kuchita chinanga mungakumana ndi masuzgu?

18 Muŵanaŵaniyengi phindu laki. Phindu lo musaniyengi chifukwa cha vo mwasankha le nge malu ngo muluta asani mwe paulendu. Asani mukhumba kuchifika nadi ko muluta mungawelere cha chinanga msewu ungajalika kweni mungasintha waka nthowa. Mwakuyanana ŵaka, asani muŵanaŵaniyengi phindu la vo mwasankha, mulekengi cha chinanga mungakumana ndi vakugongowesa.—Aga. 6:9.

19 Kusankha umampha nkhwakusuzga ndipu kumaliza vo mwasankha kungaŵa so kwakusuzga. Kweni Yehova wangakupaskani zeru ndi nthazi kuti mumalizi vo mwayamba kuchita.

KUMBI MUNGAMUKA WULI?

  • Tingakumana ndi suzgu wuli asani tasankha kuchita chinthu chinyaki?

  • Kumbi tingachita wuli asani tikhumba kusankha chakuchita pamwenga kusintha vo tingusankha?

  • Kumbi tingachita wuli kuti timalizi vo tayamba kuchita?

SUMU 65 Luta Panthazi!

a Kumbi mudandawula asani muŵanaŵaniya vinthu vinyaki vo munguchita? Pamwenga nyengu zinyaki musuzgika kusankha umampha vinthu ndipuso kuchita vo mwasankha? Nkhani iyi yikuwovyeningi kuziŵa vo mungachita kuti mumalani ndi masuzgu ngenanga ndi kumaliza vo mukusankha kuti muchiti.

b Asani mukhumba ndondomeku yakuŵerenge Bayibolu, mungagwiriskiya ntchitu ya pa jw.org®.

c Kuti muziŵi mo mungagwiriskiya ntchitu nyengu mwakwenere, wonani nkhani ya mutu wakuti, “Mfundo 20 Zothandiza Kuti Muzikhala ndi Nthawi Yokwanira” mu magazini ya Jani Masu! ya April 2010.

    Mabuku nga Chitonga (1996-2025)
    Tuwanipu
    Sereni
    • Chitonga (Malawi)
    • Tumizani
    • Vo Mukhumba
    • Copyright © 2025 Watch Tower Bible and Tract Society of Pennsylvania
    • Fundu zo Mutenere Kulondo
    • Nkhani Yakusunga Chisisi
    • Kusintha Vinthu Vachisisi
    • JW.ORG
    • Sereni
    Tumizani