Uneneska Wakukwaskana ndi vo Vichitikengi Kunthazi

Kumbi mukujifumbapu kuti ndi vinthu wuli vo vichitikengi kunthazi? Bayibolu likamba kuti ŵanthu azamukwaskika ukongwa ndi vo vichitikengi kunthazi.

Yesu wangukonkhoska vinthu vo vingatiwovya ‘kuziŵa kuti Ufumu waku Chiuta we pafupi.’ (Luka 21:31) Iyu wangukambiya limu kuti pa vinthu vosi venivi, kwazamuchitika nkhondu zikuluzikulu, vidilirisi vikuluvikulu, nja ndi milili. Venivi ndivu tiwona mazuŵa nganu.—Luka 21:10-17.

Bayibolu likamba so kuti “mazuŵa ngakumaliya” nga ulamuliru wa ŵanthu, ngazamuziŵika ndi mo ŵanthu achitiya vinthu. Mungaŵerenga fundu iyi pa 2 Timote 3:1-5. Asani muwona mijalidu kweniso vakuchita va ŵanthu mazuŵa nganu, mungazomereza kuti vo uchimi wa m’Bayibolu wenuwu ukamba vauneneska.

Kumbi venivi ving’anamuwanji? Ving’anamuwa kuti nyengu yepafupi yakuti Ufumu waku Chiuta usinthi vinthu pacharu chapasi ndi chilatu chakuti ŵanthu aje ndi umoyu wamampha. (Luka 21:36) Kuziya mu Bayibolu, Chiuta wakulayizga vinthu vamampha vo wakhumba kuzichitiya ŵanthu ndi charu chapasi. Wonani vo likamba:

ULAMULIRU WAMAMPHA

“Iyu [Yesu ] wangupaskika ulamuliru, ulemu kweniso ufumu, kuti ŵanthu, mitundu, kweniso ŵanthu a vineneru vosi amuteŵetiyengi. Ulamuliru waki ndi ulamuliru wamuyaya, wo wazamumala cha, ndipu ufumu waki wazamubwangandulika cha.”—DANYELE 7:14.

Vo fundu iyi ying’anamuwa: Mungakondwa ndi umoyu mu boma lamampha ukongwa lo Chiuta wakusankha Mwana waki kuja Fumu.

LIŴAVU LANTHAZI

Mwana msungwana yo wenga wakupunduka waleka kwenda pa njinga ya ŵanthu akupunduka ndipu watenda

“Palivi wakuja m’charu cho yo wazamukamba kuti: ‘Ndatama.’”—YESAYA 33:24.

Vo fundu iyi ying’anamuwa: Mwazamutamanga cha pamwenga kupunduka, ndipu mwazamuja mpaka muyaya.

CHIMANGU CHIKULU

“Iyu walekesa nkhondu pacharu chosi chapasi.”—SUMU 46:9.

Vo fundu iyi ying’anamuwa: Kwazamuŵavi nkhondu kweniso masuzgu ngosi ngo ngatuza chifukwa cha nkhondu.

CHARU CHOSI CHAPASI CHAZAMUZAZA NDI ŴANTHU AMAMPHA

“Ŵanthu aheni azamujaku so cha . . . Akufwasa azamulonde charu chapasi.”—SUMU 37:10, 11.

Vo fundu iyi ying’anamuwa: Ŵanthu ŵija wo avwiya Chiuta ndi mtima wosi ndiwu azamuja pa charu chapasi, kweni aheni wosi kwazamuŵavi.

CHARU CHOSI CHAZAMUJA PARADAYISU

“Yiwu azamuzenga nyumba ndi kujamu, ndipuso azamulima minda ya mphereska ndi kurya vipasu vaki.”—YESAYA 65:21, 22.

Vo fundu iyi ying’anamuwa: Charu chosi chazamuja chakutowa. Ndipu Chiuta wazamumuka pempheru lidu lakuti khumbu laki lichitiki “panu pasi.”—Mateyu 6:10.