“Zanga Uje Wakulondo Wangu”
1. Kumbi Sambiru la Bayibolo la Mpingu lo tiyambengi mu myezi yo yituza lazakutiwovya wuli?
1 Mauthenga nganayi ngo ngakonkhoska za umoyu waku Yesu panyengu yo wenga pacharu chapasi, ngatitilongo chithuthuzi chosi cha Mwana waku Chiuta. Pakuti Akhristu akhumbika ‘kundondoloska ukongwa menderu ngaki,’ isi titenere kunozgeke ukongwa ndipuso kuzivwisisa panyengu yo tazamukwamba kusambira buku lakuti “Bwera Ukhale Wotsatira Wanga” pa Sambiru la Bayibolo la Mpingu kwambiya sabata ya January 10, 2011. (1 Pet. 2:21; Marko 10:21) Tikhumbika kuzivwisisa ukongwa mo umoyu waku Yesu ungatiwovye mu uteŵeti.
2. Kumbi vo Yesu wanguchita pa nkhani ya kukunthiyapu vingatiwovya wuli?
2 Chakuwoniyapu cho Yesu Wangulongo: Kumbi ŵanthu akukumukanipu uheni pa nyengu yo mwapharazganga nyumba ndi nyumba? Asani ŵanthu atitikana viyo, tiwona kuti Yesu waneneskanga nadi po wangukamba kuti: ‘Asani angunditombozga ini, imwi namwi akutombozgeningi.’ (Yoha. 15:20) Mbuneneska kuti ndi mazu ngosi cha ngaheni ngo ŵanthu angakamba ngo ngangalongo kuti atititombozga. M’malu mwaki, likondwa lo lenga panthazi paki ndilu lingumuchitisa Yesu kuti wakunthiyepu mayeseru ngosi ngo wakumananga nangu. Nasi tikhumbika kuŵika mtima widu pa kumukondwesa Yehova ndipuso pa vitumbiku vo wazakutipasa chifukwa cha kugomezgeka kwidu. Ivi vitiwovyengi kuti ‘tileki kuvuka ndi kuwere vuli mu umoyu widu.’ (Ŵahe. 12:2, 3; Ntha. 27:11) Asani tikunthiyapu mu uteŵeti, tiŵengi ndi chigomezgu chosi kuti Khristu Yesu watiwovyengi.—Mate. 28:20.
3. Kumbi tingachita wuli kuti tiwonengi uteŵeti nge mo Yesu wauwoniyanga?
3 “Ndatumikiya Chenichi”: Nchitu yakupharazga Ufumu ndiyu yenga yakukhumbika ukongwa pa umoyu waku Yesu. (Luka 4:43) Iyu wangujipereka ndi mtima wosi kuchita nchitu yakupharazga. Iyu wayiwonanga kuti ndi nchitu yakukhumbika kuchitika mwaliŵi ukongwa ndipu nyengu zosi wayesesanga kusaniya mipata yakuti wakambengi za Ufumu. Pakuti isi tilondo Yesu, kumbi kulondo mapazi ngaki kutitilongozge nunkhu? Pa vakuchita vidu va zuŵa ndi zuŵa, kumbi tingasaniya cha ŵanthu wo tingakambiskana nawu uthenga wamampha? Chanju chaku Khristu chitenere kutichitisa kuti tipharazgengi ukongwa uthenga wamampha ndi kuyesesa kufikiya ŵanthu anandi.—2 Ŵako. 5:14.
4. Kumbi ndi nthowa nizi zo tingakuzgiya lusu lidu mu uteŵeti?
4 ‘Palivi Munthu yo Wakulongoropu Viyo’: Akuvwisiya azizwanga ndi kasambiziru kaku Yesu. (Yoha. 7:46; Mate. 7:28, 29) Kumbi iyu wapambananga wuli ndi asambizi anyaki? Iyu wayanjanga uneneska wo wasambizanga, wayanjanga so ŵanthu wo waŵasambizanga ndipuso wagwiriskiyanga nchitu nthowa zakupambanapambana pakusambiza. Nasi tingakuzga lusu lidu lakusambiza mu uteŵeti asani tilondo Msambizi Walusu mwenuyu.—Luka 6:40
5. Kumbi titenere kuja ndi chilatu wuli asani tayamba kusambira buku lakuti “Bwera Ukhale Wotsatira Wanga”?
5 Izi ndi fundu zimanavi waka zakukhumbika zo zikuzumbulika pa umoyu waku Yesu. Kumbi ndi fundu wuli zinyaki zakukhumbika zo mungasaniya? Asani musambira za umoyu waku Yesu pa Sambiru la Bayibolo la Mpingu, yesesani kuja ndi chilatu chakukhumba ‘kuziŵa chanju chaku Khristu’ mwakulondo mazu ngaki ndi nchitu zaki.—Ŵaefe. 3:19.