Kumbi Jisu Linu Ndamampha?
1. Kumbi kuja ndi jisu “lamampha” kung’anamuwanji?
1 Vo masu ngidu ngawona vikwaska vakuchita vidu. Mazu ngaku Yesu ngakuti, “Asani jiso lako ndamampha liŵavu lako lose liŵenge laukweru,” ngauneneska. (Mate. 6:22) Asani jisu lidu “ndamampha” mwauzimu, lilereska pa chinthu chimoza cho nkhuchita khumbu laku Chiuta. Tiŵika Ufumu panthazi ndipu titangwaniskika cha ndi vinthu vambula kwenere pamwenga vinthu vo vingatitondekesa kuchita uteŵeti.
2. Kumbi nchinthu wuli cho chingatimbanyizga mo tiwone vinthu, nanga chinthu wuli cho chingatiwovya?
2 Tikhumbika Kujisanda: Vo ŵanthu akusasa malonda akamba pa vinthu vo tikhumba ndipuso vo anyidu ŵe navu kali, vingatitimbanyiza kuti tileki kuwona vinthu vakukhumbika ukongwa. Techendasaniyi pamwenga kugula chinthu cho chikhumbika nyengu yinandi, ndalama pamwenga nthazi, tingachita umampha “kupima mtengu” waki mwa kujifumba kuti, ‘Kumbi cho ndikhumba kugula chindiwovyengi pakuteŵete Yehova pamwenga chinditimbanyizgengi?’ (Luka 14:28; Ŵafi. 1:9-11) Nchinthu chazeru so kuti nyengu ndi nyengu tiwonengi mo tingasinthiya vinthu vinyaki paumoyu widu kuti tichiti vinandi mu uteŵeti.—2 Ŵako. 13:5; Ŵaefe. 5:10.
3. Kumbi tisambiranji kwa muchizi munyaki yo wangusintha vinthu paumoyu waki?
3 Muchizi munyaki wati wayamba upayiniya wa nyengu zosi, wangusankha kulutirizga kugwira nchitu zuŵa losi chinanga wuli nchitu yakugwira maora ngamanavi yatingi yimuwovyengi kusaniya ndalama zakukwana. Kweni pavuli paki wanguti: “Palivi munthu yo wangaja muŵanda wa ambuya ŵaŵi. Ndakhumbikanga kujipereka ndi kuleka vakukhumba vangu kuti ndisaniyi vo ndikhumbika. Ndinguwona kuti katundu waswera cha kutchujuka ndipu ndatingi ndijivukisengi waka ndi kupenja katundu.” Muchizi uyu wenga ndi mwaŵi wakusintha vinthu vinyaki paumoyu waki ndi kwamba nchitu yo yingumupaska mwaŵi wakulutirizga uteŵeti wa upayiniya.
4. Nchifukwa wuli tikhumbika kulutirizga kuja ndi jisu lamampha pasonu panu?
4 Nyengu yinu tilimu yitenda liŵi ukongwa, mwaviyo nchinthu chakuzirwa kulutirizga kuja ndi jisu lamampha. Zuŵa lelosi lo lakapu lititinderezge ku umaliru wa mgonezu wunu wa vinthu ndi kukwamba kwa charu chifya chaku Chiuta. (1 Ŵako. 7:29, 31) Asani tiŵika mtima widu wosi pa nchitu yakupharazga, tingajitaska ndipuso kutaska ŵanthu wo atuvwa uthenga widu.—1 Timo. 4:16.