Tilongongi Kuti Tiwonga Chikumbusku Chazamuchitika pa 17 April
1. Kumbi wakulemba buku la sumu wangukamba mazu nanga ngo ngakoliya ukongwa ndi nyengu ya Chikumbusku?
1 Wakulemba buku la sumu wati wawona vakuchita vaku Yehova vinandi va lisungu ndi utaski, wangufumba kuti: “Nchine cho ndiwezgiyengi Ambuya pa vamampha vawu vosi paku ini?” (Sumu 116:12) Mazuŵa nganu ateŵeti aku Chiuta ŵe ndi vifukwa vinandi vakumuwonge. Pati papita vyaka vinandi kutuwa po mazu ngakuuzirika yanga ngangulembeke, Yehova wangupereka chawanangwa chikulu cho ndi sembi ya uwombozi. Te ndi vifukwa vamampha vakulongole kuti tiwonga pa nyengu yo tinozgeke Chikumbusku cha nyifwa yaku Khristu cho chazamuchitika pa 17 April.—Ŵako. 3:15.
2. Kumbi ndi vifukwa vinyaki nivi vo vititichitiska kuti tiwongengi sembi ya uwombozi?
2 Vitumbiku vo Tisaniya Chifukwa cha Uwombozi: ‘Tigowokereka maubudi ngidu’ chifukwa cha uwombozi. (Ŵako. 1:13, 14) Ivi vititiwovya kuti titeŵetiyengi Yehova ndi njuŵi yakutowa. (Ŵahe. 9:13, 14) Tikhoza kukambiskana nayu mwakufwatuka Yehova pakuromba. (Ŵahe. 4:14-16) Ŵanthu wo agomezga sembi ya uwombozi ŵe ndi chilindizga chamampha ukongwa cha umoyu wambula kumala.—Yoha. 3:16.
3. Kumbi tingamulongo wuli Yehova kuti tiwonga sembi ya uwombozi?
3 Nthowa zo Tilongole kuti Tiwonga: Nthowa yimoza yakulongole kuti tiwonga nkhuŵerenga ndi kulunguruka pa Malemba nga nyengu ya Chikumbusku. Nkhani ya mutu wakuti “Kodi Mukukonzekera Tsiku Lofunika Kwambiri Chaka Chino?,” yo ye mu Nsanja ya Olonda ya February 1, 2011, yikulembeka kuti yitiwovyi kuchita venivi. Tikhoza so kumukambiya Yehova kuti tiwonga sembi ya uwombozi mwakuromba kutuliya pasi pa mtima. (1 Ŵatesa. 5:17, 18) Tilongo so kuti tiwonga asani tivwiya dangu laku Yesu mwakusanirika pa mwambu wa Chikumbusku. (1 Ŵako. 11:24, 25) Kweniso tikhoza kuyezga chanju chikulu chaku Yehova mwakudana ŵanthu anandi kuti aziwungani nasi.—Yesa. 55:1-3.
4. Kumbi titenere kusimikizga kuchitanji?
4 Ateŵeti aku Yehova wo awonga azamuwona mwambu wa Chikumbusku nge unganu wewosi waka cha. Ndi unganu wakuzirwa ukongwa wa pachaka. Po nyengu ya Chikumbusku yiŵandika, titenere kusimikizga mtima kuti tije nge wakulemba buku la sumu yo wangukamba kuti: “Rumbanga Ambuya, wa mzimu (umoyu) wangu, ndipu ungaruwanga vakovya vawu vosi.”—Sumu 103:2.