‘Muchitengi Ichi’ Chikumbusku Chazamuchitika pa 5 April
1. Nchifukwa wuli kuchita Chikumbusku nkhwakuzirwa ukongwa?
1 ‘Muchitengi ichi pakundikumbuka ini.’ (Luka 22:19) Pakukamba mazu yanga, Yesu wangutuma akusambira ŵaki kuti akumbukengi zuŵa lo wangupereke umoyu waki nge sembi. Pakuŵanaŵaniya vosi vo vafiskika chifukwa cha sembi ya uwombozi, palivi zuŵa lakuzirwa ukongwa kwa Akhristu kuruska zuŵa la Chikumbusku cho chichitika chaka chechosi. Kumbi tingalongo wuli kuti tiwonga Yehova pa nyengu yo Chikumbusku chepafupi kuchitika chaka chinu pa 5 April?—Ŵako. 3:15.
2. Kumbi kusambira ndi kulunguruka kungatiwovya wuli kuti tilongo kuti tiwonga Chikumbusku?
2 Nozgekiyani: Kanandi tinozgeke vinthu vo tiwona kuti vakuzirwa. Tinganozgeke Chikumbusku mwakusambira ndi kulunguruka nge banja pa vinthu vo vinguchitika mu nyengu ya mazuŵa ngakumaliya nga umoyu waku Yesu pacharu chapasi. (Ezra 7:10) Malemba nganyaki ngamanavi ngo mwe nkhani izi, ngasanirika mu kalendala ndi mu kabuku ka Kusanthula Malemba Tsiku ndi Tsiku, kweni mu Nsanja ya Olonda ya February 1, 2011, peji 23-24 ndimu musanirika Malemba ngosi ndi mitu ya m’buku la Munthu Wamkulu yo yikonkhoska fundu za mu malemba ngo.
3. Kumbi tingalongo wuli kuti tiwonga Chikumbusku mwakusazgiyaku nyengu yakuchitiya uteŵeti?
3 Mupharazgengi: Tingalongo so kuti tiwonga asani timaliya nyengu yidu yinandi mu uteŵeti. (Luka 6:45) Nchitu yakudaniya ŵanthu ku Chikumbusku yo yichitikengi pacharu chosi, yazamukwamba pa Chisulu, pa 17 March. Kumbi mungasintha vakuchita vinu kuti muzisaniyi nyengu yakuchitiya vinandi mu uteŵeti, nge kuchita upayiniya wakovya? Mungachita umampha ukongwa kuzikambiskana nkhani iyi pa Kusopa kwa Pabanja.
4. Kumbi ndi vitumbiku wuli vo tingasaniya asani tisanirika pa Chikumbusku?
4 Tiyanduwa ukongwa asani tisanirika pa Chikumbusku chaka chechosi. Likondwa lidu ndipuso chanju chidu chisazgikiyaku asani tiŵanaŵaniya chanju chaku Yehova pakupereka Mwana waki wakuwa yija nge sembi ya uwombozi. (Yoha. 3:16; 1 Yoha. 4:9, 10) Ivi vititiwovya kuti tileki kuja umoyu wakujikondwesa tija. (2 Ŵako. 5:14, 15) Vititiwovya so kuti tikhumbisiskengi kuthamika Yehova pakweru. (Sumu 102:19-21) Ateŵeti aku Yehova akhazga mwalikondwa nchitu yo tiŵengi nayu mu nyengu ya Chikumbusku cho chazamuchitika pa 5 April, ‘yakuzipharazga nyifwa ya Ambuya.’—1 Ŵako. 11:26.