Tinozgeke Chikumbusku Mwalikondwa
1. Kumbi nyengu ya Chikumbusku yazakutiwovya kuchitanji?
1 Chikumbusku cho chazamuchitika pa Chiŵi, March 26, chazakutiwovya kuti tizikondwi ndi vo Chiuta wakuchita kuti taŵanthu titaskiki. (Yes. 61:10) Mtima walikondwa ngwakukhumbika ukongwa kuti tinozgeke umampha Chikumbusku chechendafiki. Kumbi tinganozgeke wuli?
2. Nchinthu wuli cho chititichitiska kuti tinozgekiyengi Chikumbusku?
2 Kunozgeke Chikumbusku: Nkhori ya Chakurya Chamazulu cha Ambuya yikhumba vinthu vinandi cha kweni njakuzirwa ukongwa. Kweni tikhumbika kunozgeke limu kuti tileki kuluwa vinthu vakukhumbika ukongwa. (Nthanthi 21:5) Tikhumbika kusankhiya limu nyengu ndi malu ngamampha. Tikhumbika kusaniriya limu chiŵandi ndi vinyu wakwenere. Titenere kunozge limu malu ngakuzichitiyapu kuti ngazije ngakutowa. Yo wasankhika kuzikamba nkhani watenere kunozgeke umampha, ndipuso akwendeska chiŵandi ndi vinyu kweniso akalindi atenere kuziŵiskikiya limu vakuzichita. Tikayika cha kuti tanozgeke kali vinthu vinandi. Tinozgeke umampha nkhori iyi chifukwa chakuti tiwonga sembi ya uwombozi.—1 Pet. 1:8, 9.
3. Kumbi tinganozgekereska wuli mtima widu?
3 Kunozgekereska Mtima: Kunozgekereska mtima widu nkhwakukhumbika so kuti tizivwisi kuzirwa kwa Chikumbusku. (Ezra 7:10) Kuti tinozgekereski mtima widu, tisaniyi nyengu yakuŵerenge malemba ngakukwaskana ndi Chikumbusku kweniso kuŵanaŵaniya ukongwa vo vinguchitikiya Yesu m’mazuŵa ngaki ngakumaliya nga pacharu chapasi. Kulunguruka kujipereka kwaku Yesu kutiwovyengi kuti timuyezgengi pakuteŵete Yehova.—Ŵag. 2:20.
4. Ndi vitumbiku nivi vo mukondwa navu ukongwa chifukwa cha sembi ya uwombozi?
4 Nyifwa yaku Khristu yitovya ŵanthu kuziŵa kuti Yehova ndiyu wakwenere kuwusa ndipu yikutifwatuwa ku ubudi ndi nyifwa. (1 Yoh. 2:2) Yititovya kuja pa ubwezi wamampha ndi Chiuta kweniso kuti tizisaniyi umoyu wambula kumala. (Ŵakol. 1:21, 22) Yitovya so kuti tichitengi vinthu mwakukoliyana ndi kujipereka kwidu kwaku Yehova ndipuso kuti tilutirizgi kulondo Khristu. (Mat. 16:24) Mwaviyo, lutirizgani kuja ndi likondwa muchinozgeke Chikumbusku ndi kuzisanirikapu!