Kumbi Munozgeke Chikumbusu?

Pasika wakumaliya yo Yesu wanguchita wenga wapade ukongwa. We pafupi kufwa wangunozga kuti wachiti Pasika ndi akusambira ŵaki, ndipu wangwambisa mwambu wa Chakurya Chamazulu cha Ambuya wo uchitika chaka chechosi. Yesu wangutuma Peturo ndi Yohane kuti akanozgi chipinda chakuchitiyamu Pasika. (Lk 22:7-13; wonani chithuzi pachikonkhombi.) Venivi vititikumbusa kuti titenere kunozgeke Chikumbusu cho chazamuchitika pa March 27. Mipingu yitenere kusankhiya limu akukamba nkhani, mo azamusaniliya chiŵandi ndi vinyu ndipuso vinthu vinyaki. Kweni kumbi munthu weyosi pakuyija wanganozgeke wuli Chikumbusu?

Nozgekiyani. Ŵerengani ndi kuŵanaŵaniya Malemba ngo ngakhumbika kuŵerengeka mu nyengu ya Chikumbusu. Ndondomeku yaki mungayisaniya mu kabuku ka Kukambiskana Malemba Zuŵa Lelosi. Wonani Fundu Zakukumaliya B12 mu Bayibolu la Charu Chifya la Malemba Ngakupaturika kuti muwoni ndondomeku yosi. (Wonani so Kabuku ka Unganu wa Umoyu Widu Ndipuso Uteŵeti ka April 2020.) Mabanja ngangasaniya fundu zo angakambiskana pakusopa kwawu kwa pabanja zakukwaskana ndi kuzirwa kwa sembi yaku Yesu mu Kabuku Kakufufuziya Nkhani ka Akaboni aku Yehova pamwenga mu buku la Watch Tower Publications Index.

Danani ŵanthu kuti azisanirikepu pa Chikumbusu. Muzigwireku mwaphamphu ntchitu yakudaniya ŵanthu ku Chikumbusu. Ŵanaŵaniyani ŵanthu wo mungaŵadana nge ŵanthu wo mutiŵapharazgiya kaŵikaŵi, wo mwasambiranga nawu Bayibolu kali, ŵanthu wo muziŵana nawu kweniso abali ŵinu. Ŵara atenere kuwonesesa kuti adana weyosi yo wakuleka kuwungana. Asani munthu yo mwakumana nayu waja mu chigaŵa chinu cha, lutani pa jw.org ndipu bofoni po alemba kuti VAKUKWASKANA NDI ISI, “Chikumbusu” kuti musaniyi nyengu ndi malu ngo amuchitiya Chikumbusu ko munthu yo waja.

Kumbi ndi vinthu wuli vinyaki vo tingachita kuti tinozgeke?