Kumbi Munozgeke Chikumbusku?

Penga pa Nisani 13 mu 33 C.E. Yesu wanguziŵa kuti kwaja usiku umoza pe kuti wabayiki ndipu waŵasiyengi ŵija akusambira ŵaki. Iyu wakhumbanga kuti wachiti Phaska ndi akusambira ŵaki ndipuso kwambisa mwambu wa Chakurya Chamazulu cha Ambuya. Pakhumbikanga kunozgeke chifukwa mwambu uwu wenga wakukhumbika ukongwa. Mwaviyo, Yesu wangutuma Petro ndi Yohane kuti akanozgi vinthu. (Luka 22:7-13) Kwambiya nyengu yeniyi, Akhristu wo achita mwambu uwu ayesesa kunozgeke. (Luka 22:19) Kumbi ndi vinthu wuli vo titenere kuchita pakunozgeke Chikumbusku cho chichitikengi pa 3 April?

Vo Ŵara Atenere Kuchita:

Saniyani malu ngakwenere ngakuzichitiyaku Chikumbusku. Mungazichitiya mu Nyumba ya Ufumu pamwenga malu nganyaki ngamampha. Malu yanga ngatenere kuja ngakukwana ŵanthu wosi, ngambula chifundizi ndipuso muzije vakumbulikiya. Wonesesani kuti mwanozga malu ngo mwazamuchitiyaku Chikumbusku.
Sankhani m’bali wakwenere yo wazamukamba nkhani, cheyamani ndipuso abali wo azamuromba pa nyengu ya chiŵandi ndi vinyu.
Asani mipingu yiŵi yazamugwiriskiya nchitu malu ngamoza, kambiskanani nyengu yo mpingu unyaki wazamumaliziya kuti anyawu aziyambi nyengu yamampha.
Sankhiyani limu akalindi ndipuso wo azamukwendesa chiŵandi ndi vinyu.
Wonesesani kuti mwasaniya chiŵandi chakwenere, vinyu, mbali, matambula, thebulu ndipuso salu yakubenekere pathebulu.

Vo Apharazgi Angachita:

Yesesani kugwiraku nchitu yakudaniya ŵanthu ku Chikumbusku.
Lembani mazina ngaku wo musambira nawu Bayibolo, achibali, wo musambira nawu sukulu, wo mugwira nawu nchitu ndipuso anyaki wo mukhumba kuziŵadana.
Yesesani kuŵerenga ndi kulunguruka malemba nga vakuchitika va munyengu ya Chikumbusku.
Muzifiki mwaliŵi ku Chikumbusku kuti muzilondere alendu.