Pazamuperekeka Ukaboni Wanthazi
1. Kusazgiyapu pankhani ya Chikumbusku, kumbi ndi vinthu wuli vinyaki vo vingakondwesa ŵanthu wo taŵadana? Konkhoskani.
1 Zukwanji? Pazuŵa la Chikumbusku. Tayesesa ukongwa kugwira nchitu yakudana ŵanthu kuti aziwungani nasi pazuŵa lo. Ŵanthu wo taŵadana akondwa ndi vo ŵavwa pe cha. Munthukazi munyaki wati wawungana nawu pa Chikumbusku, wangukamba kuti, weyosi wenga waubwezi, nyumba yo anguwunganamu yenga yakutowa ndipuso ayiphweriyanga. Nyumba yo, yikuzengeka ndi ŵanthu akujipereka. Mwaviyo, ngwakukamba nkhani pe cha yo wapereka ukaboni, kweni tosi tipereka ukaboni pa chakuchitika chakukhumbika ukongwa ichi, cho chichitika kamoza pachaka.—Ŵaefe. 4:16.
2. Kumbi tosi tingazichita wuli kuti tizipereki ukaboni kwa alendu?
2 Tawuzgani Alendu Mwakukondwa: Tazamupereka ukaboni asani tazamumwemwete ndi kukondwa pakutawuzga alendu. (Yoha. 13:35) Chinanga kuti mungazikwanisa cha kukambiskana ndi munthu weyosi, kweni mukhoza kuziziŵana ndi ŵanthu wo mwazamuja nawu pafupi. (Ŵahe. 13:1, 2) Muziyesesi kuziziŵana ndi ŵanthu wo azamuwoneka kuti palivi yo aziŵana nayu. Vingachitika kuti angulonde kapepala kakudaniya ŵanthu ku chikumbusku panyengu yo nchitu yakudana ŵanthu yachitikanga. Mukhoza kuziŵafumba kuti, “Kumbi nkhakwamba kuza kunu?” Pavuli paki, mungaziŵapempha kuti muzije nawu pamoza, ndipu muzijipereki kumuka mafumbu ngosi ngo azamufumba. Asani mpingu winu ukhumbika kuti uzituwemu liŵi mu nyumba yo mwazamuchitiya chikumbusku kuti mpingu unyaki uziyigwiriskiyi nchitu, mungaziŵakambiya kuti, “Ndingayanja kuti ndizivwi maŵanaŵanu nginu pa vo mwawona. Kumbi pangaŵa nthowa yeyosi yakuti ndizikumani namwi so?”
3. Kumbi tingaziŵalondele wuli ŵanthu akulopwa mwauzimu?
3 Londiyani Akulopwa Mwauzimu: Nchambula kukayikisa kuti apharazgi akulopwa mwauzimu nawu azamuŵapu, kusazgiyapu so wo awungana cha ndi mpingu kweni atuza panyengu ya Chikumbusku pe. Muziŵalondele ndipu muziŵachitisi kuti aziziŵi nadi kuti mwakondwa ukongwa kuŵawona. (Ŵaro. 15:7) Pavuli pa chikumbusku, ŵara angaziŵayende ŵanthu wo mu zinyumba zawu kuti akaŵachiski kuti alutirizgi kuwungana ndi mpingu. Tiromba kuti ŵanthu wosi wo azamusanirika pazuŵa lo, azije ndi mtima wakutumbika Chiuta chifukwa cha vo azamukuvwa pe cha, kweniso chifukwa cha ‘nchitu zidu zamampha zo azamuwona ndi masu ngawu.’—1 Pet. 2:12.