Wonani Nchitu Yinu Yakupharazga Kuja Chinthu Chakuzirwa
1. Kumbi ŵanthu anandi mu charu ichi atiyiwona wuli nchitu yidu yakupharazga?
1 Ŵanthu anandi a m’charu chaku Satana ichi, awona kuti kugwira nchitu yidu yakupharazga “nkhupusa.” (1 Ŵako. 1:18-21) Asani tingaleka kuphwere, maŵanaŵanu ngaheni yanga ngangatigongoweska ndi kuweze vuli phamphu lidu. (Ntha. 24:10; Yesa. 5:20) Kumbi nchifukwa wuli titenere kukondwa kuti tapaskika mwaŵi wakuja Akaboni aku Yehova?—Yesa. 43:10.
2. Kumbi nchifukwa wuli tingakamba kuti uteŵeti ndi “nchitu yituŵa”?
2 “Nchitu Yituŵa”: Wakutumika Paulo wangukamba kuti nchitu yakupharazga ndi “nchitu yituŵa.” (Ŵaro. 15:15, 16 NW ) Kumbi nchitu yakupharazga ndi “nchitu yituŵa” munthowa wuli? Kugwira nchitu iyi kutitichitiska kuti tije ‘anchitu anyaki’ aku Yehova Chiuta ‘mtuŵa,’ ndipuso kuchitiska kuti zina laki litozgeki. (1 Ŵako. 3:9; 1 Pet. 1:15) Yehova wawona kuti nchitu yidu yakupharazga ndi “sembi yakuthamikiya,” mwaviyo nchitu iyi nchigaŵa chakuzirwa ukongwa pakusopa kwidu.—Ŵahe. 13:15.
3. Kumbi nchinthu wuli cho chichitiska kuti nchitu yakupharazga yije mwaŵi ukulu ukongwa?
3 Kupharazga uthenga wamampha ndi mwaŵi ukulu wo ukupaskika ku ŵanthu amanavi waka. Angelu atingi akondwengi ukongwa kugwira nchitu iyi ndipu mwambula kukayika, yiwu atingi ayigwirengi umampha ukongwa. (1 Pet. 1:12) Kweni Yehova wasankha taŵanthu ambula kufikapu, “viyaŵi vadongu,” kuti tigwiri nchitu yapachanya iyi!—2 Ŵako. 4:7.
4. Kumbi tingalongo wuli kuti nchitu yidu yakupharazga titiyiwona kuti njakuzirwa ukongwa?
4 Chinthu Chakuzirwa: Chifukwa chakuti tikondwa ndi mwaŵi wo tikupaskika, uteŵeti widu titiwuwona kuti ‘nchinthu chakuzirwa ukongwa’ pa umoyu widu. (Ŵafi. 1:10) Mwaviyo, sabata yeyosi tipatuwa nyengu yakuti tigwireku nchitu iyi. Wakumba sumu yo wakhumba kuchimba kugulu kwa ŵanthu, watesesa kunozgeke kuti wakachiti umampha ukongwa. Mwakuyana waka, nasi tinozgekengi techendaluti mu uteŵeti alinga kuti ‘tikagaŵiyi kwakurunjika mazu nga uneneska,’ ndipuso tiyesesengi kuti ‘lusu lidu lakusambiza,’ liluti panthazi.—2 Timo. 2:15; 4:2.
5. Kumbi ndiyani yo wawonga ukongwa uteŵeti widu?
5 Mungagongowanga cha ndi ŵanthu wo akana uthenga widu. Kumbukani kuti muchigaŵa chidu mweche ŵanthu anandi wo alumba asani titiŵayende. Kweni ndipuwuli, isi tikhumba kulumbika ndi ŵanthu cha. Chakukhumbika ukongwa nkhuziŵa mo Yehova wavwiya, ndipu iyu watitiwonga ukongwa chifukwa cha phamphu lidu.—Yesa. 52:7