Yehova Watitisambiza Kuti Tichiti Nchitu Yeniyi
1. Kumbi Yehova wachitanji so asani wapereka nchitu ku ŵanthu?
1 Asani Yehova wapaska ŵanthu nchitu yakuti achiti, watiŵapaska so chovyu kuti ayimalizi. Mwakuyeruzgiyapu, Yehova wati wakambiya Nowa kuti wazengi chingaraŵa, nchitu yo Nowa wenga wechendayigwirepu, Iyu wangumulunguchizga mo wangagwiriya nchitu iyi. (Chiya. 6:14-16) Pa nyengu yo muliska wakufwasa Mosese wangutumika kuti wakakumani ndi ŵara a Yisraele ndipuso Farao, Yehova wangumusimikizgiya kuti “ndipu ini ndikaŵanga ndi mlomu waku, ndi kukusambiza venivo wamukamba.” (Chitu. 4:12) Yehova watipaska so ulongozgi wo utitiwovya pa nchitu yidu yakupharazga uthenga wamampha. Iyu watitisambiza mo tingagwiriya nchitu yeniyi kuziya mu Sukulu ya Uteŵeti Waku Chiuta ndipuso Unganu wa Uteŵeti. Kumbi tingayanduwa wuli ndi masambiru yanga?
2. Kumbi tingayanduwa wuli ndi Sukulu ya Uteŵeti Waku Chiuta?
2 Sukulu ya Uteŵeti Waku Chiuta: Mwechendaluti ku unganu, mutenere kunozgeke nkhani zosi zo ze pa ndondomeku ya maunganu. Asani muchita ivi mukavwisanga umampha ukongwa asani akusambira a mu sukulu akamba fundu za mu nkhani zawu, ivi vikuwovyeningi kuti mulutirizgi kusambira mo mungasambiziya. (Ntha. 27:17) Nyengu zosi mupingengi buku linu la Sukulu ya Utumiki ku unganu uwu ndipu muligwiriskiyengi nchitu. Asani wakuwonere sukulu wakamba kuti tiwoni mu buku lenili pakumaliya pa nkhani ya wakusambira weyosi, gwalani muzeri kusi kwa fundu zikuluzikulu zo mukhumba kuchizigwiriskiya nchitu ndipu mungalemba so fundu zinu mumphepeti mwa buku linu. Kweni kutomu chigaŵa ndiyu nthowa yamampha ukongwa kuti muyanduwi ndi sukulu iyi. Kumbi mukulembesa? Asani mwapaskika nkhani, yinozgekiyeni umampha ndipu gwiriskiyani nchitu ulongozgi wo mwapaskika. Asani mwe mu uteŵeti wakumunda, gwiriskiyani nchitu vo mwasambira.
3. Kumbi nchinthu wuli cho chingatiwovya kuti tiyanduwengi ndi Unganu wa Uteŵeti?
3 Unganu wa Uteŵeti: Kuti tikumbukengi fundu zo tisambira mu unganu uwu, titenere kuŵerenge limu nkhani zaki ndi kunozgeke kuti tikamukepu. Asani timuka mwakudumuwa, tiwovyengi kuti ŵanthu anandi amukepu. Muvwisiyengi mwakuphwere asani anyaki achita vakuyeruzgiyapu, ndipu gwiriskiyani nchitu fundu yeyosi yo muwona kuti yikuwovyeningi kuti muchiti uteŵeti winu mwakuko mtima. Asani Uteŵeti Widu wa Ufumu we ndi nkhani zinyaki zo zingakuwovyani mu uteŵeti, mutenere kuzisunga kuti muzizigwiriskiyi nchitu kunthazi.
4. Nchifukwa wuli tikhumbika kugwiriskiya nchitu umampha masambiru ngo Chiuta watitipaska?
4 Mwakuyana ndi nchitu yo Nowa ndi Mosese angupaskika, nchitu yidu yakupharazga uthenga wamampha pacharu chosi chapasi nayu njakusuzga. (Mate. 24:14) Tingachita umampha nchitu iyi asani tithemba Yehova, Musambizi widu Mura, ndipuso asani tigwiriskiya nchitu masambiru ngo watitipaska.—Yesa. 30:20.