Bokosi la Mafumbu

◼ Kumbi titenere kuromba pakuchitiska sambiru la Bayibolo lambula kuto nyengu lo tichita te wima pa khomu la munthu?

Kwamba ndi kumaliza sambiru la Bayibolo ndi rombu nkhwakovya mu nthowa zinandi. Asani tiromba, tipempha mzimu waku Yehova kuti utiwovyi pa vo tikambiskanengi. (Luka 11:13) Rombu litovya so wakusambira widu kuti wawoni kukhumbika kwa sambiru la Bayibolo ndipuso wasambira mo wangarombe. (Luka 6:40) Mwaviyo, nkhwamampha kwamba ndi rombu asani mwayamba waka kusambira ndi munthu. Kweni pakuti vakuchitika vipambanapambana, wakuchitiska samburu wakhumbika kugwiriskiya nchitu zeru kuti wawoni asani watenere kuromba pa sambiru la Bayibolo lambula kuto nyengu lo tichita te wima pa khomu la munthu.

Chinthu chakukhumbika ukongwa kuchiŵanaŵaniya ndi malu ngo pachitikiya sambiru. Asani muchita sambiru lakuma wima lakujalikiskika pamalu pakuti pajumphajumpha ŵanthu cha, mukhoza kuyamba ndi kumaliza ndi rombu lakudumuwa. Kweni asani pa malu po muchitiya sambiru pajumpha ukongwa ŵanthu pamwenga pangachitiska kuti yo musambira nayu waleki kufwatuka, vingaŵa umampha kuti mulindizgi dankha mpaka pa nyengu yo mwaziyambiya kusambiriya pa malu ngo paleka kujumphajumpha ŵanthu. Mwambula kuphwere kanthu kuti tichitiya sambiru pa malu wuli, titenere kuwona umampha mo vinthu viliri kuti tiziŵi malu ngo tingayambiya ndi rombu pakusambira.​​—⁠Wonani Utumiki Wathu wa Ufumu wa April 2005, peji  8.