Bokosi La Mafumbu
◼ Kumbi nchinthu wuli cho chingatiwovya kuziŵa munthu yo tingamugaŵiya magazini pamwenga mabuku?
Chinthu chikulu ukongwa cho chingatiwovya nkhuwona linweka lo munthu walongo. Asani walongo kuti we ndi linweka nadi, tingamusiliya magazini ngaŵi, kabuku, buku, pamwenga mabuku nganyaki ngengosi ngo tigaŵiya. Ivi vingaja viyo chinanga tingaziŵa kuti we ndi ndalama zimana pamwenga walivi ndalama yeyosi yakuti wapereki pakovya nchitu ya pacharu chosi. (Jobu 34:19; Chivu. 22:17) Kweniso, tingasiliya cha mabuku ngidu ngakuzirwa ŵanthu ambula kulumba.—Mate. 7:6.
Kumbi mweneku wanyumba wangalongo wuli kuti we ndi linweka? Tingaziŵa kuti we ndi linweka asani wakhumba kuti tikambiskani nayu. Walongo kuti wakhumba kuti tikambiskani nayu asani wavwisiya pa nyengu yo tilongoro, wamuka mafumbu ndipuso kukonkhoska maŵanaŵanu ngaki. Asani nayu waŵerenga Lemba lo tiŵerenga m’Bayibolo laki, vilongo kuti watumbika Mazu ngaku Chiuta. Nyengu zinandi, vija vakovya kumufumba asani wamuŵerenga buku lo tamugaŵiya. Apharazgi atenere kuchita vinthu mwazeru kuti aziŵi asani munthu we ndi linweka. Mwakuyeruzgiyapu, asani tichita upharazgi wa mu msewu, chingaŵa chinthu chambula kwenere kugaŵiya magazini, timabuku, pamwenga mabuku munthu weyosi yo wadumuwa. Asani tatondeka kuziŵa linweka la munthu, vingaja umampha kumupaska waka kapepala kekosi ko te naku.
Mwakuyana waka, unandi wa mabuku ngo mupharazgi watenere kuto uthemba pa ndalama zo waperekengi cha, kweni pa mabuku ngo wakhumba kuti wakagwiriskiyi nchitu mu uteŵeti waki. Chilatu cha vawanangwa vo tipereka nchakuti tilipiriyi mabuku ngo tato cha kweni nchakovya vigaŵa vosi va nchitu yakupharazga ya pacharu chosi. Mwambula kuphwere kanthu za nthowa zo tisaniriya ndalama, mtima wakuwonga utichitiskengi kuti tiperekengi ndi mtima wosi, chifukwa cha unandi wa vo te navu cha, kweni chifukwa chakuti tikhumba kuwovya pa vinthu va Ufumu. (Marko 12:41-44; 2 Ŵako. 9:7) Utichitiskengi so kuti titongi mabuku ngija ngo tikhumba ndi chilatu chakuti tileki kusakaza ndalama za gulu laku Chiuta.
[Fundu yo yakonkhoskeka papeji 2]
Apharazgi atenere kuchita vinthu mwazeru kuti aziŵi asani munthu we ndi linweka