Mupharazgengi Uthenga Wamampha Mwakugwiriskiya Nchitu Timapepala
1. Kumbi ŵanthu aku Chiuta aja achigwiriskiya nchitu timapepala m’nthowa wuli?
1 Akaboni aku Yehova aja achigwiriskiya nchitu timapepala kwa nyengu yitali pakupharazga uthenga wamampha. Mu 1880, C. T. Russell, ndi anyaki, angwamba kulemba timapepala to tadanikanga kuti Bible Students Tracts kuti ŵanthu wo aŵerenganga Nsanja ya Olonda akagaŵiyengi ŵanthu. Timapepala tenga takukhumbika ukongwa mwakuti mu 1884 C. T. Russell wangulembesa zina la wupu wo chilatu chaki nkhusaniya ndalama cha, kweni kulutiska panthazi Ufumu. Iyu wanguchita ivi kuti wupu uwu uje wakuzomerezgeka, ndipu wangusazgapu mazu ngakuti kapepala (Tract) pa zina lakuti Zion’s Watch Tower Tract Society lo sonu lidanika kuti Watch Tower Bible and Tract Society of Pennsylvania. Kufika m’chaka cha 1918 Akusambira Bayibolo angugaŵiya timapepala takukwana 300 miliyoni. Mazuŵa nganu timapepala teche kuja chidya chakukhumbika ukongwa pakupharazga.
2. Nchifukwa wuli ŵanthu atanja timapepala?
2 Chifukwa cho Ŵanthu Atanjiya Timapepala: Timapepala nthakutowa ndipu nthakukopa. Tija ndi fundu zakukondweska ndipuso zakusambiza. Ŵanthu wo aleka kwanja kuŵerenga magazini pamwenga mabuku akhoza kwanja kuŵerenga kapepala. Timapepala tisuzga cha kugaŵiya ndipu chinanga mbana pamwenga apharazgi asonu angasuzgika cha kugaŵiya kweniso nthambula kusuzga kupinga
3. Konkhoskani vo vingukuchitikiyani pamwenga nkhani ya mu mabuku ngidu yakulongo kuti timapepala nthakovya ukongwa pakupharazga uthenga wamampha.
3 Ŵanthu anandi angwamba kusambira uneneska kuziya mu timapepala. Mwakuyeruzgiyapu, munthukazi munyaki ku Haiti wanguwona kapepala kidu mu msewu. Wangukatondo ndi kuŵerenga ndipu wangukamba mwakukondwa kuti, “Ndasaniya uneneska!” Pavuli paki wanguluta ku Nyumba ya Ufumu ndi kwamba kusambira Bayibolo ndipu wangubatizika. Vosi ivi vinguchitika chifukwa cha nthazi ya Mazu ngaku Chiuta ngo ngasanirika mu timapepala.
4. Kumbi titenere kuja ndi chilatu wuli asani tigaŵiya timapepala?
4 Pakupharazga Nyumba ndi Nyumba: Chifukwa chakuti timapepala nthakovya ukongwa pakupharazga, kwambiya mu mwezi wa November, tikaŵikikanga pa gulu la vinthu vakugaŵiya mwezi wewosi. Chilatu chidu nkhupereka ŵaka timapepala cha, kweni nchakuti titigwiriskiyengi nchitu pakwamba kukambiskana ndi ŵanthu. Asani pa ulendu wakwamba munthu walongo kuti wakhumba kusambira Bayibolo, tikhoza kumulongo mo tisambiriya mwakugwiriskiya nchitu buku la Bayibolo Lisambizanji pamwenga buku linyaki lakusambiziya. Kumbi tingagaŵiya wuli timapepala pakupharazga nyumba ndi nyumba? Kapepala kekosi nkhakupambana ndi kanyaki, mwaviyo titenere kutiziŵa umampha timapepala tosi to tigaŵiya.
5. Kumbi tingagwiriskiya wuli nchitu timapepala pakupharazga nyumba ndi nyumba?
5 Nkhani yo tikambiskana ndi ŵanthu yitenere kukoliyana ndi chigaŵa chidu kweniso kapepala ko tigaŵiya. Pakwamba kukambiskana ndi munthu tikhoza kumupaska dankha kapepala. Iyu wangakayanja chifukwa chakuti nkhakutowa. Tikhoza kumulongo so timapepala takupambanapambana kuti wasankhi ko wayanja. Asani mutu wa kapepala ko tamupaska ndi fumbu, tingamupempha kuti wakambi mo wangalimukiya. Tikhoza so kupanga fumbu lidu lo lingawovya kuti tiyambi kukambiskana. Tingaŵerenge nayu limoza ndimi yinyaki mpaka po pe fumbu ndi kumupempha kuti wakonkhoskepu maŵanaŵanu ngaki. Kweniso tingaŵerenga lemba lo pagona nkhani yo tikambiskana. Pavuli pakukambiskana fundu zinyaki za mukapepala ko, tingapangana nayu kuti tamuwe so. Asani mpingu winu nyengu zinyaki usiya mabuku pa nyumba za ŵanthu wo aleka kusanirika, mukhoza kusiya kapepala pakweru kuti mweneku wa nyumba wazikasaniyi.
6. Kumbi tingagwiriskiya wuli nchitu timapepala pakupharazga mumsewu?
6 Upharazgi wa Mumsewu: Kumbi mukugwiriskiyapu nchitu timapepala pakupharazga mumsewu? Ŵanthu anyaki akhumba cha kuma kuti tikambiskani nawu chifukwa chakuti athaŵiriya ukongwa. Mphakusuzga kuziŵa kuti mbakunweka pamwenga cha. M’malu mwakuŵapaska magazini ngasonu techendaziŵi kuti amuŵerenga pamwenga cha, tingachita umampha kuŵapaska kapepala. Chifukwa chakuti nkhakutowa ndipuso fundu zaki zimanavi ŵaka, vingachitiska kuti ŵanthu aŵerengi chinanga angaŵa ndi nyengu yimana. Kweni asani athaŵiriya cha, tikhoza kukambiskana nawu nkhani zinyaki za mukapepala ko.
7. Konkhoskani mo ŵanthu anyaki apharazgiyapu mwamwaŵi.
7 Kupharazga Mwamwaŵi: Kupharazga mwamwaŵi ndi timapepala nkhwambula kusuzga. M’bali munyaki asani watuwapu waŵikanga timapepala timanavi m’thumba. Asani wakumana ndi munthu panyaki yo wagwira nchitu musitolu, watimupempha kuti asani wangayanja wakhoza kumupaska kapepala kuti waŵerengi, pavuli paki watimupaska kapepala ko. Banja linyaki lati laluta ku New York kuchiwona malu, linguwona kuti likhoza kuchikumana ndi ŵanthu akutuliya mu vyaru vakupambanapambana. Mwaviyo, banja ili lingupinga kabuku ka Mitundu Yonse ndi timapepala ta vineneru vakupambanapambana. Ndipu vo achitanga asani avwa munthu wachilongoro chineneru chachilendu, kaya wangaŵa wakuguliska vinthu mumphepeti mwa msewu pamwenga yo waja pafupi ndi restilanti, amugaŵiyanga kapepala ka chineneru chaki.
8. Kumbi timapepala tiyanana wuli ndi nje?
8 “Umiji Mbewu Yaku”: Tikhoza kuyeruzgiya timapepala ndi nje. Mulimi wamija nje zinandi chifukwa waziŵa cha kuti zo zimengi ndi nizi. Lemba la Wakutaula 11:6 likamba kuti, “Umiji mbewu yaku ndi mlenjilenji, ndipu ndi mazulu uleki kuko janja laku; pakuti kuti uziŵa cha zo zandanengi, izi pamwenga ziya pamwenga vinu zosi ziŵi zikaŵanga zamampha kwakukozgana.” Mwaviyo, titenere kulutirizga ‘kuwandiska chinjeru’ mwakugwiriskiya nchitu timapepala.—Nthanthi 15:7.
[Bokosi papeji 3]
Chifukwa chakuti timapepala nthakovya ukongwa pakupharazga, kwambiya mu mwezi wa November, tikaŵikikanga pa gulu la vinthu vakugaŵiya mwezi wewosi.