Timapepala Tasonu Tikulembeka Mwakukondweska!

1. Nchinthu wuli cho tingagwiriskiya nchitu mu upharazgi, cho chalembeka mwakukondweska?

¹ Pa Unganu Wachigaŵa wa 2013 wa mutu wakuti, “Mazu Ngaku Chiuta Mbuneneska,” pangutuwa timapepala tasonu tinkhondi. Kusazgiyapu pa timapepala iti, pe so kapepala ka Uthenga wa Ufumu Na. 38, ka mutu wakuti, “Kumbi Akufwa Angaja so ndi Umoyu?” Timapepala tosi 6 talembeka mwakukondweska. Nchifukwa wuli tanozgeka so viyo? Asani tipharazga kunyumba ndi nyumba, kumbi tingatigwiriskiya wuli nchitu mwakukoliyana ndi mo talembeke?

2. Nchifukwa wuli timapepala tasonu talembeka m’nthowa yeniyi?

² Nchifukwa Wuli Talembeka M’nthowa Yeniyi?: Kuti munthu waje mupharazgi walusu wakhumbika kufiska vinthu vinayi ivi: (1) Kufumba fumbu kuti mweneku wa nyumba wakonkhoski maŵanaŵanu ngaki. (2) Kukambiskana vo Malemba ngakamba pa nkhani yo. (3) Kumupaska buku pamwenga kapepala kuti waŵerengengi. (4) Kufumba fumbu lo lazamumukika pa ulendu wakuweriyaku ndi kupangana nawu zuŵa. Timapepala tasonu yiti, tititiwovya kuti tifiski kulondo vinthu vosi vinayi.

3. Kumbi tingagaŵiya wuli timapepala tasonu mu uteŵeti?

³ Vo Tingachita Pakugawiya: (1) Asani mwamutawuzga, mulongoni mweneku wa nyumba mafumbu ngo nge pakwamba pa kapepala ndipu mupempheni kuti wasankhepu kwamuka. (2) Julani kapepala ko ndi kumulongo kamutu kakuti, “Vo Bayibolo Likamba.” Vingaŵa umampha kuŵerenga malemba kutuliya m’Bayibolo chayilu asani vingachitika. Asani mweneku wa nyumba we ndi nyengu yinandi, kambiskanani kamutu kakuti, “Kumbi Bayibolo Lingakuwovyani Wuli?” (3) Mupaskeni kapepala ndipu mukambiyeni kuti waŵerengi kosi pa nyengu yo wangayanja. (4) Mwechendatuwepu, mulongoni fumbu lo le papeji lakumaliya pakamutu kakuti, “Vo Mutenere Kujifumba” ndipu panganani zuŵa linyaki lo mungazimuka fumbu lenili.

4. Kumbi tingatigwiriskiya wuli nchitu timapepala tasonu pa ulendu wakuweriyaku?

⁴ Kuchita ulendu wakuweriyaku naku kusuzga cha. Gwiriskiyani nchitu malemba ngo ngakuŵikika pakumaliya pakapepala, ngo ngamuka fumbu lo mungumulongo ulendu wakwamba. Mwechendatuwepu, mulongoni chithuzi cha kabuku kakuti Uthenga Wamampha ndipu mupaskeni kabuku yaka ndi kumulongo mutu wo ukonkhoska vinandi vakukwaskana ndi nkhani yo. Pavuli paki musiliyeni kabuku. Asani walonde kabuku, panganani zuŵa kuti muzikambiskani kabuku kenaka. Yapa ndikuti mwayambisa sambiru la Bayibolo. Nyengu zinyaki, m’malu mwakumupaska kabuku, mungamupaska kapepala kamtundu unyaki ndi kupangana nayu kuti muzikambiskani kapepala ko zuŵa linyaki.

5. Kumbi timapepala nthakukhumbika wuli mu uteŵeti widu?

⁵ Kwa vyaka vakujumpha 130, timapepala taja tichigwiriskikiya nchitu mu uteŵeti. Timapepala tawovya ukongwa pa nchitu yakuchitiya ukaboni chinanga kuti taja tichisinthika mo tilembeke kweniso ukulu waki. Mwaviyo, tiyeni tigwiriskiyengi nchitu timapepala to talembeka so mwakukondweska, pakupharazga uthenga wa m’Bayibolo pacharu chosi.—Nthanthi 15:7a.