Nthowa Zinkhondi Zakwambisiya Masambiru nga Bayibolo
1. Kumbi titenere kuchitanji asani tisuzgika kusaniya munthu wakuti tisambirengi nayu Bayibolo, nanga nchifukwa wuli?
1 Kumbi musuzgika kusaniya munthu wakuti musambirengi nayu Bayibolo? Mungafwanga daka cha. Yehova watumbika ŵanthu ambula daka pakuchita khumbu laki. (Ŵag. 6:9) Wonani fundu zinkhondi zo zingakuwovyani.
2. Kumbi nthowa yakufumba ŵanthu asani angayanja kusambira Bayibolo tingayigwiriskiya wuli nchitu?
2 Mufumbengi Ŵanthu Asani Angayanja Kusambira Bayibolo: Ŵanthu anandi aziŵa kuti tigaŵiya magazini nga Nsanja ya Olonda ndi Galamukani! kweni panyaki aziŵa cha kuti tisambira Bayibolo ndi ŵanthu. Mungachita umampha ukongwa kufumba ŵanthu asani angayanja kusambira Bayibolo pakupharazga ku nyumba ndi nyumba. Mukhoza so kufumba ŵanthu akunweka wo mukambiskana nawu fundu za m’Bayibolo asani angayanja kusambira. Asani akana mukhoza kulutirizga kuŵapaskanga magazini ndi chilatu chakuti muŵawovyi kuja ndi linweka. M’bali munyaki wakambiskananga ndi banja linyaki lo walipaskanga magazini kwa vyaka 10. Wati waŵapaska magazini ngasonu wanguweriyaku so kweni wanguŵanaŵana kuti waŵafumbi kuti: “Mungayanja kusambira Bayibolo?” Iyu wanguzizwa ukongwa kuti anguzomera. Ŵanthu yaŵa sonu akubatizika.
3. Kumbi mbumampha kuŵanaŵana kuti ŵanthu wosi wo afika pa mawunganu ŵe ndi ŵanthu wo asambira nawu Bayibolo? Konkhoskani.
3 Mufumbengi Akunweka wo Afika pa Mawunganu: Mungaŵanaŵananga kuti ŵanthu wosi akunweka wo atuza ku mawunganu asambira Bayibolo cha. M’bali munyaki wangukamba kuti: “Ndingwambisa masambiru nganandi mwakufumba ŵanthu akunweka wo azanga ku mawunganu.” Mzichi munyaki wangufumba munthukazi munyaki wasoni yo ŵana ŵaki anthukazi ŵenga akubatizika. Munthukazi uyu wanguwungana kwa vyaka pafufupi 15 ndipu nyengu zosi wafikanga asani mawunganu ngatamba ndi kuluta asani mawunganu ngamala ŵaka. Iyu wanguzomerezga kusambira Bayibolo ndipu pavuli paki wangubatizika. Mzichi iyu wangukamba so kuti: “Chitima chitindiko chifukwa chakuti ndamulereskanga ŵaka munthu uyu kwa vyaka 15 kwambula kumufumba asani wangayanja kusambira!”
4. Kumbi kufumba munthu yo wasambira kali Bayibolo pamwenga apharazgi anyidu kungatiwovya wuli kuti tisaniyi munthu yo tingasambira nayu Bayibolo?
4 Mufumbengi wo Musambira Nawu Asani Aziŵa Munthu Munyaki yo Wakhumba Kusambira: Mzichi munyaki watesesa kuluta limoza ndi anyaki ku masambiru ngawu. Iyu wapemphe limu mweneku wa sambiru kuti pakumaliya pa sambiru wakhumba kuchifumba mweneku wanyumba asani waziŵa munthu munyaki yo wangayanja kusambira. Asani munthu yo mukukambiskanapu nayu kali mutimupaska buku la Bayibolo Lisambizanji, mumufumbengi kuti: “Kumbi muziŵa munthu munyaki yo wangaliyanja buku ili?” Nyengu zinyaki kutuŵa kwakusuzga kuti apayiniya pamwenga apharazgi asambirengi ndi munthu yo akumana nayu mu uteŵeti. Mwaviyo, mukambiyengi anyinu kuti asani asaniya munthu yo wakhumba kusambira Bayibolo, imwi mukhoza kusambira nayu.
5. Asani tikhumba kusambira ndi munthu yo ndi Kaboni cha, n’chifukwa wuli titenere kufumba dankha murumu waki pamwenga muwolu waki yo tiwungana nayu?
5 Mufumbengi wo Akutorana ndi Kaboni cha: Kumbi mu mpingu mwinu mwe apharazgi wo akutorana ndi munthu yo ndi Kaboni cha? Ŵanthu anyaki akana kukambiskana va Bayibolo ndi munthu yo akutorana nayu kweni akhoza kuzomera asani munthu wapatali ndiyu wangaŵapempha kuti wasambirengi nawu. Kanandi vija umampha kufumbiya limu Mkhristu yo murumu waki pamwenga muwolu waki ndi Kaboni cha kuti muziŵi nkhani zo mungakambiskana nayu.
6. Kumbi rombu litovya wuli asani tikhumba kusaniya munthu wakuti tisambirengi nayu Bayibolo?
6 Murombengi: Mungaliwonanga mwakupepuka cha rombu. (Yak. 5:16) Yehova walayizga kuti wavwengi vosi vo tipempha mwakukoliyana ndi khumbu laki. (1 Yoh. 5:14) M’bali munyaki yo watangwanikanga ukongwa wanguromba kuti wasaniyi sambiru la Bayibolo. Muwolu waki wawonanga nge kuti murumu waki wangafiska cha kuphwere munthu yo wangasambira nayu, asani we ndi masuzgu nganandi. Mzichi uyu wanguromba kwaku Yehova kuti wawovyi murumu waki kusaniya sambiru ndipuso wanguzumbuwa vo wafipanga navu mtima. Marombu ngawu ngangumukika pati pajumpha masabata ngaŵi po mpayiniya munyaki wangusaniya munthu yo wakhumbanga kusambira Bayibolo ndi kupaska m’bali yo. Muwolu waki wangulemba kuti: “Weyosi yo wawona kuti wangafiska cha kusambira Bayibolo ndi munthu, waziŵi kuti: Pakuromba watenere kuzumbuwa mwakufwatuka vo wakhumba ndipu wangalekanga cha kurombe nkhani yeniyo. Isi sonu tikondwa ukongwa chifukwa taziŵanga cha kuti vinthu vitiyendiyengi umampha.” Asani mungaleka kufwa daka, mukhoza kusaniya munthu wakuti musambirengi nayu Bayibolo ndi kukondwa chifukwa chakovya munthu munyaki kuti wasere pa nthowa “yakurongozge ku umoyu.”—Mat. 7:13, 14.