Mukavwisiyengi Ndipuso Kusambira
1. Nchifukwa wuli tikhumbika kuyesesa kuti tikavwisiyengi ndipuso kuchisambira pa unganu wachigaŵa?
1 Pambula kuswera yapa maunganu nga chigaŵa nga 2013 ngayambengi. Penga nchitu yikulu ukongwa pakunozga unganu uwu wo we ndi fundu zasonu zo zikwaska ŵanthu wosi pacharu chapasi. Kumbi mwanozgeka kuti mukasanirikepu mazuŵa ngosi ngatatu? Pa maunganu nga chigaŵa pachitika vinthu vinandi vakutimbanyizga, mwaviyo tikhumbika kuyesesa kuti tikayanduwi ndi unganu uwu. Chifukwa chakuti maunganu yanga ngato nyengu yitali kuluska maunganu nga pa mpingu, tikhumbika kunozgeke ukongwa kuti tikavwisiyengi kwa nyengu yitali. Kwenda mtunda utali naku, ndipuso vinthu vinyaki, vingachitiska kuti tivukengi ukongwa. Kumbi ndi vinthu wuli vo vingachitiwovya kuti tikavwisiyengi ndipuso kuchisambira?—Mar. 31:12.
2. Kumbi tinganozgekereska wuli mtima widu kuti tikayanduwi ndi unganu?
2 Unganu Wechendayambi: Pa malu ngidu nga pa Intaneti, nga www.jw.org paŵikika pulogilamu yosi ya unganu, ndipu ye ndi mitu ya nkhani zosi kweniso lemba limoza pamwenga ngaŵi po patuliya nkhani zo. Asani te ndi mwaŵi wakuwona pa Intaneti, tikhoza kuyiwone limu pulogilamu yosi ya unganu uwu kuti yitiwovyi kunozgekereska mtima widu pa nkhani zo zamukambika. (Ezra 7:10) Mungachita umampha kukambiskana pulogilamu iyi pa Kusopa kwa Pabanja kuti weyosi waje ndi mtima wakuti wakasanirikepu.
3. Ndi vinthu wuli vo vakutiwovya kuti tikavwisiyengi pa unganu?
3 Asani Unganu Uchitika: Asani nkhwamachitika, mukalutiyengi limu kuchimbuzi pulogilamu yeyosi yechendayambi. Mungachichita so umampha ukongwa kujala foni kuti mukaleki kutimbanyizgika asani ŵanthu atikumbiyani pamwenga kulemberana nawu mauthenga po unganu we mkati. Asani mwamukhumba cha kujala foni yinu, mukayinthyengi munthowa yakuti yikaleki kutimbanyizga abali pa unganu asani ŵanthu atikumbiyani. Asani mwamugwiriskiya nchitu vidya vakujambuliya, kawoneseseni kuti vitimbanyizga abali cha. Mbumampha cha kuchirya vakurya unganu we mkati. (Wak. 3:1) Mukayesesengi kulereska yo wakamba nkhani. Namwi mukaŵerengengi mu Bayibolo linu asani wakukamba nkhani waŵerenga lemba. Mukalembengi fundu zo mwamukuvwa.
4. Kumbi apapi angawovya wuli ŵana ŵawu kuti akavwisiyengi ndipuso kusambira pa unganu?
4 Tikhumba so kuti ŵana ŵidu nawu akavwisiyengi ndipuso kusambira pa unganu. Lemba la Nthanthi 29:15 likamba kuti: “Mwana wakumulekelezga watole [wachitiska] soni anyina.” Mwaviyo, nkhwamampha kuti banja losi likajengi pamoza kuti apapi akawonesesengi kuti ŵana ŵawu avwisiya mwakuphwere pulogilamu ya unganu m’malu mwa kukambiskana ndi anyawu, kulemberananga mauthenga pa foni ndipuso kwendakwenda unganu we mkati. Chinanga ŵana wo angaja anamana ukongwa mwakuti angatondeka kuvwisiya chechosi cho chikambika, akhoza kusambizika kuti ajengi masu ndipuso kuleka kuchita viwawa.
5. Nchifukwa wuli tikhumbika kuweriyamu mu vo tasambira pa unganu, ndipu tingachita wuli venivi?
5 Pavuli pa Unganu Zuŵa Lelosi: Mukagonengi liŵi kuti mukapumuwengi mwakukwana. Kuweriyamu so mu fundu zo mwasambira kwakukuwovyani kuti mukazikumbukengi kwa nyengu yitali. Mwaviyo, vingachiŵa umampha kuchikambiskana pulogilamu ya unganu nge banja mazulu ngengosi. Vingaŵa so umampha kuti pa nyengu ya chakurya mukakambiskanengi ndi anyinu fundu zakukondweska zo mwavwa. Asani mwawere kunyumba pavuli pakuti unganu wamala, mukhoza kuchisaniya nyengu pa Kusopa kwa Pabanja kuti mukakambiskanengi mo mungagwiriskiya nchitu fundu zo mwamukuvwa pa unganu. Mukhoza so kuzisaniya nyengu yakuŵerenge mabuku ngasonu ngo ngamutuzgika pa unganu.
6. Kumbi kusanirika ŵaka pa unganu nkhwakukwana? Konkhoskani.
6 Chakurya chigwira nchitu umampha muliŵavu pijapija asani charyika ndi kugayika. Ivi viyanana waka ndi chakurya cho tamulonde pa unganu wachigaŵa. Tiyeni tikayanduwi mwakuchisanirikapu pa vigaŵa vosi va unganu, mwakuvwisiya ndipuso kugwiriskiya nchitu vo tamusambira.