Mo Tinganozgeke Mazu Ngakwamba

1. Nchifukwa wuli mazu ngidu ngakwamba ngakukhumbika kuja ngakwenere asani tikambiskana ndi ŵanthu?

¹ Nge mo fungu lamampha la chakurya lichitiskiya munthu kuti waje ndi chigomezgu chakuti waryengi chakurya chakunowa, mazu ngakwamba ngakwenere nangu ngachitiska munthu kuti waje ndi linweka lakuti wavwengi fundu za m’Malemba. Mazu ngakwamba ngamampha ngangaja ngatali pamwenga ngafupi malinga ndi nkhani yaki, kweni mwakuyanana ndi chakurya chakunowa, mazu ngakwamba ngakhumbika kungaŵanaŵaniya dankha ndipuso kunganozgeke umampha. (Nthanthi 15:28) Kumbi nchinthu wuli cho chingatiwovya kuti tiyambengi kukambiskana ndi ŵanthu ndi mazu ngakwenere?

2. Kumbi tingachita wuli kuti ŵanthu akondwengi ndi mazu ngidu ngakwamba?

² Tisankhengi Nkhani zo Angakondwa Nazu: Mazu ngidu ngakwamba ngachitiskengi munthu kuja ndi linweka, chifukwa mweneku wa nyumba wakhoza kutidumulizga asani waleka kukhorwa ndi mazu ngidu ngakwamba. Mwaviyo, asani tinozgeke, tikhumbika so kuŵanaŵaniya vo ŵanthu a m’chigaŵa chidu atanja. Kumbi ŵanthu a m’chigaŵa chidu akhumba boma lamampha, umoyu wamampha wa banja pamwenga akhumba kuti nkhondu zimali? Ŵanthu anandi atanja kukamba maŵanaŵanu ngawu, mwaviyo, tinozgiyengi limu fumbu lo lingawovya munthu kuti wakambi maŵanaŵanu ngaki. Kumbi mungayesa kugwiriskiya nchitu masachizgu nga mu Uteŵeti Widu wa Ufumu mwakukoliyana ndi chigaŵa chinu? Nyengu zinyaki muyeseriyengi pa Kusopa kwa Pabanja mo mungayambiya kukambiskana ndi ŵanthu.

3. Kumbi tingachita wuli kuti mazu ngidu ngakwamba ngakoliyanengi ndi midawuku ndipuso chigaŵa cho tipharazgamu?

³ Ŵanaŵaniyani Midawuku Ndipuso Chigaŵa Chawu: Mu vigaŵa vinyaki ŵanthu akhumba kuti asani munthu wafika ŵaka wakambengi dankha cho waziya. Kweni mu vigaŵa vinyaki, ŵanthu awona kuti nkhuŵavi ulemu asani munthu wafikiya ŵaka kukamba vo wapukwa m’malu mwakutawuzana dankha ndi ŵanthu kweniso kupaskana nawu malonji. Mu vigaŵa vinyaki, midawuku ya visopa yititizomerezga kwamba kukambiskana nawu nkhani ya m’Bayibolo. (Mac. 2:14-17) Kweni asani munthu we mu chisopa chachikhristu cha pamwenga we mu chisopa chechosi cha, vingaja umampha kumukambiya vakukwaskana ndi Bayibolo pa ulendu wakuweriyaku m’malu mwakumukambiya pa ulendu wakwamba.—Mac. 17:22-31.

4. Kumbi tikhumbika kuŵanaŵaniyanji pa nkhani ya mazu ngidu ngakwamba?

⁴ Mazu Ngakwambiya: Tinozgekiyengi limu mazu ngo tingayambiya kukambiskana ndi munthu. Mazu ngidu ngatenere kuja ngafupi ndipuso ngapusu. Titenere kuŵanaŵaniya so nthowa yo tingayambiya kukambiskana ndi munthu. Tikhumbika kulongoro mwalikondwa. Timwemwetiyengi mwakutuliya pasi pa mtima asani tikambiskana ndi mweneku wa nyumba kuti tilongo kuti titimuyanja nadi. Masachizgu yanga ngangatiwovya kuti tisaniyengi mazu ngamampha ngakwambiya kukambiskana ndi ŵanthu m’chigaŵa chidu, ngo ngangaŵachitiska so kuti aje ndi linweka lakuti ayambi kurya pa “gomi la Ambuya.”—1 Ŵakor. 10:21.