Mo Mungawovye wo Asuzgika Kuŵerenga

1. Kumbi kusambiza Bayibolo ŵanthu wo asuzgika kuŵerenga nkhwakusuzga wuli?

¹ Ŵanthu anyaki wo atondeka kuŵerenga akhumba kusambira vinthu vauzimu kweni atopa kusambira Bayibolo ndi mabuku nganyaki. Kugaŵiya ŵanthu aviyo buku la Bayibolo Lisambizanji paulendu wakwamba kungaja kwambula kovya. Kumbi tingaŵawovya wuli ŵanthu ŵenaŵa kuti aziŵi vakukwaskana ndi Chiuta? Tingufumbapu apharazgi m’vyaru 20 mo achitiya asani akumana ndi suzgu iyi. Vo angumuka tavilemba m’nkhani iyi.

2. Kumbi ndi vidya nivi vo mungagwiriskiya nchitu pakuwovya munthu yo wasuzgika kuŵerenga?

² Asani munthu yo musambira nayu wasuzgika kuŵerenga pamwenga watondeke limu, mungayamba kusambira nayu kabuku ka Vwiyani Chiuta, pamwenga Vwiyani Chiuta Kuti Muje ndi Umoyu Wamuyaya. Mpayiniya munyaki wa ku United States walongo mweneku wanyumba timabuku tosi tiŵi ndipu watimupempha kuti wasankhepu ko wangayanja. Ofesi ya nthambi ya ku Kenya yingukamba kuti timabuku yiti nthakovya ukongwa kwawu chifukwa ku Africa ŵanthu asambira vinthu mwakuŵakonkhoske ŵaka nkhani nge nthanu m’malu mwa mafumbu ndi kwamuka. Mwakupambana ndi ŵanthu ŵenaŵa, ŵanthu akusambira atanja kuŵerenga nkhani ndi kumuka mafumbu. Asani munthu yo watesaku kuŵerenga, apharazgi anandi atanja kugwiriskiya nchitu kabuku ka Uthenga Wamampha Wakutuliya Kwaku Chiuta! pamwenga Mungathe Kukhala Bwenzi la Mulungu! pamwenga Buku Langu la Nkhani za m’Bayibolo.

3. Kumbi ndi fundu nizi zakukwaskana ndi ŵanthu wo asuzgika kuŵerenga zo zingatiwovya asani tisambira nawu?

³ Muŵawongengi: Ŵanthu anandi wo aziŵa cha kuŵerenga achita soni ndipu atijikayikiya. Kuŵawovya kuti aje akufwatuka pamwenga kuti aleki kuchita soni ndichu chinthu chakukhumbika ukongwa asani musambira nawu uneneska. Anandi wo atondeka kuŵerenga aja ndi zeru ndipu asuzgika cha kusambira. Muchitengi nawu vinthu mwaulemu ndipuso muŵatumbikengi. (1 Pet. 3:15) Yiwu angachiskika kuti alutirizgi kusambira asani awona kuti phamphu lawu litiŵawovya ndipu aziŵa vinandi vakukwaskana ndi Chiuta. Mwaviyo, muŵawongengi mwakutuliya pasi pa mtima.

4. Kumbi tingaŵawovya wuli wo asuzgika kuŵerenga kuti anozgekiyengi sambiru?

⁴ Chinanga kuti munthu yo musambira nayu wasuzgika kuŵerenga, mumuchiskengi kuti wanozgekiyengi sambiru. Apharazgi anyaki ku South Africa achiska wo asambira nawu kuti apemphengi abali ŵawu wo aziŵa kuŵerenga kuti aŵawovyi. Mupharazgi munyaki ku Britain wachiska ŵanthu wo wasambira nawu kunozgeke sambiru mwakuŵapaska buku laki kuti aligwiriskiyi nchitu pa ndimi zimanavi kuti awoni mo kuŵiya kwambula kusuzga kusaniya kwamuka asani agwariyamu limu. M’bali munyaki wa ku India wachiska wo wasambira nawu kuti aviwoniyengi limu vithuzi va m’sambiru la sabata yakulondopu ndipuso avilungurukengi.

5. Kumbi tingalongo wuli mtima wakuzikira asani tichitiska sambiru?

⁵ Muzikirengi: M’buku lelosi lo mugwiriskiya nchitu, mudidimizgengi ukongwa fundu zikuluzikulu kweniso muwovyengi akusambira ŵinu kuti azivwisisengi. Pakwamba, mungachita umampha kusambira nawu kwa maminiti 10 pamwenga 15. Mungasambiranga nawu vinthu vinandi cha pa nyengu yimoza, kweni mungachita umampha kukambiskana nawu ndimi zimanavi. Muzikirengi asani yo musambira nayu wagotagota pakuŵerenga. Asani wayamba kuziŵa vinandi vakukwaskana ndi Yehova wangachiskika kwamba kuŵerenga umampha. Kumudaniya ku maunganu asani mwayamba ŵaka kusambira nayu kungamuwovya.

6. Kumbi tingaŵawovya wuli ŵanthu kuti aziŵi kuŵerenga?

⁶ Asani munthu yo tisambira nayu wayamba kuŵerenga, wangaluta panthazi mwaliŵi. (Sumu 1:1-3) Ŵanthu anandi awovya wo asambira nawu Bayibolo mwakusambira nawu buku la Dziperekeni pa Kuwerenga ndi Kulemba pavuli pa sambiru. Asani munthu yo musambira nayu Bayibolo wawona kuti wangafiska cha kusambira kuŵerenga, mungamuchiska mwakumukumbuska vinthu vinyaki vo wakufiska kusambira. Musimikizgiyeni kuti Yehova wamuwovyengi ndipu muchiskeni kuti wapemphengi chovyu kwaku Yehova. (Nthanthi 16:3; 1 Yoh. 5:14, 15) Apharazgi anyaki ku Britain achiska wo asambira nawu kuti ajengi ndi ndondomeku ya vinthu vo angafiska kuchita, nge kuloŵeza alufabeti, kwamba kupenja ndi kuŵerenga malemba kweniso kuŵerenga mabuku ngapusu ngakukonkhoska Bayibolo. Kusambiza ŵanthu kuŵerenga kusazgapu so kuŵachiska kuti aje ndi mtima wakukhumbisiska kuziŵa kuŵerenga m’malu mwakuŵasambiza ŵaka kuŵerenga.

7. Nchifukwa wuli titenere so kupharazgiya ŵanthu wo asuzgika kuŵerenga?

⁷ Yehova wawona kuti ŵanthu wo asuzgika kuŵerenga nawu mbakukhumbika ukongwa. (Jobu 34:19) Yehova wambulika m’mtima wa munthu. (1 Mik. 28:9) Mwaviyo, mungalekanga cha kupharazgiya uneneska ŵanthu wo asuzgika kuŵerenga. Mwe ndi vidya vinandi vo mungagwiriskiya nchitu. Asani pajumpha nyengu, mungaziyamba kusambira nawu buku la Bayibolo Lisambizanji kuti muŵawovyi kuziŵa vinandi vakukwaskana ndi Malemba.